Waru tadulako mpenomba
28
1 “Hangangaa nukakio Haruni wutumu hai ananahe, iami Nadab, Abihu, Eleasar hai Itamar, nupatanihe mewali tadulako mpenomba bona mobagohe Iriko. 2 Hangangaa nubabehia Haruni waru tadulako mpenomba au merae bona meawa raita. 3 Nukakiohe ope-ope topandau au Kukiraimohe kamapande, hai nutuduhe mobabehi waruna Haruni bona tepatoka mewali tadulako mpenomba au mobago Iriko. 4 Waru au rababehi iti iami popetabungi ponda, efoda, juba, badu au rasuji, siga hai pampou. Hangangaa rababehiahe Haruni ntaliana waru tadulako mpenomba bona rapobadu mobago Iriko mewali tadulako mpenomba. 5 Waru iti hangangaa rababehi hangko i bana lena maalusu, lero malewau, malentoro, malei hai lero bulawa.Badu efod
6 Badu efod iti rababehi hangko i bana lena maalusu au makumba, hai rasula makara-kara hangko lero malewau, malentoro, malei hai lero bulawa. 7 Badu efod iti ratoe i owanga badu hai barara au rapataka pontimali. 8 Pampouna hangangaa nubabehi mentaka amimi i badu efod. Banana himbela hai badu efod. 9 Nuala wori watu paramata delima rombua nupoukii hanganda anana Yako au hampulo hai rodua. 10 Haogu-haogu watu paramata iti nupoukii ini hanga moula pombeusuna pesupanda. 11 Nuuki hanganda anana Yako i roogu watu iti, nodo uki i pene au rababehi tauna matumpali, hai watu iti hangangaa ratalawiwingi bulawa. 12 Roo nodo, paramata au roogu iti rapataka i pontimali owanga badu efod, mewali hambua pepopainga bona mokatuinao to Isaraeli. Paramata iti tepataka liliu i baduna Haruni i tempona lao mampohidupaa Pue. 13 Hangangaa nubabehi petaka hangko i bulawa, 14 hai nubabehi koloro hangko bulawa ntepuu au nupataka i petaka iti.”
Petabungi ponda tadulako mpenomba
15 Hangangaa nubabehia tadulako mpenomba popetabungi ponda au napake i tempona mampeinao moisa tunggaiana Pue Ala. Popetabungi ponda iti rababehi hangko i bana lena maalusu au makumba, hai rasula lero malewau, malentoro, malei, hai lero bulawa. 16 Hangangaa nupopohuno iba, ralupi rombua. Kapekana hai kangkalangana rompulo hai rosenti. 17 Nupopatakai watu paramata iba terena. I baresi kaisa watu delima, topas hai baiduri sepah. 18 I baresi kadua, watu samrud, watu nilam hai inta. 19 I baresi katalu, watu lasuardi, ake hai watu kecubung. 20 I baresi kaiba, watu pirus, yakut hai watu ratna cempaka. Haogu-haogu watu paramata au hampulo hai roogu iti hangangaa nutalawiwingi hai bulawa. 21 I ogu-oguna watu, hangangaa rapoukii hangana hadua anana Yako au mosarungkoroi hampulo hai rontina to Isaraeli. 22 Petabungi ponda iti hangangaa nubabehia rombua koloro hangko i bulawa ntepuu napobarara, 23 hai nubabehi wori rombua kala hangko i bulawa hai nupataka i huno petabungi ponda pontimali, ntanda i wongko. 24 Rombua koloro bulawa inona nupopesua i roogu kala bulawa au ara i huno petabungi ponda pontimali. 25 Barara petabungi ponda au pontimali raumpu wuntuna hai barara au ara i owanga badu efod ntanda i lindo. 26 Nubabehi mbuli roogu kala bulawa hai nupataka i pontimali hunona au i woi ntanda i lalu au mombelindo i badu efod. 27 Roo nodo, nubabehi mbuli roogu kala bulawa hai nupataka i lindo badu efod hungku i pampou ntanda i wongko. 28 Mewali kala bulawa au mentaka i petabungi ponda hangangaa nupopopembedai hai kala bulawa au mentaka i badu efod. Nupataka hai kariri malewau bona petabungi ponda iti bara tegesu-gesu hangko i wongko petaka peko. 29 Nodomi Haruni moanti hanganda to Isaraeli au ara i petabungi ponda i wongko hulena ane mesua i lalu Hologa Malelaha bona mewali pepopainga i Pue. 30 I lalu petabungi ponda nuwoli urim hai tumimb bona naanti Haruni i wongko hulena ane lao mampohidupaa Pue. Nodomi Haruni masilolonga liliu moisa peundeana Pue i to Isaraeli.
Waru hantauna au rapake tadulako mpenomba
31 Karolapina badu efod, hangangaa nubabehi badu au bara motaie hangko i bana malewau. 32 Mantoleli tambolo badu iti hangangaa nupitai bona maroho. 33-34 Mantoleli wuntu badu iti ntanda i woina nupotoengi rombo-rombo au nodo wua delima au rababehi hangko i lero malewau, malentoro hai malei au nupopombeolo-olo hai ngkiri-ngkiri bulawa. 35 Ane hawe tempona Haruni mesua i Hologa Malelaha i lindona Pue Ala, badu iti hangangaa napake bona pomonina rahadi, nodo wori ane mesuwu, dati mate.
36 Nubabehi bunga-bunga hangko i bulawa ntepuu, au nupoukii node: tepatokami i Pue. 37 Nubararai malewau bona peisa nupataka i siga ntanda i lindo. 38 Bunga-bunga bulawa iti hangangaa ara liliu i wingkena Haruni tanda pampendaleungaana to Isaraeli ane masalahe i pohuhunda popenomba bona Iko, Pue, mampokana ope-ope popenombanda.
39 Nubabehia wori Haruni badu ngkalanga bona napake ntanda i lalu au ratanu hangko i bana lena maalusu, nodo wori siga hai pampouna. Pampou iti hangangaa nusula. 40 Nubabehia worihe anana Haruni badu ngkalanga, pampou hai taliabo au makara bona meawahe raita. 41 Mewali hinangkana iti nubaduiaa Haruni, wutumu, hai ananahe. Nutidorohi waanda hai lana saitun, nutawihe hai nupatokaahe bona peisahe mobago mewali tadulako mpenomba i lindona Pue.
42 Nubabehiahe puruka sosoe hangko i bana lena au kangkalangana hampa i kuntu. 43 Puruka iti hangangaa rapake Haruni hai anana i temponda mesua i lalu Bambaru Pohidupaa ba laohe i meja pohuwea popenomba i paidaa malelaha iti mampopolumao bagonda bona datihe mopaara kamasala i watanda haduduanda alanda mate. Mewali itimi atura i Haruni hai i pemuleana hawe i hae-haena.