I lalu Pototowia Hae ara talu pulona hai hahio (39) sura. Lima mbuana sura au nguru-nguruna nauki Musa hai rauli Paturona Musa hai talu pulona hai iba (34) sura au rauki nabi ba tauna ntanina.

Sura ide, rauli Pototowia Wou, lawi ihina mopakanoto podandiNa Pue Ala au wou i manusia. Moula podandiNa, ina Naweike katuwo maroa i hae-haena anti pepoinalainta i Yesu Kerisitu, Datu Topehompo.

Au mouki sura ide, iami surona Pue Yesu au tuwohe rosabu parena au liu. Ihira manusia biasa. Ope-ope suranda rauki i kanoto-notoana bona raisa tauna, agaiana apa au rauki iti, rauki anti peninina Inao Malelaha (peita: 2 Tim. 3:16; 2Ptr. 1:21). Nguru-nguruna rauki i lalu Basa Yunani. Agaiana ide-ide rapalimbami i lalu basa ntanina, nodo Basa Balanda, Basa Anggaresi, Basa Indonesia, hawe-hawe i Basa Pekurehua.

I lalu Pototowia Wou, ara rompulo hai pitu (27) sura. Au mouki sura iti, arahe bahangkia tauna, iamohe Matiu, Markus, Lukasi, Yohane, Paulu, Peturu, Yakobu, hai Yudasi. Suranda iti rauki mepongka pare 45 duuna pare 90.

Iba sura au nguru-nguruna i lalu Pototowia Wou, rauli Ngkora Marasa (Injil). Ngkora Marasa iti mouli kaYesuna Anana Pue Ala au mewali manusia, au mate mohuru dosanta, hai au tuwo hule. Ngkora Marasa au rauki i lalu iba pakana sura mampololita karapoanakana Yesu, paturoNa i topeguruNa hai i tauna bosa, hai pobabehiNa tanda-tanda kuasa. Kahopoana mampololita karahakana Yesu, karapapateNa i wanua Yerusale, katuwoNa hule hai pengkaoreNa lao i suruga.

Sura au nguru-nguruna nauki Matiu, hadua topeguruna Pue Yesu. Sura au kadua, nauki Markus, hadua anantomoane au mamporangai Peturu i polumaona mobambari Ngkora Marasa. Sura au katalu nauki Lukasi, hadua sando au mamporangai Paulu i polumaona hai au mampegurui noumba polumaona katuwona Pue Yesu hangko i topeguruna hai i tauna au mosabiki. Hai sura au kaiba nauki Yohane, hadua hangko i topeguruna Pue Yesu.

Sura kalima i lalu Pototowia Wou, iami Tuntukana Pobagonda Surona Pue Yesu. Au mouki sura ide iami Lukasi. Sura iti mampololita pobagonda Surona Pue Yesu mopahawe Ngkora Marasa, mepongka hangko i wanua Yerusale duuna hawe i wanua Roma.

I lalu Pototowia Wou, ara rompulo hai isa (21) sura au rapakatu. Hangko i ope-ope sura iti:

Sura au kaopeana i Pototowia Wou iami Pampetudungia. Ihina bara himbela hai ihi sura au ntanina. I lalu sura ide, Yohane mouki apa au napetudungia Pue Yesu iria. Ia mopakanoto kamahilena tuwona Pue Yesu hai apa au hangangaa mewali i Alo Pobotusi. Tunggaiana sura iti, mopalindo hai mopakaroho lalunda to Sarani au rapopeahi-ahi anti pepoinalainda i Pue Yesu.

I lalu Pototowia Hae, ara bahangkia hangana Pue Ala au rapake i lalu basa Ibarani. Hangana Pue Ala i lalu basa Ibarani peisa rapopontani i lalu Basa Pekurehua moula rarana mouki.

Pue Yesu hai topeguruNa au nguru-nguruna, ope-opehe to Yahudi. To Yahudi iamohe pemuleana nabi Burahima au maida i tampo Palestina hangkoia. Burahima tuwo kira-kira rosabu parena hangko damani Pue Yesu hawe i dunia. Burahima mopaara Isaki, Isaki mopaara Yako, hai Yako au momuleakahe to Yahudi. Yako rahanga wori Isaraeli (Pew. 32:28), ido hai to Yahudi rauli wori pemuleana Isaraeli ba to Isaraeli. Hambela-hambela ihira rauli wori to Ibarani.

Bahangkia atuna parena kamahaena, to Yahudi mewalihe hawi i tampo Masiri. Roo indo, nabi Musa moantihe mopalehi tampo Masiri, hai naweihe Atura hangko i Pue Ala i Bulu Sinai. I lalu Aturana Pue au napahawe Musa, ara ngkaia pakana parenta hai ada au hangangaa rapeulai to Yahudi. Barahe peisa mobago i Alo Pengkarooangaa (Alo Satu). Barahe peisa moande bau boe hai ngkaia pakana binata ntanina. Anangkoi tobalilo hangangaa ratile i alo kaualuna hangko i pesupaana. I lalu Aturana Pue au napahawe Musa, tepakanotomi ada au hangangaa rapeulai ane menombahe i Pue Ala, hai ada i alo mahile, pandirina Alo Pasa, Posusa Roti au Bara Raragii, Alo Pentakosta, hai Posusa Pobambaru. To Yahudi bara mpuuhe peisa mosambale binata mewali popenombanda i Pue Ala i sounda haduduanda. Ada popenomba iti hangangaa rababehi i Souna Pue Ala i wanua Yerusale.

Kira-kira hasabu parena hangko damani Pue Yesu hawe i dunia, Daudi mewali datunda to Yahudi. Pue Ala modandi i Daudi kaina arana hadua hangko i pemuleana au mewali datu i hae-haena (2Sem. 7:12-16). Ara worihe nabi-nabi hangkoia au mampololita kahawena hadua Datu au mohoremahe to Yahudi. I lalu basanda to Yahudi, Datu iti rauli Datu Topehompo (Masehi). Pue Yesu iami Masehi, Datunda to Yahudi, pemuleana Datu Daudi, au nadandi Pue Ala.

Ope-ope sura, hangko damani kirana kaisa, ara lolita au rauli pepongkaa lolita (pendahuluan). Pepongkaa lolita iti bara rauki surona Pue Yesu. Agaiana lolita iti rauki topopalimba Ngkorana Pue i lalu Basa Pekurehua bona manoto irikita apa patoa ihina ope-ope sura.

I woi pepongkaa lolita, ara au teuki kana i ope-ope gaa-gaana ihi sura. Tunggaia ihi sura iti rauki bona topobasa moisa pombeusuna sura mepongka hangko i kirana isa hawe kahopoana.

Waa lolita iti mopakanoto ihina ope-ope gaa-gaana sura. Pandirina, i Mat. 1:1, ara pongka lolita au teuki node: Pemuleanda toioruna Yesu. I Mat. 1:18 ara pongka lolita au teuki node: Tuntukana karapoanakana Yesu. Pongka lolita iti bara rauki surona Pue Yesu, agaiana ratambai bona mopakanotoake apa ihi wati au ara i woi waa lolita iti.

Ane tabasa sura ide, hambela-hambela talambi uki au manete i woi sura hai au bara rauki i watina. Uki iti i basa Indonesia rauli “catatan kaki”. Tunggaiana, mopakanoto lolita kana i hambua wati au ara i wongko. Pandirina, i Mat. 3:4 tabasa: “Hampina Yohane rababehi hangko i wulu onta. Pampouna hangko i koli.” I kahopoana iti, ara tanda hurupu ane tapeita i woi ntepuu, ina ara tanda iti, hai hambua lolita au mouli:

Tunggaia uki ide, bona taisa: hampina Yohane Toperiu mopakanoto iami au nodo nabi Elia hangkoia.

I taleu sura ide, ara kamus. I lalu kamus iti, teuki lempona lolita-lolita hai hanga-hanga au paka rakabelai i lalu Ngkorana Pue. Ane hampaka lolita, ba hanga au bara manoto irikita ba au tapowuli mani, peisa tapeita hai tabasa lempona i kamus. Pandirina ToParisi, owai Yarade ba Alo Posusa Pasa.

Ane tabasa sura ide, hambela-hambela talambi lolita au ara i lalu tanda au node: [ ]. Pandirina i Mrk. 15:28. Wati iti rawoli i lalu tanda au node: [ ] lawi bara taisa ba Markus mpuu au mouki ba lolita au ratambaika.

I lalu Basa Pekurehua bara ara hurupu c, f, q, v, x, y hai z. Nauri nodo, hurupu f hai y rapake i lalu hanga tauna hai hanga tampo moula basa Ibarani hai Yunani, pandirina: Feliks, Filadelfia, Yesu, Yerusale. Agaiana hanga tauna hai tampo au aminami rauki hai hurupu p batena rauki hai hurupu p, pandirina: toParisi, Epesu hai Pilipi. Hanga tauna hai tampo au rauki hai hurupu z moula basa Ibarani hai Yunani, rauki hai hurupu s, pandirina: Sakeu hai Soar. Agaiana ara hanga hambua paidaa au hangangaa rauki hai hurupu z lawi tampo iti ntanina hangko i tampo au rauki hai s nodo: “Pada Wungi Sin” hai “Pada Wungi Zin” au ara i peta.

Hanga to hangamba rauki hai spasi i olona “to” hai hanga ngamba, pandirina: “to Yahudi”, “to Ibarani”, hai “to Feris”. Agaiana hanga tauna hakolompo bara mopake spasi, pandirina: “toParisi” hai “toSaduki”.