Pue Ala, Datu au malelaha
99
1 Pue iami Datu,mewali rapokalanga humalele tauna.
PohudaaNa mapangka hangko i pohudaanda kerub;
ido hai moenggomi dunia.
2 Pue iti, makuasa i Sion;
peawaNa moliungi humalele tauna i dunia.
3 Pogiangaahe motoia hangaMu au mahile hai meawa;
Oiomi au malelaha!
4 Datu au maroho au mampokatana kahintimba,
Oiomi au mopatogo kamanoto;
i olonda pemuleana Yako, Nupopolumao atura hai kahintimba.
5 Pakahile Pue, Pue Ala au tapenombai,
hai motumpake menomba i lindo kadera kadatuaNa;
Ia malelaha.
6 Musa hai Haruni tepesuahe tadulako mpenomba i Pue,
hai Samueli iami hadua au mekakae Iria.
Meraroahe i Pue hai Nahanaihe.
7 Hangko i lalu lai gawu Pue mololita irihira
mekingkimohe i hinangka hawaNa
hai i atura au Naweihe.
8 O Pue, Pue Ala au kipenombai, Nuhanaimohe taunaMu.
Oiomi Pue Ala au moampungihe,
agaiana Nuhurungi hinangka babehianda.
9 Pomahile Pue, Pue Ala au tapenombai;
motumpake menomba Iria i bulu au malelahaa,
lawi malelahami Pue, Pue Ala au tapenombai.