Podandina hadua datu
101
1 Idemi nanina Daudi.
O Pue, ina mampolingana ahiMu au bara mokahopoa hai kahintimbaMu;
ina monanina Irio.
2 Ina mokingkina katuwo au bara kedai:
impiraKo mai iriko?
Ina tuwona i kabulana lalungku
i lalu soungku.
3 Barana mau moita apa au kadake;
kukahihi babehianda tauna au mopalehi Pue Ala,
barahe ina kupohintuwua.
4 Lalu au mobengko ina kukaraohi,
au kadake bara ina kubabehi.
5 Tauna au mopakadake ngkandii-ndii himadana
ina kupatunahe.
Tauna au mampemahile hai mengkaiwongko,
barahe kuunde.
6 Tauna au madudu i Pue Ala
peisahe maida hihimbela hai iko,
tauna au malelaha tuwonda
peisahe mobago iriko.
7 Tauna au meakalangi,
barahe ina maida i lalu soungku;
tauna au modongko
barahe ina kupogiangaa i lindoku.
8 Alo-alona ina kuropuihe
ope-ope tauna kadake i tampo ide.
Ina kupatunahe hangko i wanuana Pue
ope-ope tauna au mobabehi dake.