16
Ravguangc Lungpuam Kamkuak Chanei
1 Khoutei, "Nangniw tatna Ravguangc kamkuak chanei tei mbaanv khou bun key tho!" twna khwan ranvmei akhat rui kauh baanchara chanei khou tei ravkai khou rui sa patmei ta ai chu the.
2 Reymei kauh baanchara tei tat patna katuang kamkuak mbaanv khou bun key the. Khoutei khouringh tuang madancloumei tei phunghmei nunc khatni mi maengc ta tei kalummei nunc khou tei si sihmei suhmei asu pat the.
3 Kaneimei kauh baanchara tei rui katuang kamkuak duipui khou bun key the. Khoutei dui tei meic theihmei zei kumc the, kumna duipui khou naimei kalungparik katana theic the.
4 Mi tangv kathumhmei kauh baanchara tei rui katuang kamkuak duiriang guay khatni duipuakkai guay khou bun key the. Kumna mi guay tei zei mbaih the. 5 Khoutei dui tuang kauh baanchara rui mi kumna samei ai chu e, "Nang tuang latzan hei nchumh e, He Nthanmeipu, nai bam khwanmei khatni nai bammeipu! 6 Kaniw rui nthanmei nunc khatni muhzwng nunc zei tikey the. Mi zaeng rui kaniw zangv khang zei tii the. Mi hei kaniw tuang taanv thay e!" 7 Khoutei, "Ngguay, He Poubauhmei Ravguangc, Ngamparimeipu! Nang tuang latzan guay hei nchumh e khatni nchumh e!" twna sa the.
8 Padeihmei kauh baanchara tei rui katuang kamkuak neihmik khou bun key the, kumna katuang mai rui meicnunc ta raw khang kakhou tiilou kan the. 9 Meic nunc ta tei mi chaenghmei ramchaeng tei rui raw the. Khoutei mi ntaemhmei guay hei tiiguangmeipu Ravguangc ta siang the. Kaniw lunghlaicna Ravguangc ta kalum mak khe.
10 Panguhmei kauh baanchara tei rui katuang kamkuak khouringh tuang guanghbamvpaeng khou tei bun key the. Khoutei khouringh tuang guangcdic tei zingc the, kumna meic guay tei kaniw baley nkayna suhmei tei khaengv the. 11 Suhmei khatni asuh zaeng rui kaniw tingkauh Racguangc ta siang the. Kumna kaniw tuang simei taanv guay khou tei rui kaniw lunghlaih mak khe.
12 Mi tangv charukmei kauh baanchara tei rui daihmei Euphrates Duiriang khou katuang kamkuak bun key the. Khoutei mi duiriang tei thip the, kumna neihpat biak thangcmei guangc nunc rih key khang chaeng laanclou the. 13 Mi tangv gou kumhmei nthan makmei bumaengc chanei ai how e. Mi guay tei thaanngangc mwang khou rui, khouringh mwang khou rui, khatni guatmei muczwng mwang khou rui pat e. 14 Mi nunc hei charynmei taanv mpeyna taanc bammei ravsic tuang bumaengc nunc e. Ngamparimei Racguangc tuang daihmei Tingmik tuang rihdai adow khang, mbaanv kapwm guangc nunc ta khuam kaduai khang kaniw tat kan the.
15 "Zauc lo! Ai kaihouhmei guang kumc guang puni the. Paliucna charuangc khou zakmei ariw pw ramc e twna, ntak nrakna katuang pwanrai chamdaanvlouna bampui mei tei sangaymei e!"
16 Mi bumaengc guay tei rui guangh guay ta tei Ibri lat khou Armageddon twna kawmei bamv khou tiguang kaduailou the.
17 Mi tangv chaneimei kauh baanchara tei rui katuang kamkuak mpwan khou bun key the. Khoutei, "Luai the!" twna khwan ranvmei akhat rui Ravkai lungc khou naimei guanghbamvpaeng khou tei rui kauc pat the. 18 Khoutei tingpalik ganhkeyna kachin karo the khatni baengladaih zay the. Maansei lungc pat rap khou rui mi kumhmei baengla hei zay kan mak he. Mi hei tanc liangmei baengla e! 19 Mi daihmei kaidai tei kalangv kathumh khang zay baklou the, khatni zaatc guay tuang kaidai guay tei pangv ngam the. Ravguangc mi daihmei Babilon ta tei amuc mak e, kumna kaniw ruc khou kalungpuam keylou the. 20 Duipuidic guay maan ngam the; chyng but guay ni nai dat mak khe. 21 Nrihthai daihmei, kilogram riakngu dou nganv nritmei, tingpuk thangc rui meicnunc ruc khou key the. Nrihthai tei rui heidikamv swkasic karouclou tina meicnunc tei Ravguangc ta siang the.