Pue Ala mampekatandai hangkira to Yahudi bona rapeparaihe hangko i rugi
7
1-2 Hangko indo, kuitahe iba malaeka au meangka i iba huno dunia. Malaeka iti molambihe kuasa hangko i Pue Ala bona mopakarugi dunia hai pepopeahi-ahi, maroa i tahi maroa i lore. Motahahe pewui himburu hangko i iba huno dunia dati ara himburu au mewui i tahi, i lore hai i pandulu. Hai kuita hadua malaeka hawe hangko ntanda i Mata alo moanti pene au hangko i Pue Ala au tuwo. Malaeka iti mololitami masisimbuku mouliangaahe malaeka au iba inona, nauli, 3 “Inee hampai nipakarugi tahi, lorena hai pandulu, ane bara mani kiwoli tanda i wingkenda taunana Pue Ala Amputa, datihe narumpa rugi iti.” 4 Hai ara au mouliangaana kabosanda au rapekatandai: hangatu iba pulona hai iba sabuna. Au rapekatandai iti, hangko i hampulo hai rontina to Isaraeli. 5 Hangko i hantina-hantina, hampulo hai rosabu au rapekatandai:Yehuda;
Nodo wori hangko i pemuleana Rube, Gadi,
6 Aser, Natali, Manase,
7 Simeo, Lewi, Isakar,
8 Sebulo, Yusupu, hawe i pemuleana Benami.
Taunana Pue Ala au bara peisa teimba kabosanda
9 Roo indo, kuita mbuli manusia au bosa ntepuu; barapi peisa raimba kabosanda. Ihira iti, hangko i humalele dunia, hangko i ope-ope kadatua, ope-ope pemulea hai hinangkana basa. Meangkahe i lindo kadera kadatua hai i lindona Ana Dimba. Mehampihe au bula, hai mokingkihe tawe handutu au raweweraka liliu tanda kamatananda. 10 Monganga-ngangamohe, rauli,
“Toiami Amputa Pue Ala
au mohuda i kadera kadatua!
Toiami Ana Dimba!
Lawi Ia au mohoremake hangko i huku dosanta,
hai moweike katuwo maroa.”
11 Kadera kadatua hai totosae au rompulo hai iba, hihimbela hai pinatuwo au iba, ratoleliki ope-ope malaeka. Motumpamohe ope-ope i lindo kadera iti, hai menombahe i Pue Ala, 12 rauli,
“Amin!
Tatoiami Amputa Pue Ala,
Tapomahile hangaNa,
Taadai kamapandeNa,
Tauli ngkaia kamaroana Iria,
Tabila Pue Ala,
Tabambari kamarohoNa,
Takatuinao kamakuasaNa,
hawe i hae-haena! Amin.”
13 Roo indo, hadua hangko i totosae iti mekune iriko, nauli, “Arahe nuisa tauna au mebadu bula ngkalanga iti? Ba nuisa kahangko iumbanda?”
14 Kuhanai: “Barahe kuisa, ampu. Nuuliangaa wongkoia.”
Nauliangaana: “Ihira iti, tauna au mamporaraimohe au rauli Tempo Pepopeahi-ahi au Rumihi Ntepuu. Hampinda rabahoi hai wahena Ana Dimba bona mewali bula. 15 Ido hai meangkahe i lindo kadera kadatuana Pue Ala, hai menombahe alo-alona hai wengi-wengina i lalu Souna Pue Ala. Hai Pue Ala au mohuda i kadera kadatuaNa ina mokampaihe. 16 Barapohe marimi, barapohe mangkadou, hai barapohe nasimbaki alo au makere, 17 lawi Ana Dimba au meangka i hola kadera kadatua mokadipurahe. Naninihe lao i owai au mopaara katuwo. Hai Pue Ala moumpahi hinangka owai mata hangko i matanda.”