19
1 Mi tangv meic kangdai rui kauc bammei khwan kumhmei tingkauh thangc mi kumna ai chu e,
"Halleluija! Guloumei, hymdaihmei khatni
pumtan hei aniu Racguangc tuang e!
2 Katuang latzan hei nchumh e khatni nchumh e!
Katuang lungcmaanv lungcmowmei taan rui,
mbaanv ta sw-mphuammei mangcsangmeiluc ruc khou katuang latzan keylou kan the,
kabangc nunc tuang zei khwm khangclou kan the."
3 "Halleluija! Kata nteimei maikhou
tingsaengzaeng khou bam puni!"
twna kaniw rui kauc e. 4 Mi tangv gaanvdaih nchuihna padeih khatni ramhkui padeih tei, guanghbamvpaeng khou dungc bammeipu ta nkhum laemv keyna kalum the. "Amen! Halleluija!" twna sa the.
5 Khoutei khwan akhat rui guanghbamvpaeng khou tei rui sa the, "He kabangc guay khatni nthyammei daihmei kata pingmei guayna, Ravguangc ta thuanc o!"
Lauziu Nac Nowsuanh Ngai
6 Mi tangv meic kangdai khwan kumhmei, duidai khwan kumc, tingthimc ganhkeymei khwan kumhmei chu e. Kaniw rui sa the, "Halleluija! Poubauhmei, Ngamparimeipu aniu Racguangc hei Guangh e! 7 Aniu neihla zaenggay di kho; aniu kahym thuanc di kho! Kalam thu Lauziu Nac now suanc nimei ganv tangc the, kumna nowpeic tei chamdaanv bam the. 8 Nthanmei mphwan kachanmei phey kakhang tii kan the. (Mi mphwanmei phey hei nthanmei nunc tuang ravchaptatmei taanv tei e.)
9 Khoutei, "Mi hei hy o: Lauziu Nac tuang nowsuanh ngai taektw khang kawloumei nunc tei sangaymei nunc e. Mi hei kalingmei Ravguangc lat e," twna kauh baanchara tei rui sa the.
10 Khoutei kata kalum khang ai kahu khou nkhum laemv key tikhou, "Ata kalum rio! Ai thu nang kumhmei khatni nchumhmei laatow kanmei chana punav guay kumhmei siamruaimei makaemv de. Ravguangc ta kalum o!" twna sa the.
Kalam thu Jisu rui dincloumei nchumhmei lat hei muhzwng nunc khou tiiloumei lat tei e.
Takuanh Mphwanmei Tuanghmeipu
11 Mi tangv tingkauh laanc patmei ta ai how e, kumna takuanh mphwanmei akhat how e. Mi ruc khou dungc bammeipu ta tei Lwmnuhmei khatni Nchumhmei twna kaw e. Kamei nchumhna latzan sw e khatni nchumhmei khang adow e. 12 Kamik maibwang kumc e, khatni kapy khou guanghpyrun mpeyna run e. Kakhou kazanc hylou bammei tei kamei na hamhna meic gaanv khat na sini thay mak e. 13 Zei luploumei pheychuanh kamei piu e. Kazanc "Ravguangc Lat" twna kaw e. 14 Tingkauh ricmei nunc nthanmei mphwanmei pwan piuna takuanh mphwanmei pang tuangcna kathei lay e. 15 Zaatc guay ta rihngamlou nimei tuang ntukmei baengsaeng kamwang khou rui pat e. Kamei rui zaatc guay ta ntanh builwang rui sin puni. Kumna Ngamparimei Racguangc tuang lungpuam tuang luairyn thai nipui bamv khou kamei rui ni puni. 16 Katuang pheychuanh khou khatni kanaeng khou, "Guangh guay Guangc khatni kaipouc guay Kaipouc," twmei zanc hei hylou e.
17 Mi tangv kauh baanchara akhat neih khou ding bammei ta ai how e. Kumna kamei rui, "Ravguangc tuang khwmkih taektw tu khang guang kaduai tho!" twna tingpuk khou samc bammei nruay guay ta kauc the. 18 "Guangh guay zanc, rihpy guay zanc, rihmei guay zanc, takuanh guay khatni takuanh tuanghmei guay zanc, meic daihmei nthyammei, bangh khatni nyngswmei—meic guay zanc guang tu tho!" twna kauc the.
19 Mi tangv khouringh tei khatni kandih guangc nunc tei kaniw tuang ricmei nunc kazauhna takuanh khou tuangc bammeipu khatni katuang ricmei nunc ta adow khang guang kaduai bammei ta ai how e. 20 Khouringh ta tei khatni kahu khou charynmei taanv mpeyna taanc kanmei guatmei muczwng ta tei nym kan the. (Katuang charynmei taanv guay tei rui khouringh tuang madanhmei maengc tei phunghmei nunc khatni mi khouringc maengc ta kalummei nunc ta tei guat kan the.) Mi khouringc khatni guatmei muczwng ta tei, maipu rui chuangc bammei mai zeiclat khou tei nringh phaiclou kan the. 21 Kaniw tuang ricmei guay ta tei takuanh khou dungc bammeipu mwang khou rui patmei baengsaeng tei rui dowluai ngam kan the, kumna kaniw tuang zanc tei nruay guay rui tu kan the.