Rodua sabina Pue Ala
11
1 Hangko indo, raweina hambua lai au nodo popehoka, hai rauliangaana, “Laomoko mohoka Souna Pue Ala hai meja pointua dupa. Nuimba wori hangkia kabosanda tauna au menomba inditi. 2 Agaiana inee Nuhoka tabangaa Souna Pue Ala. Lawi tabangaa iti, rapasilolongaamohe tauna au bara to Yahudi, au ina moihe-iheki wanua au malelaha iti i lalu iba pulona hai rombula. 3 I tempo iti, ina Kutudu rodua sabiNgku lao mopahawe NgkoraKu. SabiNgku au rodua iti mehampihe waru ngkasusa, hai mobambarihe NgkoraKu i lalu hasabu rongatu hai ini pulona alona.”a4 Sabi au rodua iti, rapandiri nodo rompoa kau saitun hai rombua biti hulob au meangka i lindona Pue Ala, Ampu humalele dunia. 5 Makuasahe mampopesupa api hangko i lalu nganganda bona mopapate hema pea au mampeinao mobabehi dake irihira. Ido hai liliu mate ope-ope iwalinda au meewa. 6 Ara kuasanda motuko langi bona dati toa uda tanganda mopahawe Ngkorana Pue. Makuasa worihe i ope-ope owai. Owai peisa rapopewali wahe. Ara wori kuasanda mopamasusa dunia hai mampopengaa pepopeahi-ahi, moula peundeanda.
7 Ane hopomi bagonda mopahawe Ngkorana Pue, ina hawe hambaa binata au kadake au moewahe. Ia ina monangihe hai mopapatehe. (Binata au kadake iti iami binata au ina mesuwu hangko i kabe ngkapate au bara tehoka kakaladuna.) 8 Karoonda sabi au rodua iti rapapate, watanda rapogiangaa i tanga rara wanua au mahile. (Wanua au mahile iti, iami wanua karapakuana Ampunda au rapandiri nodo wanua Sodomo hai tampo Masiri hangkoia, lawi kadake mpuuhe ampu boea iti.) 9 Tauna hangko i humalele dunia, hangko i ope-ope kadatua, ope-ope pemulea hai hinangkana basa ina moitahe tomate au rodua iti i tanga rara. I lalu talu alona hantanga rapalikangaahe nodo, lawi bara rakira ratawu. 10 Tauna kadake au maida i dunia ina mampokatana kapatenda nabi au rodua iti. Ina mosusahe hai mombeparaseengihe, lawi nabi au rodua iti, au mampopeahi-ahihe hangkoia, matemohe.
11 Agaiana kaliuna talu alona hantanga, hawemi inao hangko i Pue Ala au mepatuwo. Inao iti mesua i watanda, alana tuwo hulehe; ido hai mearohe hai meangkahe. Hangko indo, rumihimi kalanganda ope-ope tauna au moita apa au mewali. 12 Roo indo, rodua sabi iti mohadi hambua wotu hangko i suruga au mokakiohe node: “Mengkaoremokau mai!” Teore mpuumohe lao i suruga nabalungkuhi gawu, hai pengkaorenda iti raita-ita mata ope-ope iwalinda. 13 Tempo iti, unga pea kelinu mahile. Hangkira hampulo hangko i wanua iti magero, hai pitu sabuna tauna mate. Langa mpuumohe tauna ntanina, ido hai motoiahe Pue Ala, rauli, “Mahile mpuu kuasana Pue Ala au i suruga!”
14 Mewali, liumi kahurewu au karompakana. Agaiana ara mani hampaka kahurewu au ina meusu.
Tatamburu au kapitu ratawue
15 Malaeka au kapitu motawuemi tatamburuna. Hai arahe au monganga-nganga i lalu suruga, rauli,
“Ide-ide poparenta i dunia
i taienami Pue Ala
himbela hai Datu Topehompo au Napileimi
bona Pue Ala moparenta i hae-haena.”
16 Totosae au rompulo hai iba au mohudahe i pohudaanda i lindona Pue Ala, molingkuduhe motumpa menomba Iria, 17 rauli,
“Pue Ala, kamahilena kuasaMu melumbu hangko i ope-opena.
AraKo mpolinguruna hai araKo ide-ide.
O Pue, kiuli ngkaia kamaroana Irio,
lawi Nupatongawami kamakuasaMu au mahile,
hai mepongkamoKo moparenta.
18 Ope-ope tauna au barahe meula Irio,
mohihomohe moewaKo.
Agaiana hawemi tempona Nupopaitaahe karumpuMu.
Hawemi tempona Nubotusi kara-karanda tauna au mate.
Hawemi tempona
nabi au mobambari NgkoraMu,
tauna au meula Irio
hai ope-ope tauna au mobilaKo,
maroa au mahile ba au koi tuwonda,
Nuhurungi babehianda au maroa.
Hawemi tempona Nuhuku tauna au mopakarugi dunia ide.”
19 Hangko indo, tebungkahimi baba Souna Pue Ala i suruga, hai i lalu SouNa raita Peti Podandi.c Liliu mombehangkemi kila, kegumpatami, kelinu, hai toami uda mowua au rumihi.