15
Kauh Baanchara Chanei khatni Ntaemhmei Chanei
1 Mi tangv, ndanhpui tuang, kadath datmei akhat tingpuk khou how e. Mi kiu ntaemhmei chanei phunghmei kauh baanchara chanei e. Mi tei nkhamhmei the; mi tei Ravguangc lungpuam nganvloumei the.
2 Mi tangv, mai kazauhmei dandik duipui kumhmei akhat how e. Khouringh khatni mi maengc ta rihngammei nunc khatni kazanc phaan kasing rui lynmeipu ta rihngammei nunc ta ai how e. Kaniw tei Ravguangc rui tiiloumei nrac sinna, mi maengzau duipui daeng khou tei dingna, 3 Ravguangc bangc Mousi khatni Lauziu Nac tuang lu mi kumna swan bam e:
"He Poubauhmei Ravguangc, Ngamparimeipu!
Nang taanv guay hei daic e,
khatni charyn e!
He zaatc guayna Guangc,a
Nang chaeng guay nchumh e khatni nchumh e!
4 Nang ta ping lak nimei thow nai cho,
Nang zanc ta thuanc lak nimei thow nai cho, He Poubauhmei?
Nang na he nthanmei e.
Zaatc guayna guangna nang ta kalum puni,
kalam thu nang tuang nchumhmei latzan guay how the."
5 Mi tangv hei laanclou bammei ravkai tingkauh thangc how e. Mi khou tei Nthanmei Pheykai nai e. 6 Ntaemhmei chanei phunghmei kauh baanchara chanei mi ravkai khou tei rui pat e. Kaniw nthan karangmei pwan piu e, kumna kaniw ngaengv khou kachaekc paek kamclou e. 7 Khoutei ramhkui padeih pang khou tei akhat rui tingsaengzaeng ringc bammei Racguangc tuang lungpuam rui padikmei kachaekc kamkuak chanei kauh baanchara chanei khou tei tiilou kan e. 8 Ravguangc tuang hymdaihmei khatni katuang pumtan tuang maikhou rui mi ravkai tei padik khwan e. Kumna kauh baanchara chanei rui phungc guangmei ntaemhmei chanei tei luai kan mak saanv, meic gaanv khat na sini mi ravkai khou tei gut nuh mak e.