Petoia batenami i Pue Ala
115
1 Bara irikami, O Pue, bara irikamiagaiana hangaMu pea au masuka ratoia,
lawi maahiKo hai maduduKo.
2 Moapari hai humalele tauna au barahe moisa Pue Ala
mololitahe, rauli, “Iumbami Pue Ala au rapenombai?”
3 Pue Ala au tapenombai ara i suruga;
Ia mampobago apa au Natunggai!
4 Hinangka anitunda hangko i salaka hai bulawa
au rababehi manusia;
5 ara humenda, agaiana barahe peisa mololita;
ara matanda, agaiana barahe peisa meita.
6 Motalingahe, agaiana barahe peisa mehadi;
moongehe, agaiana barahe peisa meenga.
7 Ara taienda, agaiana barahe peisa metobo;
mobitihe, agaiana barahe peisa lumao.
8 Ina nodo pewalinda topobabehi,
hai ope-ope tauna au menomba i anitu iti.
9 Ee ikamu to Isaraeli, mepoinalaimokau i Pue!
Iami topetulungimi hai labami.
10 Ee, ikamu tadulako mpenomba
pemuleanakau Haruni mepoinalaimokau i Pue!
Iami topetulungimi hai labami.
11 Ee, ope-ope tauna au langa i Pue,
mepoinalaimokau i Pue!
Iami topetulungimi hai labami.
12 Nakatuinaomoke Pue; ina Nawatike.
Ia mowati to Isaraeli,
hai pemuleanahe Haruni.
13 Ia mowatihe tauna au mengkoru Iria,
maroa anangkoi, maroa tosae.
14 Taperapi i Pue, Napopemulekau,
ikamu hai anamihe.
15 Nawatimokau Pue,
au mampopewali langi hai tampo!
16 Langi Pue ampuna
hai tampo Naweimi manusia.
17 Tauna au mate barapohe ina motoia Pue,
hai bara worihe tauna au maida i lalu talumba.
18 Agaiana ikita au tuwo motoiake Pue
ide-ide hawe i hae-haena.
Toiami Pue!