Ihi pitu pambolia rabumbuha i dunia
16
1 Kuhadi mbulimi hambua wotu au mololita masisimbuku hangko i lalu Souna Pue Ala i malaeka au pituhe, nauli, “Laomokau mobumbuha ihi pambolia karumpuna Pue Ala i wongko dunia!” 2 Lao mpuumi malaeka au nguru-nguruna mobumbuha ihi pambolia pehukuna Pue Ala i dunia. Unga pea meumba bihu au meringkui i tauna au ara tanda binata kadake hai menomba i lengge binata iti.3 Malaeka karoduana mobumbuha ihi pambolia karumpuna Pue Ala i tahi. Owai tahi iti mewali nodo wahe tomate, alana matehe ope-ope au tuwo i lalu tahi.
4 Malaeka au katalu mobumbuhami ihi pamboliana i ope-ope owai hai ope-ope ulu owai, alana ope-ope owai iti mewali wahe. 5 Roo indo, kuhadi hadua malaeka au makuasa i owai manguli,
“Pue Ala au malelaha,
au arami hangko i nguru-nguruna,
hai au ara ide-ide.
Manoto mpuu pehukuMu ide,
6 lawi tauna au i dunia
mopapatemohe taunaMu au bosa;
mopamabubumohe wahenda nabiMu.
Ido hai Nubalimi owai i dunia mewali wahe,
hai Nupaenuahe topepapate iti.
Hintoto mpuu pehukuMu irihira!”
7 Roo indo, kuhadi hambua wotu hangko i meja pohuwea popenomba au manguli, “O Pue Ala, manoto hai hintoto pehukuMu. KuasaMu melumbu hangko i hinangkana!”
8 Hangko indo, malaeka au kaiba mobumbuha ihi pambolia karumpuna Pue Ala i alo, hai alo rawei kuasa mopamararu manusia hai pewangkana au makere. 9 Mararumohe tauna hangko i kamapanana alo au makere ntepuu, ido hai mopapakoimohe Pue Ala, lawi Ia au makuasa i kapari iti. Barahe menoso hangko i dosanda, hai barahe mopangaku peawana tuwona Pue Ala.
10 Malaeka au kalima mobumbuhami ihi pambolia karumpuna Pue Ala i kadera kadatuana binata au kadake iti. I humalele kadatuana, unga pea makaindi, hai ope-ope tauna mokekimohe dilanda anti pantodihanda. 11 Hangko inditi, mopapakoimohe Pue Ala au i suruga anti kamahainda hai bihu iti. Agaiana barahe menoso hangko i babehianda au kadake.
12 Roo indo, malaeka au kaini mobumbuhami ihi pambolia karumpuna Pue Ala i owai mahile au rahanga owai Eprat. Owai iti mati, bona peisa raporarai datu-datu hangko ntanda i Mata Alo mai mombeala. 13 Hai kuita wori seta au kadake ntepuu mesupa hangko i nganga naga. Ara wori au mesupa hangko i nganga binata au kadake, hai au ntanina mesupa hangko i ngangana nabi au mepawuli. Talu seta iti nodohe seo, 14 hai makuasahe mobabehi tanda kuasa. Laohe mokakio ope-ope datu hangko i humalele dunia, raguluhe bona mombealahe i alo pebotusi. I tempo iti, Pue Ala au makuasa ina monangi ope-ope au mampoiwali Pue Ala. 15-16 Mewali, tegulu mpuumohe ope-ope datu hai surodadona hangko i humalele dunia, i hambua paidaa au i lalu basa Ibarani rahanga: Harmagedon.
Nauli Pue Yesu, “Nipehadingi! Ina haweNa i tempo au bara niisa, lawi kahaweNgku nodo topanangka. Morasihe tauna au mainga-inga hai au masilolonga liliu hampinda. Ane haweNa deade, barahe ina lumao mengkabela hai barahe ina maea, lawi masilolongahe Kukahawei.”
17 Roo indo, malaeka au kapitu mobumbuhami ihi pambolia karumpuna Pue Ala i laerawa. Hai hangko i kadera kadatua i lalu Souna Pue Ala i suruga, kuhadimi hambua wotu au mololita masisimbuku, Nauli, “Hopomi!” 18 Hangko inditi, kekilami, kegumpatami, hai kelinumi. Bara mani ara linu au nodo kakebuuna i dunia ide, hungka i karateruna manusia. 19 Mewali, mabikami wanua au rahanga Babeli mewali talu gaana, hai magero worimi boea-boea i humalele dunia au barahe moisa Pue. Pue Ala mohurungi dosanda tauna i boea Babeli au mahile. Napaenumohe hai paenu karumpuNa: Nakarumpui ntepuuhe hai bara ara kamaluluna laluNa irihira. 20 Ope-ope lewuto i tahi matanta, hai bulu barapi ara. 21 Toa wori hangko i langi wua uda au nodo watu kamahilena, monawongi manusia. Haogu, ba arato pae lima pulona kilo kamantimina. Ido hai tauna mopapakoimohe Pue Ala, lawi rumihi mpuu karapopeahi-ahinda.