Pue Ala iami Topebotusi au manoto
75
1 Idemi nanina Asaf au napahawe i tadulako toponani hai au raponani moula nani “Inee mepatuna.”
2 O Pue Ala, menombangkai hai moorengkai petoia Irio;
tauna mampomahilehe hangaMu,
mobambarihe hinangka bagoMu au mewulii.
3 Nauli Pue Ala, “I tempo au Kupakanoto,
Iko haduduangku ina mebotusi i kanoto-notoana.
4 Ane tampo hai hinangka ihina moenggo,
Ikomi au ina mopakaroho hinangka ariina.”
5 MololitaNa i tauna au mampomahile watanda, “Ineekau mampemahile.”
Hai i tauna au kadake Kukambaroahe, “Ineekau mantintindora,
6 ineekau mampemahile
hai inee mapangka polololitami.”
7 Lawi bara ara hadua tauna i dunia ide au peisa mobotusi
i kanoto-notoana, maroa au hangko i Mata alo, maroa au hangko i Katampua alo
ba au hangko i pada wungi,
8 Batenami Pue Ala au mobotusi tauna;
Ia mopaiwoi hadua hai mopaiwongko au ntanina.
9 Lawi karumpuna Pue, nodo hambua pialaa i taieNa
au moihi anggoro mangilu.
Ane nabumbuha, batena raenu ope-ope tauna
au kadake i dunia hawe ope.
10 Agaiana ina mampomahile liliuna Pue Ala
au napenombai Yako; ina kuore wamba petoia Iria hawe i hae-haena.
11 Ope-ope rohonda tauna au kadake Napamatala.
Agaiana tauna au manoto Narohongi liliu.