Pampetudungia au kadua
(4:1–16:21)
Yesu raita nodo Ana Dimba au meangka i hola kadera kadatuana Pue Ala i suruga
4
1 Roo ido, ara mbuli au rapatongawaana. Moitana hambua baba i suruga tebungkahi, hai mohadi mbulina hambua wotu nodo au kuhadi nguru-nguruna. Pomonina nodo tatamburu. Nauliangaana, “Maiko! Ina Kutudungiako apa au hangangaa mewali i alo au ina mai.” 2 I tempo iti peawomi, nakuasaina Inaona Pue Ala, hai moitana hambua kadera kadatua i suruga. Ara Hadua au mohuda inditi 3 mengkila-ngkila nodo paramata au rauli watu yaspis hai watu sardis. Ara wori mporagia mantoleli kadera kadatua iti, nodo pewangka watu samrud. 4 Hai mantoleli kadera kadatua, ara wori rompulo hai iba pohudaa datu. Pohudaa iti rapohudai rompulo hai iba totosae au mehampi bula hai mesongko bulawa. 5 Hangko i kadera kadatua iti, mombehangkemi kila, hai mopereremi gumpata. I lindo kadera kadatua iti, ara pitu mbuana hulo au rore. Hulo iti, lempona Inaona Pue Ala au mampopolumao pitu pakana bago. 6 I lindo kadera kadatua iti, ara wori lanta au nodo tahi, malino mpuu nodo kaca ba watu au meninto.Kadera kadatua au masuku iti, natoleliki iba pinatuwo au ngkaia matanda. Humalele watanda nakaarai mata, maroa i lindonda maroa i taleunda. 7 Pinatuwo au kaisa nodo singa lenggena. Kadua nodo japi laki. Katalu nodo lindo manusia. Kaibana raita nodo tadasingkaia membaro. 8 Pinatuwo au iba iti mokapihe ini mbuana, hai humalele watanda momata. Barahe mengkangkaroo mohowara petoianda. Maroa mabaa ba kaindi, manguli liliuhe,
“Malelaha! Malelaha! Malelaha!
Pue Ala iami au mahile kuasaNa hangko i ope-opena,
Ia au ara hangko i nguru-nguruna,
au ara ide-ide,
hai au ara hawe i hae-haena!”
9 Bela-belanda pinatuwo iti manguli ngkaia kamaroana, mobila hai motoiahe hangana Hadua au mohuda i kadera kadatua hai au tuwo hawe i hae-haena, 10 totosae au rompulo hai iba molingkuduhe motumpa i lindona Hadua au mohuda i kadera kadatua hai au tuwo hawe i hae-haena iti. Menombamohe Iria, hai songko kadatuanda rahuhu Iria i lindo pohudaaNa mewali tanda pebilanda. Roo indo, rauli,
11 “Ampuki, Pue Ala!
Oiomi au hintoto ratoia hai rabila.
Oio pea au makuasa!
Lawi Oio au mampopewali hinangkana.
Anti peundeaMu, Nupopewali hai Nupatuwo hinangkana au ara.”