Batenami Pue au hintoto ratoia
135
1 Toiami Pue!Ee ikamu, tuduanakau Pue,
nitoiami hangana Pue.
2 Ee ope-ope tauna au mai mobago i souna Pue
au mopakarewa tabangaa souna Amputa, nitoiami Pue!
3 Nitoiami Pue, lawi Ia maroa;
pomahile hangaNa, lawi hangaNa iti meawa.
4 Pue mopileimi Yako Napoana;
Isaraeli mewali taunaNa au Napokakaia.
5 Kuisa mpuu kamahilena kuasana Pue,
Ia meawa, melumbu hangko i ope-ope anitu.
6 Pue mobabehi apa au Natunggai,
i langi hai i tampo,
i owai hai i tahi maemba.
7 Ia mampopengkaore gawu makumba hangko i wuntu dunia;
Ia mopaara kila moula uda
hai moparenta himburu bona mesuwu hangko i paidaana.
8 Ee to Masiri, Iami au mopapate ulu anami,
maroa tauna maroa pinatuwo.
9 Iami au mopaara tanda-tanda au melangaki i olomi
moewa datu Pirao hai ope-ope topobagona.
10 Ia au monangi humalele tauna,
hai mopapatehe datu au maroho,
11 iamohe Sihon, datunda to Amori
hai Og, datu i tampo Basan
hai ope-ope kadatua i Kanaa.
12 Tamponda datu iti Naweihe rapososora,
mewali sosoranda to Isaraeli, taunaNa.
13 O Pue, hangaMu rabambari i hae-haena
O Pue, ratoiaKo tauna hawe i pemuleanda,
14 lawi Pue mobotusi taunaNa hintoto hai babehianda;
maahi laluNa i ope-ope tuduaNa.
15 Anitunda humalele tauna hangko i salaka hai bulawa
au rababehi manusia.
16 Ara humenda, agaiana barahe peisa mololita;
ara matanda, agaiana barahe peisa meita.
17 Motalingahe, agaiana barahe peisa mehadi;
hai i nganganda, bara ara inao.
18 Ina nodo pewalinda topobabehi,
hai ope-ope tauna au menomba i anitu iti.
19 Ee to Isaraeli, nitoiami Pue!
Ee ikamu tadulako mpenomba pemuleana Haruni, nitoiami Pue!
20 Ee to Lewi, nitoiami Pue!
Ee ope-ope tauna au mengkoru Iria, nitoiami Pue!
21 Tetoiami Pue i Sion;
Ia au maida i Yerusale!
Toiami Pue.