Kamaahina Pue Ala hai pengkabatunda to Isaraeli
106
1 Toiami Pue!Nipahawemi katana lalumi i Pue, lawi Ia maroa!
Tetida AhiNa au bara mokahopoa.
2 Hema pae au nabuku mobambari kamakuasana Pue?
Hema pae au nasauru mopahawe hinangka kamaroaNa?
3 Morasimohe tauna au mekingki i hinangka aturaNa
hai au mobabehi liliuhe noto i lalu katuwonda.
4 O Pue, Nukatuinaona, anti kamaahiMu i taunaMu;
Nutulungi worina ane Nuhoremahe
5 bona moitana roa ngkatuwo i tauna au Nupileihe
hai bona molambina kirangku i lalu kamatananda taunaMu,
hai katuwo maroa kuhumba hihimbela hai tauna au Nupoanahe.
6 Madosamongkai nodohe toiorungki;
mobabehimongkai dake hai meewamongkai.
7 I katuwonda totuangki i Masiri,
barahe moisa hinangka tanda kuasaMu;
bara rakatuinao kamahilena ahiMu,
agaiana meewarahe i wiwi tahi Teberau.
8 Nauri nodo, batena Nahoremahe anti kamaahiNa,
bona tongawa kamakuasaNa.
9 Tahi Teberau Naparenta, ido hai bangi;
mewali Naninihe molumao i tahi
nodo peahe lumao i pada wungi.
10 Nodomi kaNakabahanda hangko i taienda topekahihi
kaNahoremanda hangko i iwali.
11 Owai mobalumbangi iwalinda,
bara huba hadua au mentara.
12 I tempo iti, to Isaraeli mampoinalaimohe ope-ope dandiNa,
hai mamponanimohe petoia Iria.
13 Agaiana hinangka tanda kuasa au nababehi Pue, polo naliu inaonda
hai barapohe mampegia paturoNa.
14 I pada wungi mampeulai peahe peundeanda haduduanda,
hai mampetandakahe Pue Ala i pada mpadii.
15 Apa au raperapi, Naweihe
anti kadanda matundu Napaaraa worihe haki baramba.
16 I bambarunda, mahinahe i Musa,
hai i Haruni, tuduaNa au malelaha.
17 Mewali mengangami tampo hai moame Datan,
motabungi Abiram hai tinanahe.
18 Api au lolaa mendaulu i olonda,
hai mopapumpuhe tauna au kadake iti.
19 Mobabehihe ana japi bulawa i bulu Sinai,
hai menombahe i anitu au rateru iti.
20 Mopahuruhe Pue Ala au makuasa
hai lengge ana japi au hehi topea paandena.
21 Barapohe mokatuinao Pue Ala au mohoremahe
au mobabehimi tanda-tanda melangaki i Masiri,
22 tanda kuasa i tampo Ham
hai tanda au meringkui i tahi Teberau.
23 Mewali Naliwoakamohe Napapate,
agaiana nahomboki Musa, tuduaNa au Napileimi.
Musa iti mewali topetanga-tangainda,
ido hai maorami karumpuNa Pue Ala
hai barapi wali Naala inaonda.
24 Moaehe tampo au meawa,
lawi barahe mampoinalai dandina Pue Ala.
25 Mohume-humehe i lalu bambarunda,
hai barahe mampehadingi wotuna Pue.
26 Mewali naangkami taieNa hai mosumpa
ina Napapatehe i pada wungi,
27 hai pemuleanda ina Natendehe i olonda ngamba-ngamba
hai Nahawu-hawuhe i hinangka tampo.
28 I Peor, toiorunta menombahe i Baal,
hai moandehe popenomba au rasambalea anitu.
29 Babehia iti mopaara karumpuna Pue
ido hai napentakaihe haki au meringkui.
30 Agaiana Pinehas meangka hai mohuku tauna au masala,
ido hai mengkaroomi haki iti.
31 Anti babehiana iti, ia raimba tauna au manoto,
hai rakatuinao hawe i hae-haena.
32 Mopaara worihe karumpuna Pue temponda hungku i owai Meriba,
hai babehianda iti mopahurewu Musa.
33 Rahumpuimi pekirina,
ido hai masalami pololitana.
34 Barahe mopatuna tauna i ngamba-ngamba au maida i tampo au Nadandiahe,
nodo au nahawaamohe Pue,
35 agaiana mampohintuwuarahe tauna au bara moisa Pue Ala,
hai mampeulaihe adanda au kadake.
36 Menombahe i anitunda
au mopaara kamanawoanda.
37 Ananda rapopenomba i anitunda to Kanaa
maroa tobalilo maroa towawine.
38 Mopapatehe tauna au bara masala,
ido hai mabubumi wahenda ananda au tobalilo hai towawine.
Anti karapopenombanda ananda i anitunda to Kanaa,
ido hai tampo iti radaihimi hai wahe.
39 Modaihihe watanda hai babehianda au kadake,
mampopohirihe Pue Ala hai kadanda matundu.
40 Mewali rumihimi karumpuna Pue irihira,
hai marikami i taunaNa haduduaNa.
41 Mewali Nahuhumohe i taienda tohangambana,
ido hai rakamumuhe tauna au mokahihihe.
42 Rapohawimohe iwalinda,
hai meampumohe irihira.
43 Bosami belanda Nahorema,
agaiana meewa mani peahe
ido hai manawohe i lalu kamasalanda.
44 Agaiana i temponda meraroa anti kamaparinda,
batenda pea Nahaile.
45 Anti kaihiranda, Nakatuinao podandiNa;
anti kamahilena ahiNa,
Napenosoi tunggaiana mopatunahe.
46 Ope-ope tauna au motawanihe
Napopewalihe maahi irihira.
47 O Pue, Pue Ala au kipenombai, horema wongkamia
hai Nupateruhungkai hangko i olonda humalele tauna,
bona moorengkai wamba petoia Irio
hai motoiangkai hangaMu au malelaha.
48 Tetoiami Pue, Pue Ala au rapenombai to Isaraeli,
mepongka ide-ide hawe i hae-haena.
Pogiangaahe ope-ope tauna manguli, “Amin!”
Toiami Pue.