Pekakae i lalu kapari
102
1 Idemi pekakaena hadua tauna au mapari. I tempona malede, mobumbuha peraroana i Pue.
2 Pue, pehadingi wongkoia pekakaengku,
hai pogiangaa wongkoia peraroangku hawe Irio.
3 Inee wongkoia Nupentabungia
i tempoku mapari.
Pehadingina i peraroangku
hai polo nuhanaina!
4 Katuwongku matala nodo rambu
ope-ope watangku mapana nodo api.
5 Mapari lalungku nodo hehi au malau
ido hai barapi naita inaongku maande.
6 Anti peraroangku au rumihi,
watangku buu pearai nabungkuhi koli.
7 Nodomona kaloa i pada wungi,
nodona totohi i paidaa boa.
8 Barana peisa leta,
nodona tadasi au hambaa-mbaana i atu sou.
9 Hahangaloana rakakabosai iwalingku,
tauna au mampopowadi-wadina
mosumpamohe mokabelai hangangku.
10 Kuandemi awu nodo roti;
owai matangku mogalomi hai paenungku.
11 Anti karumpuMu hai kamamuMu,
Nuangkana hai Nutendemona.
12 Katuwongku nodo pea bao-bao
matanta ane kalumbami; hai malauna nodo hehi.
13 Agaiana Pue, Oiomi Datu i hae-haena,
hai hangaMu rakatuinao hawe i pemuleangku.
14 Ina mearoKo hai mopatongawaKo ahiMu i Sion,
lawi temponami Nupokaahi.
Idemi tempona.
15 Lawi tuduaMu mokatiwaihe Sion,
nauri maorumi watuna.
Maahihe iria, kehapiri mewalimi awu.
16 Humalele tauna langahe i hangana Pue,
hai ope-ope datu i dunia mobila hai moadai peawaNa,
17 ane Pue moaro hulemi Sion,
hai mopatongawa wataNa i lalu peawaNa;
18 hai Nahailemi pekakaenda taunaNa au mantodiha pari,
hai bara moae peraroanda.
19 Pogiangaa ope-ope ide raukiahe pemuleanda
hai humalele tauna au ina mehurungahe hangalo
ina motoia worihe Pue.
20 Pue mepetiro mai hangko i paidaaNa au mapangka hai malelaha;
hangko i suruga Pue mokamata dunia,
21 bona mampehadingi peraroanda tauna au ratarunggu
hai mokabahahe tauna au ina rahuku mate,
22 alana hangana Pue rabambari i Sion,
hai rapolinga i Yerusale
23 i kateruhunda humalele tauna
hai ope-ope kadatua au hintuwuhe menomba i Pue.
24 Pue molehoki kamarohongku i tanga rara,
hai mopasosoe tinuwungku.
25 Mololitana, kuuli, “O Pue Ala au kupenombai,
inee Nuala inaongku i laentangana tuwongku.”
O Pue, tuwoKo i hae-haena.
26 Hangkoia Nuhuami arii dunia,
langi Nubabehimi hai taieMu.
27 Ope-ope iti ina tuna, agaiana batenaKo ara liliu;
ope-ope iti ina maluso nodo hampi,
Nutendehe nodo badu au hae alanda tuna.
28 Agaiana Oio mia-mia peaKo,
katuwoMu bara ina mokahopoa.
29 Ananda tuduaMu ina tuwohe i lalu kalene,
hai pemuleanda ina ara liliuhe i lalu pekampaiMu.