Mohintuwuke hai halalunta hampepepoinalai
4
1 Halalu, nihadimi ope-ope paturongku. Ide iko, au ratarunggu anti pobagongku i Pue Ala, kuperapi mpuu irikamu bona mobabehikau apa au hintoto rababehi anana Pue Ala, lawi Nakakiomokau mewali anaNa. 2 Hangangaa mengkaiwoikau hai hangangaa maalusu poantimi i paka-pakana. Hangangaa peisakau modoko hangka rangami nauri niisa kamakurana, hai hangangaa sabarakau anti kamaahimi hadua hai hadua. 3 Nipari-pari mohintuwu, inee ara posisisala bona kahintuwumi i lalu Inao Malelaha tekadipura liliu. 4 Ikita ope-ope au mepoinalai i Yesu Kerisitu, nodo peake hawata-wata, hai hadua pea Inao Malelaha au mampaidaike. Hai himbela wori peharunganta ope-ope, lawi nakakiomoke Pue Ala mewali anaNa. 5 Hadua pea Amputa, hambua pea pepoinalainta, hai rariuke i lalu hanga au himbela. 6 Hadua pea Pue Ala au rapouma ope-ope tauna, au makuasa irikita ope-ope, au ara i lalunta hai au mampobago ope-ope melempo irikita.7 Nauri himbelake, agaiana karawatinta bara himbela, lawi ikita ope-ope raweike kapande hadua-hadua mampopolumao bagona Pue hintoto hai apa au naweike Kerisitu. 8 Ido hai i lalu Sura Malelaha teuki node:
“Karoona monangi iwaliNa,
mengkaoremi i kapangkaaNa,
hai bosahe tawani au Naanti;
hai Ia mokira-kira pewati i manusia.”*
9 Mewali ane rauli, “Ia mengkaore hulemi i kapangkaaNa”, manoto hangkoia Ia mendaulumi mai i paidaa au tepaiwoi i dunia ide. 10 Hai Ia au mendaulumi iti, Ia wori au mengkaore hule duuna molambi pohudaa au meliu kapangkana hangko i ope-ope au i langi bona Ia mopabukei hinangkana. 11 Iami au mokira-kira pewati i ope-ope tauna au mepoinalai Iria: arahe au Napopewali suroNa, arahe au Napopewali nabi mopahawe lolitaNa, hai ara worihe au Napopewali topobambari Ngkora Marasa, guru jumaa, hai guru agama. 12 Ia mokira-kira pewati iti bona ikita ope-ope au mepoinalai Iria raparewaike bona tabuku mampopolumao bagona Pue. Lawi ane iti au tababehi, ikita au rauli Watana Kerisitu ina tetambai kamarohona pepoinalainta, 13 duuna hambela tempo ina mewalike hampepekiri i lalu pepoinalainta, hai ina moisa ntepuuke Anana Pue Ala. Ina kanoto-notoake, duuna mewalike nodo Kerisitu au bara ara kamakuraNa.
14 Mewali, ane nodo kamarohona pepoinalainta, barapoke ina holi-holi rapakanawo nodo anangkoi, lawi pekiri anangkoi nodo hehi au nawui himburu node hou node mai. Agaiana ikita, barapoke nodo. Barapoke ina mampeulai hinangka paturo hangko i tauna au mepawuli hai mepakanawo. 15 Agaiana ina tapatongawa paturo au tou hangko i lalunta au buke ahi, bona i paka-pakana, kamahae-haea kanoto-notoake duuna mewalike nodo Kerisitu, au mewali Tadulakonta. 16 Ikita hadua-hadua au mepoinalai, rapandirike nodo hangkira hangko i Watana Kerisitu. Ane i wata manusia, hinangka kirana mombeusu maroa hai hiumpu maroa bona mewali hambua wata. Nodo wori ikita au mepoinalai: anti pohintuwuta hai Kerisitu, mohintuwuke hadua hai hadua. Hai ane ikita hadua-hadua mokadipura bago au nakira-kiraamoke Pue, ina kamaroho-rohoa peulanta i Pue hai pohintuwuta hadua hai hadua anti pombepokaahinta.
Katuwo au wou
17 Mewali, hai kuasa au naweina Pue, kuuli hai kupaturoakau: Ineemokau tuwo nodo katuwomi hangkoia au bara moisa Pue Ala, lawi au rapekiri bara mobundu 18 hai makaindi lalunda. Barahe mohumba katuwo au wou hangko i Pue Ala, lawi barahe moisa Pue Ala. Ntulihe lawi matua lalunda. 19 Barapi raisa maea, ido hai moula pearaihe peundeana lalunda au merikai, hai raunde peami mobabehi hinangkana babehia au bara hintoto.
20 Agaiana, ikamu, inee nodo babehiami, lawi bara iti au rapaturoakau hangko i Ngkora Marasa kana i Kerisitu. 21 Ane nihadi mpuumi kana Iria, hai rapaturoamokau paturo au tou moula kamanotoNa, 22 hangangaa nitendemi babehiami au hangkoia hangko damanikau mepoinalai i Pue. Ope-ope peundeana lalumi au nipeulai i tempo iti mopakanawokau hai mopakarugi katuwomi. 23 Ido hai hangangaa merapikau bona Pue Ala mowouki lalumi hai pekirimi. 24 Hai hangko inditi, hangangaa niula babehia wou au hintoto, lawi napopewalimokau Pue Ala manusia au wou, tunggaiana bona manoto hai malelahakau moula poantiNa haduduaNa.
25 Mewali halalu, nitendemi dongko. Nipololitami apa au tou i hangka rangami, lawi ikita ope-ope hangkirake hangko i Watana Kerisitu. 26 Ane rumpukau, inee nipogiangaa karumpumi iti moantikau madosa. Ineekau mowoli karumpumi duuna tampu alo, 27 dati ara katepakana Datu Tokadake mokelokau. 28 Tauna au manangka, ineemohe manangka. Aginda mobago bona molambihe apa au raparaluu hai bona peisa worihe motulungi ranganda au mapari.
29 Inee ara lolita kadake mesuwu hangko i humemi. Agina mohowarakau lolita au hintoto au ina motulungi hai mopakaroho laluna hangka rangami. Lolita au nodo ina moanti roa ngkatuwo i tauna au mohadi. 30 Nikampai babehiami datikau mopakasusa Inao Malelaha au naweikau Pue Ala. Nikatuinao, Inao Malelaha iami pampekatandaina Pue Ala i lalumi au mopakanoto kaikamuna taunaNa. Anti kaarana Inao Malelaha i lalumi, niisa kaina hawena tempona Pue Ala mokabahakau hangko i dunia au kadake ide.
31 Mewali, nikabahami ope-ope babehia au node: hai lalu, karumpu, pepailalu, pobungka, pepakadake, hai pekakabosai. Nikabahami babehia iti hai hinangka babehia au kadake. 32 Hangangaa maroa lalumi, mampokaahikau rangami, hai niampungi salana hangka rangami, nodo Pue Ala moampungi salami anti pohintuwumi hai Kerisitu.