Yohane moita hadua malaeka au mokingki hambua sura au koi
10
1 Roo indo, moitana hadua malaeka au maroho mendaulu hangko i suruga. Malaeka iti nabalungkuhi gawu, hai waana natoleliki mporagia. Lindona mewangka nodo alo, bitina nodo arii au keapi. 2 Biti koanana mepangka i tahi, hai biti kabeona mepangka i lore. I taiena ara hambua sura koi au tebungkahi. 3 Mongangami malaeka iti nodo poau singa. Roo malaeka iti monganga, nahanai gumpata au mowotu masisimbuku pitu belana. 4 Karoona gumpata iti mololita, ina kuuki lolitana, agaiana unga pea kuhadi hambua wotu hangko i suruga au mouliangaana: “Iti inee nuuki! Hangangaa nuwuniangi apa au nauli gumpata inona.”5 Roo iti, malaeka au kuita inona, au mepangka i tahi hai i lore, moangkami taie koanana i langi, hai 6-7 mosumpa i lalu hangana Pue Ala au tuwo hawe i hae-haena, au mampopewali langi, tampo, tahi hai hinangka ihina. I posumpana, nauli node, “Ane malaeka au kapitu motawue tatamburuna, i tempo iti Pue Ala ina mampopewali tunggaiaNa au mahaemi tewuniangi moula apa au Napololita hangkoia i nabi au moantihe NgkoraNa. Ope-ope iti ina rapaholigami pewalina.”
8 Roo indo, wotu au kuhadi hangko i suruga inona mouliangaa mbulina, node: “Laomoko mangala sura au tebungkahi au ara i taiena malaeka au mepangka i tahi hai i lore!”
9 Lao mpuumona i malaeka iti, hai kuuliangaa, “Nuweina sura au koi iti.”
Nauliangaana, “Nuala hai nuandemi. I lalu taimu, nuhadi nodo paande au mapai, agaiana i ngangamu, momi nodo tinaha.”
10 Kuala mpuumi sura iti hangko i taiena malaeka iti hai kuande. I ngangangku, minana momi mpuu nodo tinaha, agaiana i lalu taingku kuhadi nodo paande au mapai. 11 Roo indo, nauliangaana, “Hangangaa nupahawe mbuli lolitana Pue Ala. Hangangaa mopahaweko kana i ngkaia datu hai tauna hangko i ngkaia kadatua, ngkaia pemulea hai ngkaia pakana basa.”