Pekadipurana Pue Ala
34
1 Idemi nanina Daudi i tempona mengkamagila i lindona Abimele, alana rawura hai padu.
2 Bara nailiki tempo, motoiana Pue,
hai barana mengkangkaroo motoia Pue.
3 Ina matana-tanana anti kamaroana Pue;
kuperapi kamaroana Pue iti rahadi wori tauna au mapari katuwonda hai matanahe.
4 Hihimbelake mampomahile Pue,
hai mopatolele hangaNa!
5 Mekakaena i Pue hai Nahanaimona,
hai Nakabahana hangko i kalangangku.
6 Tauna au meharunga Iria batena ina matana,
barapi ara au ina rapokaea.
7 Tauna au mapari katuwona meraroa, Nahanai Pue,
hai Nahorema hangko i hinangka kamaparina.
8 Malaekana Pue motolelikihe ope-ope tauna au mengkoru Iria,
hai nakabahahe hangko i kapari.
9 Nupeminami haduduamu noumba kamaroana Pue;
morasimi tauna au meonga Iria.
10 Ikamu taunana Pue au malelaha, hangangaa mobilakau Pue,
lawi tauna au mengkoru Iria bara ara kamakuranda.
11 Singa mantodihahe rimi
lawi makura paandenda,
agaiana tauna au mohaoki Pue,
hinangka au maroa bara ara au makura irihira.
12 Maikau anangkoi, nipehadingina,
ina kupaturokau mengkoru i Pue.
13 Niunde pae ngkalanga tinuwumi
hai mampemina au maroa?
14 Ane nodo, ineekau mampololita au kadake,
hai ineekau mohowara lolita au mepakanawo.
15 Nikaraohi au kadake, hai nibabehi au maroa;
Nihaoki pohintuwu i sukana rohomi.
16 Pue mokamata tauna au manoto,
hai Napehadingihe au merapi tulungi.
17 Pue moewa tauna au mobabehi dake,
datipohe rakatuinao i wongko dunia.
18 Ane tauna au manoto meraroa, napehadingihe Pue,
hai Nakabahahe hangko i kamaparinda.
19 Pue hungku i tauna au malede lalunda,
hai Nahoremahe tauna au mapari pekirinda.
20 Tauna au manoto narumpahe mampopengaa kapari,
agaiana hangko i hinangkana iti nakabahahe Pue.
21 Watana batena Nakampai Pue,
hai buuna bara huba hambua au matepo.
22 Tauna au kadake ina mate
anti potengkona babehiana,
hai hema au mokahihi tauna manoto,
ina molambi pehuku.
23 Pue mohoremahe tuduaNa hai ope-ope tauna
au meharunga Iria bara ina mohalea pehuku.