Pekakaena tauna au rapakadake
109
1 Idemi petoiana Daudi au napahawe i tadulako toponani.
O Pue Ala au kutoia, ineeKo mandii-ndii,
2 lawi humenda tokadake hai topeakalangi mongkora-ngkorana,
mampololitahe au bara tou kana iriko.
3 Rabungkana hai lolita pekahihi;
rapoiwalina nauri bara ara pongkana.
4 Ahingku irihira rahurungi hai perai,
moleri kupekakaea peamohe.
5 Babehiangku au maroa irihira, rahurungiana hai dake;
ahingku rahurungi hai pekahihi.
6 Tudomide hadua tauna kadake mewali topeparesana
hai hadua topokabarata meangka ntanda i koanana.
7 Ane raparesami, ia rapakisala;
hai pogiangaa pekakaena raimba dosa.
8 Pogiangaa tinuwuna sosoe
hai pohudaana naala tauna ntanina.
9 Pogiangaahe anana mewali ilu,
hai towawinena mewali bemba.
10 Pogiangaahe anana molalaio hai merapi-rapihe,
hai rawurahe hangko i posouanda.
11 Pogiangaa topesingara moago hinangka anu-anuna,
hai tauna ntanina morampaki wua pobagona.
12 Inee mpuu ara tauna au maahi iria,
hai inee ara tauna mampokakaia anana au ilumohe.
13 Pogiangaahe pemuleana rapatuna,
hai hanganda barapi rakatuinao hangalo.
14 Pogiangaa dakenda ulu bubuna rabubuhuinao i lindona Pue,
hai dosana inana inee ragewo.
15 Pogiangaa dosanda naita liliu Pue,
bona datipohe rakatuinao i wongko dunia.
16 Lawi tauna iti bara hambela mampetudungia ahina,
Ia mopopeahi-ahi tauna au mapari hai mantodiha
hai mopapate tauna au bara nasauru.
17 Naunde megane;
pogiangaa pegane iti kana watana haduduana;
bara naunde mokira pewati
pogiangaa pewati iti karao hangko iria.
18 Ia mampolowa peami pegane;
alana pegane iti melomba nodo owai i watana,
hai nodo lana i lalu buuna.
19 Pogiangaamide pegane iti nodo waru i watana,
nodo pampou au napake liliu.
20 Pogiangaamide ope-ope pegane iti
napopesuleahe Pue mewali pehuku i tauna au moraina
hai mewali pehurungi i tauna au mohowara dake iriko.
21 Agaiana Oio, O Pue, Pue Ala au kupenombai
tulungina hintoto hai dandiMu;
kabahana anti ahimu au bara mokahopoa.
22 Lawi mapari hai meahi-ahina,
hai bela lalungku.
23 Matantana nodo bao-bao i tempo kalumba,
rahawulentana nodo kakomba.
24 Kuntuku molaku lawi mopuasana;
watangku maduhu hai bangi-bangi.
25 Mewalimona wombo ngkora irihira;
tauna au moitana, molili-liliahe waanda.
26 Tulungina, O Pue, Pue Ala au kupenombai,
horemana moula kamaahiMu au bara mokahopoa,
27 bona raisa ope-ope ide Oiomi, Pue, au mobabehi,
hai raisa kaOiona mpuumi au mampobago.
28 Nau raganena iwali, Oio ina mowatina.
Nauri rabungkana, ina molambihe ea,
agaiana tuduaMu ide ina matana-tana.
29 Pogiangaa tauna au moraina
mampowaru dai hai mampotolombu eanda.
30 Ina mopahawena katana lalungku au mahile i Pue hai humengku;
Ina mampomahilena Pue i olonda tauna bosa.
31 Lawi Ia meangka ntanda i koananda topeahi-ahi
bona Nahoremahe hangko i tauna au mohukuhe.