Sura Kalima
(Petoia 107–150)
Nani katana lalunda tauna au Nahorema Pue Ala
107
1 Nipahawemi katana lalumi i Pue, lawi Ia maroa!Tetida AhiNa au bara mokahopoa.
2 Ee ikamu au Nehoremamokau Pue, nihowara wori nodo;
ikamu au Nahompokimokau hangko i kuasa au mepakapari.
3 Ikamu au Napateruhukau hangko i Pembetoa alo,
Katampua alo, hangko i Raa, hai hangko i Lau.
4 Arahe tauna au molilo i pada maemba,
barahe molambi rara lao i wanua, kaaraa tauna
5 Marimi hai mangkadouhe,
hai matalami peharunganda.
6 Mewali meraroamohe i Pue i lalu kaparinda,
hai Pue mokabahahe hangko i kakaraona inaonda.
7 Naninihe molumao i rara au manoto,
alana hawehe i wanua au peisa rapaidai.
8 Pogiangaahe mopahawe katana lalunda i Pue anti ahina au bara mokahopoa
hai hinangka au mewulii au Nababehi i olonda manusia,
9 lawi Pue mopabaha tauna au mangkadou,
tauna au marimi Napamabuhu hai roa.
10 Arahe tauna au mohuda i lalu kamakaindi au melangaki
tetarunggu i lalu kapari, tetaka hai rante besi.
11 Anti peewanda i hinangka parentana Pue Ala
hai kadanda moholoi paturoNa Au Makuasa,
12 ido hai Napakapari lalunda i lalu pantodiha,
tepalanggaruhe hai barahe ara au motulungi.
13 Mewali meraroamohe i Pue i lalu kaparinda,
hai Pue mokabahahe hangko i kakaraona inaonda.
14 Naninimohe mesuwu hangko i kamakaindi au melangaki,
hai Nabotukimi ope-ope rante besi petakanda.
15 Pogiangaahe mopahawe katana lalunda i Pue anti ahiNa au bara mokahopoa
hai hinangka au mewulii au Nababehi i olonda manusia,
16 lawi Ia moamba ope-ope baba tambaga,
hai pebehule baba besi Natepo.
17 Ara tauna anti kantulinda narumpahe haki
lawi poampenda au madosa,
hai rapopeahi-ahihe anti kamasalanda.
18 Kadake inaonda moita hinangka paande
lawi hungkumi dandinda.
19 Mewali meraroamohe i Pue i lalu kaparinda,
hai Pue mokabahahe hangko i kakaraona inaonda.
20 Napahawemi ngkoraNa hai Napakaohamohe,
Nahoremamohe hangko i kapate.
21 Pogiangaahe mopahawe katana lalunda i Pue anti ahiNa au bara mokahopoa
hai hinangka au mewulii au Nababehi i olonda manusia.
22 Pogiangaahe mohuhu kabula lalunda,
hai mampololitahe hinangka bagoNa i lalu katana-tana.
23 Arahe tauna au mosumomba hai kapala tahi,
au mobalu-baluhe i tahi au maemba;
24 moitahe hinangka au nababehi Pue,
hai hinangka bagoNa au melangaki i tahi au kaladu.
25 Ia mongkora, mopaara angi mata
au mopamapangka hinangka balumba.
26 Kapalanda teangkahe i laerawa hai manawohe i tahi au kaladu;
matantami kapebainda taunana molindo balumba iti.
27 Tambaliongaahe hai mowinggo-winggohe nodo tauna au malangu;
hai matantami akalanda.
28 Mewali meraroamohe i Pue i lalu kaparinda,
hai Pue mokabahahe hangko i kakaraona inaonda.
29 Napopengkaroo angi mata iti,
ido hai lenemi balumba.
30 Matanamohe, lawi maorami angi iti
hai Naantimohe i sondaka au ratunggai.
31 Pogiangaahe mopahawe katana lalunda i Pue anti ahiNa au bara mokahopoa
hai hinangka au mewulii au Nababehi i olonda manusia.
32 Pogiangaahe mampomahile Pue i tanga tauna bosa
hai motoiahe Ia i olonda totosae.
33 Ope-ope owai napopewali pada wungi,
pentumbua owai mewali tampo bangi.
34 Tampo au marudu mewali wungi mbowo,
anti kakadakenda tauna au maida indo.
35 Agaiana pada wungi Napopewali rano,
tampo bangi Napopewali pentumbua owai.
36 Tauna au marimi Napopaidahe indo,
hai moarohe wanua paidaa roonda.
37 Motudaihe bondenda hai mobungkahihe bonde anggoro,
au mampopesuwu wua au ngkaia.
38 Nawatihe alana tetambai kabosanda,
hai pinatuwonda Napopemule.
39 Agaiana mewalihe makura hai mantodihahe,
anti kapari hai pepa.
40 Pue mopaiwoi tauna au kana raita,
hai Napopolalaiohe i pada maemba au bara ara rarana.
41 Agaiana topeahi-ahi Nakabahahe hangko i kaparinda
hai Napopemulehe nodo pobanguna dimba.
42 Moita iti, matanahe tauna au manoto
agaiana tauna kadake Nakamumu humenda.
43 Hema au matopa?
Maroa ane mampeulai ope-ope iti,
hai mopailalu hinangka ahina Pue.