Kamaahina Pue Ala i to Isaraeli
136
1 Tapahawemi katana lalunta i Pue, lawi Ia maroa!Tetida ahiNa au bara mokahopoa.
2 Tapahawemi katana lalunta i Pue Ala au makuasa i hinangka anitu!
Tetida ahiNa au bara mokahopoa.
3 Tapahawe katana lalunta i Pue au i wongkonda ope-ope au makuasa!
Tetida ahiNa au bara mokahopoa.
4 Tapahawemi katana lalunta Iria
au mobabehi sadudua hinangka tanda-tanda au mewulii!
Tetida ahiNa au bara mokahopoa.
5 Tapahawemi katana lalunta Iria
au mampopewali langi moula kapandeNa!
Tetida ahiNa au bara mokahopoa.
6 Tapahawemi katana lalunta
Iria au motaleha tampo i wongko owai!
Tetida ahiNa au bara mokahopoa.
7 Tapahawemi katana lalunta
Iria au mampopewali hinangka pewangka au mahile i langi:
Tetida ahiNa au bara mokahopoa.
8 alo au mokuasai mabaa,
Tetida ahiNa au bara mokahopoa.
9 wula hai hinangka betue au mokuasai kaindi.
Tetida ahiNa au bara mokahopoa.
10 Tapahawemi katana lalunta Iria
au mopapatehe ulu ananda to Masiri;
Tetida ahiNa au bara mokahopoa.
11 Iria au moantihe to Isaraeli
mesuwu hangko i olonda to Masiri;
Tetida ahiNa au bara mokahopoa.
12 hai kabuhuaNa au maroho
hai taieNa au tetindora,
Tetida ahiNa au bara mokahopoa.
13 Iria au mampopogaa tahi Teberau mewali ronggaa,
Tetida ahiNa au bara mokahopoa.
14 hai au mowetahahe to Isaraeli hawe i hambali.
Tetida ahiNa au bara mokahopoa.
15 Iria au moliso Pirao hai surodadonahe i tahi Teberau!
Tetida ahiNa au bara mokahopoa.
16 Tapahawemi katana lalunta Iria
au monini taunaNa molumao i pada wungi!
Tetida ahiNa au bara mokahopoa.
17 Tapahawemi katana lalunta Iria
au monangihe ope-ope datu au maroho;
Tetida ahiNa au bara mokahopoa.
18 Iria au mopapate ope-ope datu au meawa:
Tetida ahiNa au bara mokahopoa.
19 iamohe Sihon, datunda to Amori;
Tetida ahiNa au bara mokahopoa.
20 hai Og, datu i Basan.
Tetida ahiNa au bara mokahopoa.
21 Tamponda datu iti Naweihe taunaNa rapososora,
Tetida ahiNa au bara mokahopoa.
22 mewali sosoranda to Isaraeli, tuduaNahe.
Tetida ahiNa au bara mokahopoa.
23 Ikita to isaraeli barake Naliu inaoNa i tempota ranangi;
Tetida ahiNa au bara mokahopoa.
24 Napelaeke hangko i taienda iwali.
Tetida ahiNa au bara mokahopoa.
25 Iria au mopaara paandenda hinangka au tuwo.
Tetida ahiNa au bara mokahopoa.
26 Tapahawemi katana lalunta i Pue Ala
au makuasa hangko i langi.
Tetida ahiNa au bara mokahopoa.