Pue Ala topobotusi humalele tauna
76
1 Idemi nanina Asaf au napahawe i tadulako toponani au raponani hai kecapi.
2 Pue Ala tebambari i tampo Yehuda,
hangaNa tolele i tampo Isaraeli!
3 I Yerusale arami souNa,
paidaaNa i bulu Sion.
4 Indorami pana au mengkila Natepo,
nodo wori laba, piho hai parewa pombeala.
5 Merae mpuuKo, peawaMu melumbu
hangko i hinangka bulu au hangkongkoiana.
6 Iwalingki au pebai ralalahimohe;
leta mposomohe hai barapohe mearo,
hai ope-ope tokeate, matalami rohonda.
7 O Pue Ala au napenombai Yako,
anti pekambaroaMu,
dara hai au mampodara ope inaonda.
8 O Pue Ala,
rumihi mpuu karapokalangaMu.
Ane rumpuKo,
hema pae au nabuku meangka i lindoMu?
9 Hangko i langi Nupatongawa kabotuaMu;
tauna i dunia langa hai mandii-ndii.
10 I tempoMu meparesa,
mohoremaKo tauna au mantodiha i dunia.
11 Tauna au mamu lalunda
ina motoiahe hangaMu
tauna au mentara hangko i karumpuMu
ina mentakahe Irio.
12 Modandimokau i Pue, Pue Ala au tapenombai hai nipabukei dandimi!
Kuharunga ope-ope tauna au maida hungku irikamu
ina moanti worihe popenombanda Iria au rapokalanga.
13 Iami au motepo rohonda ope-ope tadulako;
Iami au rapokalanga ope-ope datu i dunia.