5
1 Hangko indo, kuita mbuli, i taie koanana Hadua au mohuda i kadera kadatua ara sura au tewilolo. Sura iti pontimali buke hai uki, rawilolo, hai rapekatandai pitu mbuana pene dati rabungkahi. 2 Kuita ara hadua malaeka au maroho au mololita masisimbuku, nauli, “Hema au hintoto hai peisa mobungkahi pene sura ide bona peisa rabasa?” 3 Bara huba hadua au peisa mobungkahi sura iti hai mobasa ihina. Mogalo i suruga ba i dunia ba i lapi tampo, bara ara hadua au nabuku. 4 Moteriana anti kawiorangku, lawi bara ara hadua au hintoto mobungkahi sura iti hai mampeita ihina. 5 Roo indo, ara hadua hangko i totosae au rompulo hai iba au mouliangaana, “Ineeko moteria. Lawi ara mpuu au menangi! Ia rauli: Singa hangko i Yehudaa; Ia pemuleana Datu Daudi!b Ia au peisa mobungkahi penena hai mobungkahi sura iti.”6 Roo indo, kuita i olo kadera kadatua hai pinatuwo au iba hai totosae iti, meangkami hambaa Ana Dimba.c Hai kuita arami lari pesambalea. TanduNa pitu mbuana, hai mataNa wori pitu. MataNa au pitu iti, lempona Inaona Pue Ala au mampopolumao pitu pakana bago hai au Natudu lao i humalele dunia. 7 Ana Dimba iti molumao lao moala sura iti hangko i taie koanana Hadua au mohuda i kadera kadatua. 8 KaNaalana sura iti, pinatuwo hai totosae au rompulo hai iba molingkudumohe motumpa i lindona Ana Dimba. Ope-opehe mokingki kecapi hai mangko bulawa au buke hai anu-anu mawongi au rauli dupa. Dupa iti, lempona pekakaenda taunana Pue Ala. 9 Monani-nanimohe hambua nani au wou, rauli:
“Oiomi au hintoto modoko sura iti
hai mobungkahi penena
lawi rapapatemoKo;
Hai waheMu au mabubu i kapateMu,
Nupopoholomohe tauna i humalele dunia,
i ope-ope kadatua, i ope-ope pemulea hai i hinangka basa.
Hai Nuhuhuhe i Pue Ala.
10 Nupopewalihe datu hai tadulako mpenomba
au mampopolumao bago mpenomba i Amputa Pue Ala.
Ina moparentahe nodo datu i wongko dunia.”
11 Roo indo, kuitahe malaeka au bosa, isabuna ba i jutana kabosanda, hai kuhadimi wotunda. Meangkahe motoleliki kadera kadatua hai pinatuwo hai totosae iti. 12 Monanimohe malaeka iti masisimbuku, rauli,
“Ana Dimba au rasambale,
hintoto mpuu tabila hai tatoia,
tapomahile hangaNa,
tabambari kamarohoNa,
tapolinga peawaNa,
takatuinao kamapandeNa,
hai tapatolele kamakuasaNa!”
13 Hangko indo, kuhadi worimi ope-ope au ara i suruga, i dunia, i lapi tampo hai i lalu tahi; ope-ope au tuwo monanimohe node:
“Hadua au mohuda i pohudaa datu hai Ana Dimba,
tatoia, tabila, tapakahile peawaNda
hai tabambari kuasaNda hawe i hae-haena!”
14 Rahanai pinatuwo au iba iti: “Amin!” hai totosae au ara inditi motumpamohe menomba.