Meja pohuwea popenomba
27
1 Hangangaa nubabehi haogu meja hangko i kau akasia au kangkalangana romete hai rompulo senti, nodo wori kapekana. Kapangkana hamete hai talu pulona senti. 2 I wongko hunona au iba, hangangaa nupopotandu, hai meja pohuwea popenomba iti nulapisi tambaga. 3 Nubabehi wori kawalina au rapambolii awuna, suluna, mangkona, kangkana hai popatuwoa api. Hinangka parewa iti hangangaa nubabehi hangko i tambaga. 4 Nubabehi salada hangko i tambaga, hai hunona au iba nupopatakai kala tambaga. 5 Salada tambaga iti hangangaa nutoe i lalu, kapangkana laentanga biti meja pohuwea popenomba iti. 6 Nubabehi popekowana rongkau hangko i kau akasia, hai nulapisi tambaga. 7 Popekowana iti hangangaa rapopesua i kala tambaga au i tumpipina pontimali ane meja pohuwea popenomba iti ina rakowami. 8 Meja pohuwea popenomba iti nupopohuno iba hai nupopokasoa i tangana moula au Kutudungiamoko i wowo bulu Sinai ide.”Tabangaa bambaruna Pue
9 “Nubabehi tabangaa bambaruKu au rawala hai bana lena maalusu hai makumba. Ntanda i Lau iba pulona hai iba mete kangkalangana. 10 Bana lena iti hangangaa ratoe i arii rompulo kauna au rababehi hangko i tambaga. Arii iti hangkau-hangkau rapopeangka i popabusaana au hangko i tambaga. Popekaina hai popoumpuna rababehi hangko i salaka.
11 Ntanda i Raa hangangaa nodo wori kanubabehina.
12 Ntanda i Katampua alo, bana lena iti hangangaa rompulo hai romete kangkalangana. Bana iti ratoe i arii au hampulo kauna hai rapopeangka i hampulo popabusaa. 13 Ntanda i lindo tabangaa iti, iami ntanda i Mata alo kapekana hangangaa rompulo hai romete wori. 14 Ntanda i kabeo babaka tabangaa iti, kangkalangana banana ini mete hai ini pulona senti, nubabehi ariina talu mbuana hai popabusaana talu wori mbuana. 15 Ntanda i koana babaka iti, nodo wori kanubabehina. 16 Bana babaka tabangaa iti, kangkalangana hangangaa hahio mete au hangko i bana lena maalusu hai makumba, au ratanu hangko i lero malewau, malentoro hai malei hai rasuji kerub. Bana iti ratoe i arii au iba kauna au rapopeangka i popabusaana.
17 Ope-ope arii au mantoleli tabangaa bambaru iti, hangangaa raumpu hai salaka. Nodo wori popekaina, hangangaa rababehi hangko i salaka hai popabusaana hangko i tambaga. 18 Wala tabangaa iti, kangkalangana iba pulona hai iba mete, kapekana rompulo hai romete, kapangkana romete hai rompulo senti. Bana au napowala, hangangaa hangko i bana lena maalusu hai makumba, hai popabusaana hangangaa rababehi hangko i tambaga. 19 Bahangkia pakana parewa i lalu Bambaru Malelaha, pato Bambaru Malelaha hai pato wala tabangaana, hangangaa rababehi hangko i tambaga.”
Rara mokadipura hulo
20 “To Isaraeli hangangaa nupohawaahe moanti lana saitun tepamaroa au rapopoihii hulo i lalu bambaruKu bona peisa rahuwe hai tuwo liliu. 21 I lalu Bambaru Malelaha i lindo rindi bana au morero peti podandi, hulo iti hangangaa nakadipura liliu Haruni hai ananahe mepongka kalumba hawe madondo i lindona Pue. Itimi atura au hangangaa rapeulai hai rababehi to Isaraeli hawe i pemuleanda i hae-haena.”