Sura au rapakatu i jumaa i wanua Sardis
3
1 Nauli mbuli Pue Yesu iriko, “Nuukimi lolita ide hawe i tadulako au mokadipura jumaa i wanua Sardis:Idemi lolitana Pue Yesu, au mokingki pitu Inao hangko i Pue Ala hai betue au pitu oguna. Nauli:
Kuisa noumba babehiami. Rauli, maroa mpuu tuwomi, moleri pepoinalaimi mate! 2 Pearomodekau! Nipakaroho pepoinalaimi au ara mani hangko da mate ope-ope, lawi apa au nibabehi Kuita haha, hai bara mani ara au moleogu i peitana Pue Ala UmaNgku. 3 Ido hai Kuuliangaakau: hangangaa nikatuinao paturo au nihadi hai au nidoko hangkoia. Peulaimide apa au rapaturoakau iti, hai menosomokau hangko i dosami. Lawi ane barakau mainga-inga, bara ina niisa impira kahawengku, lawi kahaweNgku iti nodo kahawe topanangka. 4 Agaiana arahe bahangkia tauna i olomi au mokadipura liliu tuwonda dati nadaihi dosa. Ihira ina molumao hihimbela hai Iko, mehampi bula meningkihe, lawi masukahe mehampi nodo.
5 Hema au menangi, ina Kubaduiahe hampi au bula. Hanganda bara ina Kugewo hangko i Sura Ngkatuwo, sura poukia hanga tauna au molambi katuwo maroa au bara mokahopoa. Hai i lindona UmaNgku hai malaekaNa, ina Kupangaku kaihirana taunaNgku.
6 Hema au motalinga, hangangaa mampehadingi apa au nauli Inao Malelaha i ope-ope jumaa.”
Sura au rapakatu i jumaa i wanua Filadelfia
7 Nauli mbuli Pue Yesu iriko, “Nuukimi lolita ide hawe i tadulako au mokadipura jumaa i wanua Filadelfia:
Idemi lolitana Pue Yesu au malelaha hai au manoto. Ia au mokingki pegili baba i kadatuana Daudi.a Ane Ia au mobungkahi, bara ara au peisa motuko. Ane Ia au motuko, bara ara au peisa mobungkahi. 8 Nauli:
Kuisa apa au nibabehi. Peita, Kubungkahiakau baba hai barapi ara au peisa motuko, lawi nauri haodi pearai kamarohomi, lolitaNgku nipeulai hai bara mpuu nisapuaka kanipoinalaiNgku. 9 Arahe tauna au mouli kaihiranda to Yahudi, agaiana dongkonda pea. I lalunda, barahe to Yahudi; topegurunarihe Datu Tokadake. Tauna iti, ina Kuanti irikamu. Ina molingkuduhe i lindomi, hai rapangaku kaKupokaahimi. 10 Anti kanipeulaina hawaNgku au manguli hangangaa mantahakau, ido hai ina Kupeparaikau hangko i kapari au ina morumpa humalele dunia. Ope-ope tauna au maida i dunia, ina rapetandakahe i tempo kapari iti.
11 Barapi mahae ina hawemoNa! Hangangaa nikingki maroho-roho paturo au niisami datikau mala rapakanawo alana songko kadatua au naweimokau Pue Ala anti penangimi, raperampai tauna ntanina.
12 Hema au menangi, ina kupopewalihe arii i Souna Pue Ala i suruga. I watanda ina Kuuki hangana Pue Ala UmaNgku hai hangana wanuana Pue Ala. Wanua iti iami Yerusale au woub au mendaulu mai hangko i suruga hangko i Pue Ala UmaNgku. Nodo wori ina Kuuki i watanda hangaNgku au wou.
13 Hema au motalinga, hangangaa mampehadingi apa au nauli Inao Malelaha i ope-ope jumaa.”
Sura au rapakatu i jumaa i wanua Laodikia
14 Nauli mbuli Pue Yesu iriko, “Nuukimi lolita ide hawe i tadulako au mokadipura jumaa i wanua Laodikia:
Idemi lolitana Pue Yesu, au rahanga ‘Amin’. Iami Sabi au mopahawe liliu apa au tou. Iami Patoana ope-ope au napopewali Pue Ala. 15 Nauli:
Kuisa apa au nibabehi. Barakau malahe, bara worikau mamu. Mobundumi malahe ba mamukau. 16 Agaiana mamualo peakau; barakau mamu hai bara worikau malahe. Ido hai ina Kuhoparakakau hangko i lalu ngangaNgku. 17 Niuli pebukukau, handa katuwomi, hai barapi ara kamakurami. Agaiana, bara niisa kanoumbami! Rumihi ntepuu kameahi-ahimi! I lalu pepoinalaimi, meahi-ahikau, bilokau, hai barakau mehampi 18 Ido hai Kuweikau lolita ide: niholomi Iriko bulawa au rapamalelahami i api. Niholo wori Iriko hampi au bula bona mebadukau hai tetabungi eami. Hai niholo wori Iriko pakuli nipoporirohi matami bona meitakau. Ane nodo, ina pebukukau i pepoinalaimi. 19 Ope-ope tauna au Kupokaahi, Kupaturo hai Kukambaroa bona moulahe paturoNgku. Ido hai Kuuli, nibaliki lalumi, hai menosokau!
20 Peita! MeangkaNa i baba hai Kutidongko. Ane ara au mohadi wotuNgku hai nabungkahiaNa, ina mesuaNa i lalu hai maidaNa indo hihimbela hai ia. Ina maandeNa hihimbela hai ia, hai ia wori ina maande hihimbela hai Iko.
21 Hema au menangi, ina Kupopohuda hihimbela hai Iko i kadera kadatuaNgku, nodo Iko au menangimoNa, hai mohudaNa moparenta hihimbela hai UmaNgku i kadera kadatuaNa.
22 Hema au motalinga, hangangaa mampehadingi apa au nauli Inao Malelaha i ope-ope jumaa.”