Pekakae merapi tulungi
Hangko i Daudi
35
1 O Pue, arohahe taunaau moewana,
pombealaamide tauna
au mampombealaana.
2 Kingkimide laba;
meangkamoKo motulungina.
3 Nuala piho hai tawala,
moewahe ope-ope au mowulaina;
Nuuli iriko kaOionami Topehoremangku.
4 Pogiangaahe tauna
au ina mopapatena ranangi hai rapakaea.
Pogiangaahe mousuli ngkasara
ope-ope tauna au motunggaihe kamarugiangku.
5 Pogiangaahe nahumbanga malaekana Pue,
nodohe kungku au nahimbaroka himburu.
6 Ihira nawulaihe malaekana Pue,
i rara au makaindi hai maleluru.
7 Lawi bara ara pongkana
mohaokihe kamanawongku,
hai bara ara pongkana mokaehe kalolu
bona rapakalana.
8 Pogiangaahe narumpa ngkasara kapari;
palikangaahe kana hea au rataa haduduanda,
hai manawohe i tilobunda alanda mate.
9 Agaiana iko matana-tanana anti kamaroana Pue;
matana lalungku lawi Nahoremana.
10 I suka kabulana lalungku mololitana, kuuli,
“O Pue, bara ara kahimbelaMu,
Oiomi au mamperurui tauna au malede hangko i tauna au maroho.
Nukabahahe tauna au mantodiha
hangko i taienda tauna au mampopeahi-ahihe.”
11 Bosa sabi au kadake
hintuwuhe moewana;
apa au raraiana iti bara kuisa.
12 Kamaroangku rahurungi hai dake,
nakamumumona pekiringku au malulu.
13 Agaiana iko, i temponda mahai,
masusa lalungku, mopuasana
hai motumpana mekakae i Pue.
14 Kupekakaeahe nodo halalungku
hai himadangku au makei,
kuteriahihe nodo pandawiku
i kapatena wata inangku.
15 Agaiana i tempoku molambi kapari,
matanahe hai mogulu-guluhe moewana;
nodohe tauna au bara kukaisanga,
rakakabosai liliuna.
16 Hai babehianda au kadake,
mepopowoo-woo liliuhe,
hai ane ratotokina,
rapopalanga peamona.
17 O Pue, hangkia mani kamahaena,
Nukamata peana?
Peruruina hangko i pebungkanda iwalingku;
Nukabaha watangku hangko i singa-singa au mangura.
18 Ina mampolingana nani katana lalu Irio
i olonda taunaMu au bosa,
hai hangaMu kutoia i poteruhuanda tauna au bosa.
19 Ineena Nupogiangaa rapopowadi-wadi tauna
au bara ara pongkana.
Ineena Nupogiangaa,
rakakambilo mbero tauna au mokahihina.
20 Lawi pololitanda makasara,
motangara laluhe peakalangi
i tauna au maroho pohintuwunda.
21 Rangangangaina, rauli,
“Ee, kiita matami babehiamu.”
22 Agaiana Oio Pue, Nuitami.
IneeKo mandii-ndii,
hai ineeKo karao hangko iriko.
23 Pue, mearoKo
hai Nuperuruina i kara-karangku;
Pue Ala au kupenombai,
tulungi wongkoia.
24 Nupatongawa notongku hintoto hai kamanotoMu,
bona datihe mampokatana kamaparingku.
25 Inee nauli lalunda,
“Tepabukeimi tunggaianta
lawi kiame tuwo-tuwomi.”
26 Tauna au mampokatana kamaparingku,
Nupalikangaahe wuli hai maea.
Tauna au mampemahile iriko;
Nupogiangaahe rapapakoi hai rapakaea.
27 Pogiangaahe mogee-gee matana-tana
tauna au mampeinao moita karapatongawana notongku.
Ina rauli liliu, “Tou, meawa mpuu Pue!
Naunde mohorema tuduaNa.”
28 Mewali, ina mobambarina kamanotoMu;
maroa kaindi ba mabaa, ina kutoia liliu hangaMu.