Pene au kapitu rabungkahi
8
1 Kanabungkahina Ana Dimba pene au kapitu, unga pea mandii i suruga ba arato pae hantanga jaa. 2 Kuita pitu malaeka meangka i lindona Pue Ala. Malaeka au pitu iti rawei pitu tatamburu. 3 Hangko inditi, hawemi hadua malaeka ntanina au meangka i lindo meja pointua dupa.a Malaeka iti moanti hambua tabo pointua dupa au rababehi hangko i bulawa, hai rawei ngkaia dupa bona naintu hai napopenomba hihimbela hai pekakaenda ope-ope taunana Pue Ala. Dupa iti naintu i wongko meja pointua dupa au rababehi hangko i bulawa au ara i lindo kadera kadatuana Pue Ala. 4 I kanaintuna dupa iti, mengkaoremi rambuna i lindona Pue Ala hihimbela hai pekakaenda taunana Pue Ala. 5 Roo indo, malaeka iti mangala tabo pointua dupa, napambolii api hangko i meja pointua dupa, hai nanawo i dunia. Hangko indo, kegumpatami, kekilami, hai kelinumi.Tatamburu au pitu
(8:6–11:19)
Malaeka motawue ini tatamburu au nguru-nguruna
6 Malaeka au pitu iti, hadua-haduahe mokingki tatamburu au ina ratawue. 7 Malaeka au kaisa motawue tatamburuna, hai unga pea ara uda mowua hangko i langi. Nodo wori, api mogalo wahe toami i dunia. Tehuwemi pandulu hai ope-ope hehi malewau i hangkira talu dunia.
8 Roo indo, malaeka karoduana motawue tatamburuna, liliu kuita hambua au nodo bulu, mahile hai keapi, hai raweduka i tahi alana hangkira talu tahi mobali mewali wahe. 9 Mewali matemohe ope-ope au tuwo i lalu tahi hai tiri ope-ope kapala au ara i wongko tahi i hangkira talu tahi iti.
10 Malaeka au katalu motawue worimi tatamburuna, hai unga pea manawo hangko i langi haogu betue mahile au rore nodo hulu. Betue iti monawongi hangkira talu hangko i ulu owai hai halu. 11 Hangana betue iti, iami Mapai. Hangkira talu hangko i ope-ope owai mewali mapai, hai bosa tauna mate lawi moenuhe owai au mapai iti.
12 Malaeka au kaibana motawue tatamburuna, hai unga pea ara au motabungi hangkira talu hangko i alo, wula hai betue, alana hangkira talu hangko i pewangkanda barapi mewangka. Mewali, ane pualo, hangkira talu hangko i pewangka alo bara mewangka nodo biasa. Nodo wori ane kaindi, hangkira talu hangko i wula hai hangkira talu hangko i ope-ope betue bara mewangka nodo biasa.
13 Hangko inditi kuita, ara hambaa tadasingkaia au membaro i laerawa. Kuhadimi tadasi iti mololita masisimbuku, nauli, “Hurewu! Hurewu! Hurewumohe tauna au maida i dunia, ane talu malaeka au kahopoana motawue tatamburunda.”