¹ Mi tangv kangkhunc tuang khamvtaan khatni kangriang daihmei sinna kauh baanchara akhat tingkauh thangc rui keymei ta ai how e. ² Kamei rui reydouc tuang nrui, Ravsic hamh e thei Seitan twna kawmei thaanngangc ta tei nymna kangriang tei rui tingkwm ching khat khang bangclou kan the. ³ Tingkwm ching khat ganv tei luai kan mak saanv, kamei rui zaatc nunc ta guat dat mak khang, kauh baanchara tei rui kata tei kangkhunc khou tei phaiclou kan the. Kumna kaikhamv taanlouna seal swlou kan the. Timgkwm ching khat tangv matak khat khang kata mpat pat dat puni.

⁴ Mi tangv guanghbamvpaeng mpeyna how e. Jisu tuang lat khatni Ravguangc lat dinhmei zaeng rui kaniw py dangv kanmei nunc tuang bumaengc guay ta ni how e. Kaniw tei khouringh ta tei hamh e thei mi khouringc maengc ta tei kalum makmei nunc, khatni kaniw sanpiang khou hamh e thei kaniw baanc khou mi khouringc tuang madanhmei maengc tei hylou makmei nunc e. Kaniw tei ringcthau datna mi guanghbamvpaeng guay khou tei dungc the. Kalam thu guanghtu khang Ravguangc rui kaniw khou ngamv tiilou the. Kumna kaniw tingkwm ching khat Khrista lev guanghtu nchamc the. ⁵ (Mi tingkwm ching khat tei luai mak saanv, theic kanmei baihmei guay tei thu ringcthau mak e.) ⁶ Mi ringcthau dat reymei khou hei kazauhmei nunc tei sangaymei nunc e; kaniw hei Ravguangc tuang e. Theic kaneimei tei rui kaniw ta ngam dat lak khe; kaniw tei Ravguangc khatni Khrista tuang amuc sw puni. Kumna Khrista lev tingkwm ching khat guanghtu puni.

⁷ Tingkwm ching khat tangv, Seitan ta kangkai khou rui mpat pat dat puni. ⁸ Kandih kwn padeih khou lungc bammei zaatc guay, mi kiu, Gog lev Magog ta guat khang kamei pat puni. Rih adow khang Seitan rui kaniw ta duipui syniang zu khuam guang kaduailou the. ⁹ Kaniw kandih kapwm khou patna, nthanmei nunc khatni Ravguangc nzianmei kaidai ta ding bin the. Tiki tingkauh thangc rui mai tii keyna kaniw ta raw the. ¹⁰ Khoutei kaniw ta guatmei Ravsic ta tei maipu rui chuangc bammei maizeic khou phaiclou the. Mi tei khouringh khatni guatmei muczwng ta tei phaiclou kanmei bamv tei e. Mi khou tei kaniw zingbangc kalaanv tingsaengzaeng ryanra khaengv bam puni.

¹¹ Mi tangv, gaanv khat daihmei mphwanmei guanghbamvpaeng akhat khou dungc bammei ta ai how e. Khoutei tingpuk kandih maan kan the, kumna mi tei how dat mak khe. ¹² Khoutei theic kanmei guay, nthyammei ni daihmei ni, meic guayna mi guangc bamvpaeng hu khou tei ding bammei ta ai how e. Latrik buk mpeyna phaek patlou the; baihmei latrik buk, ringhmei latrik buk ni phaek patlou the. Theic kanmei guay ta tei, mi latrik buk guay khou tei kaniw taanv hylou bammei tei zaucna latzan sw the. ¹³ Khoutei duipui rui kakhou naimei theihmei guay ta tii pat the. Theihmei lev taruaih rui ni kakhou kakhou naimei theihmei guay ta tii pat the. Meic guayna ta kataanv kataanv thei layna latzan sw the. ¹⁴ Kumna theihmei lev taruaih ta maizeic khou phaiclou kan the. (Mi maizeic hei theic kaneimei kiu the.) ¹⁵ Ringhmei latrik khou kazanc hylou makmei guay ta tei mi maizeic khou tei phaiclou e.