Pue hai Datu au Napilei
110
1 Idemi nani petoiana Daudi.
Pue mongkora i ampuku datu, Nauli,
“Mohudamoko ntanda i koanaNgku,
duuna Kupopengkoruhe
ope-ope iwalimu irio.”
2 Hangko i Sion Pue ina mopamaemba rohona kadatuamu;
ina moparentako i olonda iwalimu.
3 I alo pombealamu, i bulu au malelaha,
taunamu lumaohe hangko i kabulana lalunda.
Nodo langalo madondo au ngkaia
tobalilo au mangura hai bosa ina laohe irio.
4 Mosumpami Pue,
hai bara ina Napenosoi:
“Oiomi tadulako mpenomba i hae-haena,
au mopaliliu bagona Melkisedek.”a
5 Pue ara ntanda i koanamu,
Ia ina moropui datu-datu i alo karumpuNa.
6 Pue mohuku humalele tauna alana mopadulea pearaihe tomate;
Ia moropuihe tauna au makuasa i humalele dunia.
7 Datu ina maenu hangko i halu au ara i wiwi rara,
pane molambi karoho hai menangimi.