<<    <     Pampetudungia     2     >    >> 
Sura au rapakatu i jumaa i wanua Epesu
2
1 Nauliangaana Yesu, “Nuukimi lolita ide hawe i tadulako au mokadipura jumaa i wanua Epesu:
Idemi lolitana Pue Yesu au mokingki betue au pitu oguna i taie koanaNa hai au molumao i olo pitu mbuana biti hulo bulawa. 2 Nauli:
Kuisa noumba babehiami: madotakau i lalu bagoNgku, hai mantahakau i tempomi rapopeahi-ahi anti pepoinalaimi Iriko. Kuisa kanikahihina babehianda tauna au kadake. Arahe au manguli suroNgkuhe, agaiana bara tou. Niisa podongkonda, lawi bara maroa babehianda. 3 Mantahakau i lalu kapari anti pepoinalaimi Iriko, hai bara malede lalumi meula Iriko. 4 Agaiana ara au Kusalaiakau: barapoNa nipokaahi nodo kanipokaahiNgku hangkoia. 5 Ido hai Kuuliangaakau: nipehadingi! Manawomokau i lalu dosa. Mewali, hangangaa menosokau! Nibabehimide apa au nibabehi nguru-nguruna. Lawi ane bara nibabehi nodo, i kahaweNgku deade, ina Kuingihi pambolia hulomi hangko i paidaana.a 6 Agaiana ara wori babehiami au maroa, lawi barakau mounde babehianda tauna au mampeulai paturona Nikolaus, au Kukahihi wori.
7 Hema au motalinga, hangangaa mampehadingi apa au nauli Inao Malelaha i ope-ope jumaa.
Hema au menangi, Kupaliu mpuu maande wua kau ngkatuwob i Bonde Paradesi i suruga.”
Sura au rapakatu i jumaa i wanua Smirna
8 Roo indo, nauli mbuli Pue Yesu iriko, “Nuukimi lolita ide hawe i tadulako au mokadipura jumaa i wanua Smirna:
Idemi lolitana Pue Yesu, Ia pepongkana hai au kahopoana, au mate agaiana tuwo hule. 9 Nauli:
Kuisa kapari au morumpakau, hai Kuisa peahi-ahimi, agaiana katouana pebukukau i lalu pepoinalaimi. Kuisa noumba karakakabosaimi tauna au moulihe katoYahudinda. Agaiana katouana, i lalunda barahe to Yahudi; topegurunarihe Datu Tokadake. 10 Bona niisa: Datu Tokadake ina motarunggu hanggaa hangko irikamu, hai ina nakelokau bona mousulikau hangko i pepoinalaimi. Ina rapopeahi-ahikau hampulo alona kamahaena. Agaiana inee nipokalanga pepopeahi-ahi iti. Hangangaa mantahakau i lalu pepoinalaimi kehapirikau rapapate. Ane nodo nibabehi, ina Kuweikau katuwo maroa au bara mokahopoa, hurungina penangimi.
11 Hema au motalinga, hangangaa mampehadingi apa au nauli Inao Malelaha i ope-ope jumaa.
Hema au menangi, bara mpuuhe ina rahuku i naraka au rahanga kapate karombelana.”
Sura au rapakatu i jumaa i wanua Pergamus
12 Roo indo, nauli mbuli Pue Yesu iriko, “Nuukimi lolita ide hawe i tadulako au mokadipura jumaa i wanua Pergamus:
Idemi lolitana Pue Yesu au mopake piho momata pontimali. 13 Nauli:
Kuisa iumba paidaami. Maidakau i wanua pohudaana Datu Tokadake. Agaiana nipangaku liliuNa. I karapapatena sabiNgku Antipas, bara nisapuaka kanipoinalaiNgku. Antipas iti iami sabiNgku au mopangaku liliuNa duuna rapapate i boeami au nakuasai Datu Tokadake. 14 Agaiana ara bahangkia pakana au Kusalaiakau, lawi arakau hanggaa au mampeulai paturona Bileam.c Hangkoia Bileam iti mopaguru Balak noumba rara mopakanawo to Isaraeli bona madosahe. Nawawahahe moande paande au rapopenomba i anitu, hai nawawahahe mobabehi au merikai. 15 Nodo wori, arakau hanggaa au mampeulai paturonda topeguruna Nikolaus. 16 Ido hai Kuuliangaakau, menosomokau hangko i dosami iti! Ane bara, ina maiNa irikamu hai Kupombealaahe tauna au mampeulai paturo au sala iti hai piho au mesupa hangko i ngangaNgku.
17 Hema au motalinga, hangangaa mampehadingi apa au nauli Inao Malelaha i ope-ope jumaa.
Hema au menangi, ina Kupaliuhe moande mannad au tewuni. Ina Kuwei worihe haogu watu au bula. I watu iti teuki hanga au wou, au bara raisa tauna ntanina. Au moisa, batena pea au modoko watu iti.”
Sura au rapakatu i jumaa i wanua Tiatira
18 Nauli mbuli Pue Yesu iriko, “Nuukimi lolita ide hawe i tadulako au mokadipura jumaa i wanua Tiatira:
Idemi lolitana Anana Pue Ala au mataNa mewangka nodo rore api hai bitiNa mengkila-ngkila nodo suasa au hangko roo rahowu. 19 Nauli:
Kuisa noumba babehiami. Kuisa ahimi hai pepoinalaimi Iriko. Maroa pampopolumaomi bagoNgku. Mantahakau i lalu kapari. Meliu karumihina pobagomi Iriko ide-ide hangko i pobagomi i tempomi nguru-nguruna mepoinalai Iriko. 20 Agaiana ara mani au Kusalaiakau. Lawi ara hadua towawine au rahanga Isebel,e au mouli kaiana hadua nabi, hai nipogiangaa pea mopaguru tauna au mepoinalai Iriko. Towawine iti mopaturohe mobabehi babehia au merikai hai laohe moande paande au rapopenomba i anitu. Bosa hawiNgku napakanawo hai paturona iti. 21 Towawine iti Kuweimi katepaka bona menoso hangko i dosana, agaiana bara mau mokabaha babehiana au merikai. 22 Mewali, ina Kupoparumpaa haki bona napaturua. Batena mantodiha mpuu i paturuana nodo wori hai hampombebualosinahe. Tauna au barahe mokabaha peulanda i babehiana towawine iti, ina rumihi wori pantodihanda. 23 Ope-ope tauna au meula iria ina Kupapatehe. Hangko inditi, ina tongawa i ope-ope jumaa kaIkona au moparesa pekiri manusia hai lalu manusia. Ina Kuhurungikau hintoto hai babehiami.
24 Agaiana arakau hanggaa i Tiatira au bara mampeulai paturo au kadake iti, hai bara niunde mampegurui au rauli, ‘Kapangisana Datu Tokadake au tewuniangi’. Mewali Kuuliangaakau, barapi ina Kutambai haleami hai parenta ntanina. 25 Nipeulai liliu apa au niisami duuNgku hawe.
26-27 Hema au menangi, hai mobabehi apa au hintoto hai peundeaKu duuna i kahopoana, ina Kuweihe kuasa himbela hai kuasa au Kudokomi hangko i UmaNgku. Ina Kuweihe kuasa moparenta tauna i humalele dunia. Kamarohona kuasaNgku au Kuweihe iti nodo kamarohona lai besi. Kuasa iti, ina rapopopakarugi ope-ope iwalinda nodo kori tampo au rapengka.f 28 Hai ina Kuweihe betue au mesupa ntanda i Mata alo.
29 Hema au motalinga, hangangaa mampehadingi apa au nauli Inao Malelaha i ope-ope jumaa.”