¹ Mi tangv tingkauh kathanc khatni kandih kathanc ai how e. Reymei tingkauc khatni reymei kandic tei maek khe; duipui nai dat mak khe. ² Kumna Nthanmei Kaidai, Jerusalem kathanc, kagaanv khang karuhloumei nowpeic kumcna Ravguangc khou rui tingkauh thangc rui keymei ta ai how e. ³ Khoutei guanghbamvpaeng khou rui kauc ranvna mi kumna samei ai chu e: "Zauc lo, ntaw khou rui maansei pang khou Ravguangc kai sw puni the. Kamei kaniw pang khou lungc bam puni the, kumna kaniw kamei nunc sw bam puni the. Ravguangc kamei kahak kaniw lev bam nchamc puni the, kumna kamei kaniw Racguangc sw puni the. ⁴ Ravguangc rui kaniw mikdui roulou puni. Theihmei, zaengsimei, kapmei, suhmei nai dat lak khe. Reynungc tuang guay tei maan ngam kan the."

⁵ Khoutei guanghbamvpaeng khou dungc bammeipu tei rui sa e, "Zauc lo, ai rui ramh guayna kathanc kasiamhlou the!" "Mi hei hylou o, kalam thu mi hei nchumhmei lwmnuhpui lat e," twna akhou sa e. ⁶ Khoutei kamei rui sa e, "Mi guay hei luai the! Ai hei Alpha khatni Omega e—reymei khatni nkhamhmei e. Tarimei guay ta katy kamanv maekna ringhmei duipuakkai khou tizangv puni. ⁷ Rihngam guangmei guay, mi guay hei laa puni, kumna ai kaniw Pu sw puni, kaniw anac nunc sw puni. ⁸ Tiki zammei nunc, lwm makmei nunc, mphuam tanacmei nunc, meicdowmei nunc, lungcmaanv lungcmowmei nunc, duaih raengh sinmei nunc, ravmaengc kalummei nunc, khatni saraemhmei guay khang thu, maipu rui chuangc bammei mai zeic tei the. Mi hei theic kaneimei kiu the."

⁹ Nkhamhmei ntaemhmei chanei lou padikmei kamkuak chanei sinmei kauh baanchara chanei pang khou gaanv khat adaeng khou guangna, "Guang o, Lauziu Nac tuang Nowpeic ta nang khou lyanlou puni," twna sa the. ¹⁰ Bumaengh rui ata zynna, mi kauh baanchara tei rui ata kauhmei chyng but akhat twan khou phungc kulou the. Kumna Nthanmei Kaidai, Jerusalem tei Ravguangc khou rui tingkauh thangc rui keymei ta akhou lyanlou the. ¹¹ Mi tei Ravguangc tuang hymdaihmei rui titah ta e; mi tei kamanv kunghmei tauc kumc e, jaspar tauc kumc e, gunh bangv kumc nthan panglingh ling e. ¹² Mi kaidai raengc tei daic e, kauh e, raenghmun ruhna kanei nai e, kumna kauh baanchara ruhna kanei rui gaek bam e. Raenghmun guay khou tei Israelmei kaikhwang ruhna kanei zanc hylou e. ¹³ Neihpat thangc raenghmun kathumh, dihpy thangc raenghmun kathumh, dihba thangc raenghmun kathumh, neihkey thangc raenghmun kathumh nai e. ¹⁴ Mi kaidai raengc tei kabam tauc ruhna kanei nai e. Mi guay khou tei Lauziu Nac tuang Latdiutatmei nunc zanc hylou e.

¹⁵ Mi kaidai, karaengcmun guay khatni karaengc tei ndat khang, akhou lat sa bammei kauh baanchara tei ramh saanv guanpui tuang kachaekc builwang sin bam e. ¹⁶ Mi kaidai tei kasaeng kadai nchamc e. Kamei rui mi katuang ndatpui builwang tei rui mi kaidai tei ndat the: mi tei mail ching khat phay panguh saengc e, mi zu tei daic e khatni kakau ni mi tei lev nchamc muai e. ¹⁷ Kamei rui raengh tei ni ndat e, kumna kauh baanchara tuang dath tei maansei tuang dath khou chowbuk phay khat riakdeina padeih kauh e.^{h 18} Mi raengc tei jaspar tauc rui sw e, mi kaidai kahak tei nthanmei kachaekc rui sw e, dandik kumc karaeng e. ¹⁹ Mi kaidai raengc tuang kabam tauc guay tei kamanv kunghmei tauc zaatc guayna rui karuh e: reymei rui jaspar, kaneimei rui saphir, kathumhmei rui kalkidoni, padeihmei rui emeral, ²⁰ panguhmei rui sardonik, charukmei rui sardi, chaneimei rui krisolai, tachatmei rui beril, chakiumei rui topaz, ruhmei rui krisoprasu, ruhna akhatmei rui jasin, ruhna kaneimei rui amethist, mi guay hei e. ²¹ Raenghmun ruhna kanei tei mukta ruhna kanei e; raenghmun kathuic tei mukta akhat khat rui sw e. Mi kaidai tuang chaengdai tei nthanmei kachaekc rui sw e, mi tei dandik kumcna how alamv e.

²² Mi kaidai khou tei ravkai how mak e; kalam thu Poubauhmei Ngamparimei Racguangc khatni Lauziu Nac hei mi tuang ravkai kiu rap di the. ²³ Mi kaidai tei tigaanclou khang bw neih kage nai dat mak khe; kalam thu Ravguangc tuang hymdaihmei rui mi khou tei gaanc e, khatni thauhmai kiu Lauziu Nac hei di the. ²⁴ Kandihmei zaatc guay kariw khou tei lungc bam puni, kumna mbaanv guangc guay kaniw tuang lanv mi khou tei phungc guang puni. ²⁵ Mi kaidai tuang raengcmun guay tei neihmaryn mbangh zat mak e; mi khou tei zingbangc maek e. ²⁶ Zaatc guay tuang hymdaihmei khatni lanv mi kaidai khou tei phungc guang puni. ²⁷ Tiki mi khou tei nthan makmei, khatni meic chanymei taanv taanhpui mei khatni saraemhpui mei gaanv khat na sini gut lak e. Lauziu Nac tuang ringhmei latrik khou kazanc naipui mei nunc na tei gut puni.