18
1 Mi tangv hei ngamv daihmei phunghmei kauh baanchara baihmei akhat tingkauh thangc rui keymei ta ai how e. Kariw rui kandih kapwm gaanc e. 2 Khwan ranvna kamei rui sa e:
"Bow kan the,
daihmei Babilon bow kan the!
Mi tei ravsic nunc bamv sw kan the,
simei bumaengc guay bamv sw kan the,
nthan makmei khatni karaeng kadangmei nruay nunc bamv sw kan the.
3 Kalam thu zaatc guayna katuang
nthah boulahmei zouc zangv mba the.
Kandih guangc guay kamei lev lungcmaanv lungcmowmei taanv taanc the.
Katuang kasut dat makmei nthahmei rui,
kandih khou lanvguanh lanvdaenghmei nunc ta tilungcgaylou the."
4 Mi tangv khwan akhat rui tingkauh thangc rui mi kumna samei ai chu e:
"Tat pat tho, amei guay lev,
kakhou rui tat pat tho!
Katuang paap khou tei nangniw lay kazauh lamc e;
katuang ntaemhmei khou tei lay kazauh lamc e!
5 Kalam thu kapaap tingkauh khwan tangc the,
katuang simei taanv guay tei Ravguangc amuc mak e.
6 Kamei rui nangniw khou swloumei kahak tei kakhou ni swlou tio;
kamei rui taancloumei kahak tei kadam kanei khangclou tio.
Kamei rui nangniw ta tizangvmei zouc tei kadam kanei titanclouna tii tio.
7 Karana kagaengh swna khatni nungngai amanvna lungc kanmei chuath tei,
kakhang ryanramei khatni zaengsimei tii tio.
Kalam thu 'Ai liammav swna dungc bam e!
Ai maypui hamh e;
ai zaengsina lungc ni tu hamh e!'
twna karana sa bam e.
8 Mi zaeng rui, neih khat na khou
ravpyan, zaengsimei,
khatni nkow ndaepcmei kakhou guanglou puni.
Kata mai rui ntei puni,
kalam thu Poubauhmei Ravguangc,
kata latzan swmeipu hei ngammeipu e."
9 Kata nteimei maikhou tei how pwkhou, kamei lev nthah boulahna lungcmaanv lungcmowmei taanv taanhmei kandih guangc nunc tei kakhang rui puihuayna kap puni. 10 Kaniw ni mi khou tei lay kazauh pw khang ping lana, duh thangc dingna sa e, "Apuai! Apuai! Ganvdak akhat lungc khou nang ruc khou latzan keylou the!"
11 Kumna lanvguanh lanvdaenghmei kandihmei guay kakhang huayna kap the; kalam thu kaniw tuang puat meic liulou dat mak khe. 12 Kaniw tuang kachaekc, daandi, kamanv kunghmei tauc, mukta, meic liulou dat mak khe. Kaniw tuang pheynuaih phey, haengc nrymmei phey, nkupuilangc phey, haengc ringhmei phey; kunghmei thing zaatc kapwmna; guipwang nei khatni kunghmei thing rui kasiamhmei puat guayna khatni kuanzinc, ntanh, ntauhhuc tuang puat guay; 13 maansuc, gumh, agaw, maruai, agaw; zouh khatni thauh, gehu khatni ntyan buay, guaih khatni lauziu, takuanh khatni taluanglai, bangh khatni maansei—mi guay hei liulou dat mak khe. 14 "Nangniw tuang kasyan kahawmei puat guay maan ngam kan the, khatni nangniw khiu khingh khatni gunc gac guay maan ngam kan the. Mi guay tei nangniw laatow dat ni tu hamh the!" twna sa the. 15 Mi puat guay hei kakhou lanvguanhna lungcgay bammei lanvguanhmei nunc tei, kaniw ryanra tei kaniw khou guanglou pw khang pingna duh thangc dingna kapna huayna, 16 sa e, "Apuai! apuai! Linen, haengc nrymmei khatni haengc ringhmei pheybaan rana piuna, kachaekc, mukta khatni kunghmei tauc rui karuh bammeipui tei! 17 Ganvdak akhat na lungc khou rui mi kumhmei katuang lanv guay tei maan ngam kan dyng the dav ni!"
Rungh kaipouc guay, rungh khou tat bammei guay, rungh chaumei guay khatni lanvguanh lanvdaenghna duipui khou tat bammei guay tei duh thangc dingna, 18 kata ntei bammei maikhou tei zaucna, "Mi kaidai kumcna daihmei baihmei kaidai nai khwan lak dyng the ni!" twna kauc the. 19 Kaniw py khou mbut nroulouna, latluna kaucna sa the, "Apuai! Apuai! Duipui khou kaniw tuang rungc tat bammei nunc kaniw tuang lungcgay ntaanv bammei kaidai tei! Ganvdak akhat khou rui kata sw mutsutlou dyng the ni!"
20 He tingkauh, neihla tho. Nthanmei nunc, latdiutatmei nunc khatni muhzwng nunc, nangniw neihla tho! Nangniw ruc khou taancloumei khang tei Ravguangc rui kaniw ruc khou mi latzan hei keylou the!
21 Mi tangv tanhmei kauh baanchara akhat rui daihmei napriaktauc dymei tauc khat laa thauna mi tei duipui khou phaic keyna sa the, "Mi hei kumcna daihmei Babilon kaidai ta ndat key puni. Kumna mi ta hei how dat lak khe. 22 Lu suanmei khwan khatni nrah khwan, nlim khatni tiangka muanmei khwan nang khou chu dat lak khe! Thyamthaymei nai dat lak khe; nap riakmei khwan ni chu dat lak khe! 23 Nang khou thauhmai riw how bam dat lak khe. Nang tuang lanvguanh lanvdaenghmei nunc tei kandih khou meicdaihmei nunc sw bam khwan e, kumna nang tuang duaic raengc rui zaatc guay ta guat the!"
24 Muhzwng nunc khatni nthanmei nunc tuang zei mi kaidai khou tei nai the. Ngguay, kandih khou swluai kanmei zei guay mi khou tei nai the. Mi zaeng rui Babilon ruc khou mi latzan hei keylou tuang e.