4 Roo indo, nuantihe mai Haruni hampoanaka i baba bambaruKu hai nudoihe. 5 Roo nodo, nuala badu tadulako mpenomba hai nubaduiaa Haruni. Badu tadulako mpenomba iti, iami: badu ngkalanga, badu bara motaie hangko i bana malewau, efod, petabungi ponda hai pampouna. 6 Nusigai, hai i siga iti nupataka bunga-bunga bulawa au rapoukii: tepatokami i Pue. 7 Roo indo, nuala lana popetawi nutidorohia waana, nodomi kanutawina Haruni. 8 Nukakio worihe anana Haruni hai nubaduihe, 9 nupampoungihe hai nusigai worihe. Nodomi aturana motawi Haruni hai ananahe, lawi ihirami hai pemuleanda au mewali tadulako mpenomba hawe i hae-haena.

10 Roo indo, nuala hai nuanti hambaa japi laki au tepasilolongami i lindo bambaruKu. Haruni hai ananahe hangangaa mopagahe waa japi laki iti, 11 hai japi laki iti nusambale i lindoKu i lindo baba Bambaru Malelaha. 12 Nuala hanggaa wahena nupariha i tandu-tandu meja pohuwea popenomba, hai hanggaa nubumbuha ope-ope i woi meja pohuwea popenomba. 13 Roo indo, taba au mobungkuhi ihi laluna, atena au maroa, wuana roogu-roogu hai hinangka taba au mentaka indo, nuhuwe i wongko meja pohuwea popenomba. 14 Agaiana onto japi laki iti, kolina hai taina hangangaa nuhuwehe i raoa pobambaruanda to Isaraeli. Itimi au mewali popenomba popoampungi dosanda tadulako mpenomba.

15 Hangko indo, nuala hambaa hangko i dimba laki au tepasilolongami. Hai waana rapaga Haruni hampoanaka. 16 Hai ana dimba laki iti nusambale, hai wahena nuhimpea mantoleli meja pohuwea popenomba. 17 Dimba laki iti nuhapa, nuhui taina hai bitina nubahoi. Roo nodo, nuwoli i wongko waana, watana hai ngaana. 18 Hangko indo, nuhuwehe ope-ope i wongko meja pohuwea popenomba; itimi popenomba rahuwe, hai engana mopamatana laluNgku.

19 Nuala mbulimi dimba laki au hambaana, hai waana rapaga mbuli Haruni hampoanaka. 20 Dimba laki iti nusambale, nuala haodi wahena nupariha i tawe talinga koananda Haruni hampoanaka, i katumpu taie hai biti koananda. Hanggaa wahe iti nubumbuha mantoleli meja pohuwea popenomba. 21 Nuala haodi wahe au nubumbuha i meja pohuwea popenomba hai nugalo haodi lana. Nuhimpea Haruni hai waruna, nodo wori i ananahe hai warunda. Nodomi rarana Haruni hampoanaka hai warunda tepatokamohe Iriko.

22 Dimba laki iti hangangaa nuala tabana, ikuna au marombu, taba au mobungkuhi ihi laluna, atena au maroa, wuana roogu-roogu hai taba au mentaka i wuana hai paa koanana, lawi dimba laki itimi au mewali popenomba potawi. 23 Hangko i bingka pambolia roti au rapopenombami Iriko, nuala haogu-haogu hangko i talu pakana roti au bara raragii iami: roti au bara rababehi hai lana, roti au rababehi hai lana hai roti manipi au rarirohi hai lana. 24 Ope-ope iti hangangaa nuweihe Haruni hai ananana bona ratindora i lindoKu, mewali popenomba Iriko. 25 Roo nodo, nuala hule hangko i taienda hai nuhuwe i meja pohuwea popenomba i wongko popenomba rahuwe. Enga popenomba iti mopamatana laluNgku.

26 Roo nodo, nuala tibuna dimba laki iti nutindora i lindoKu, mewali popenomba Iriko hai itimi kiramu. 27 I lalu potawi tadulako mpenomba, tibuna hai paa dimba laki au ratindora mewali popenomba Iriko, itimi au mewali kiranda tadulako mpenomba. 28 Nodo wori ane mohuhuhe popenomba podame, tibuna hai paa binata au rapopenomba, itimi popenombanda taunaNgku Iriko hai itimi kiranda tadulako mpenomba. Ope-ope iti Kubotusimi hai barapi ina tebaliki.

29 Waru malelahana Haruni hangangaa rapososora anana hawe i pemuleana au mopahuru Haruni bona napake i karatawina mewali Tadulako Mpenomba Mahile. 30 I lalu pitu alona i karatawina, waru iti hangangaa napowaru liliu ane lao i Bambaru Pohidupaa mampopolumao bago mpenomba Iriko i lalu Hologa Malelaha.

31 Nuala dimba laki au rapopenomba i potawinda Haruni hai ananahe bona ontona nunahuki i hambua paidaa au rapatokami. 32 Onto dimba laki iti hai pentaraa roti au i bingka hangangaa raande Haruni hai ananahe i lindo baba Bambaru Malelaha. 33 Hinangka paande au rahuhu mewali popenomba popoampungi dosa i karatawinda hangangaa raande Haruni hampoanaka, agaiana tauna bosa bara peisa moande, lawi popenomba iti tepatokami Iriko. 34 Ane onto dimba hai roti iti mentara hawe madondo, hangangaa rahuwe ope-ope, lawi popenomba iti iami popenomba au tepatokami.

35 Mewali kanutawina Haruni hai ananahe hangangaa nubabehi i lalu pitu alona kamahaena nodo au Kuhawaamoko. 36 Alo-alona hangangaa rahuhu hambaa japi laki au mewali popenomba popoampungi dosa au mopaara podame. Meja pohuwea popenomba iti, hangangaa nupamalelaha hai nulanai lana saitun bona rapatokangiamoNa. 37 Popamalelaha meja pohuwea popenomba iti hangangaa nubabehi i lalu pitu alona kamahaena bona malelaha ntepuu. Apa pea au moiho meja pohuwea popenomba iti, ina malelaha.”

38 Mongkora mbuli Pue i Musa, nauli, “Idemi au hangangaa nubabehi i wongko meja pohuwea popenomba iti: alo-alona nupopenomba rombaa dimba au hampare tinuwuna, 39 au hambaa nupopenomba madondo hai hambaa nupopenomba kalumba. 40 Hihimbela hai ana dimba laki au nupopenomba madondo, hangangaa nupopenomba wori hakilo tapu au maroa ntepuu au nugalo hai habotolo hantanga lana saitun hai nubumbuhi habotolo hantanga anggoro. 41 Dimba au hambaana hangangaa nupopenomba kalumba hihimbela hai tapu au maroa ntepuu au nugalo hai habotolo hantanga lana saitun hai nubumbuhi habotolo hantanga anggoro. Enga popenomba rahuwe iti mopamatana laluNgku. 42 Popenomba rahuwe iti hangangaa nipopenomba liliu i lindona Pue i baba Bambaru Malelaha. Inditimi ina mohidupaNa hai taunaNgku hai mongkoraNa irio. 43 Inditi ina mohidupaNa hai to Isaraeli, hai paidaa iti ina malelaha anti peawaNgku. 44 Mewali Bambaru Pohidupaa iti hai meja pohuwea popenomba ina Kupamalelaha. Nodo wori Haruni hai ananahe ina Kupatokamohe bona mewalihe tadulako mpenomba Iriko. 45 Ina maidaNa i olonda to Isaraeli hai mewaliNa Pue Ala au rapenombai. 46 Mewali ina raisa, Ikomi Pue, Pue Ala au rapenombai au moninihe mesuwu hangko i tampo Masiri bona maidaNa i olonda. Ikomi Pue, Pue Ala au rapenombai.”