Naninda topenangi
15
1 Roo indo, kuita mbulimi i langi hambua tanda au mahile hai au mewulungai: pitu malaeka hai pitu pakana pepopeahi-ahi au kahopoana. Ane hopomi pepopeahi-ahi ide, opemi karumpuna Pue Ala i tauna i dunia. 2 Hai kuita ara au nodo tahi kamaembana, lenggena nodo kaca mogalo api. Hai i wiwi ntahi au nodo kaca iti, kuita bosa tauna meangka. Tauna iti au monangihe binata au kadake, lawi barahe menomba iria, barahe menomba i lengge binata iti, hai barahe modoko lamoro au mopahuru hangana. Tauna au menangi iti, meangkahe i wiwi ntahi au nodo kaca, hai mokingkihe kecapi au naweihe Pue Ala. 3 Mamponanimohe nanina nabi Musa,a hawina Pue Ala hangkoia, hai nani pebilanda i Ana Dimba. Node naninda:“O Pue Ala, mahile hai maroa ntepuu babehiaMu,
Melumbu kuasaMu hangko i hinangkana!
Ope-ope au Nubabehi, manoto hai tou.
Oiomi datunda ope-ope tauna i dunia.
4 Pue, hema pae au bara meula Irio?
Hema pae au bara mopangaku kamasukuna tuwoMu?
Lawi Oio pea au malelaha.
Ope-ope tauna batena menomba Irio,
Lawi tongawami katouna pobotusiMu i hinangkana.”
Pitu malaeka hai pitu pambolia au moihi pehukuna Pue Ala
5 Roo iti, kuita hologa malelaha ntepuu au ara i bambaru malelahab au i suruga rabungkahimi. 6 Hai pitu malaeka au moanti pitu pakana pepopeahi-ahi mesuwuhe hangko i Souna Pue Ala. Hampinda rababehi hangko i bana au bula meningki hai au mengkila-ngkila. Pondanda rawewehi bulawa au nodo pampou. 7 I pesuwunda malaeka iti, hambaa hangko i iba pinatuwo au mantoleli i kadera kadatuana Pue Ala moweihe pitu mbuana pambolia hangko i bulawa au moihi karumpuna Pue Ala au tuwo hawe i hae-haena. 8 I tempo iti, Souna Pue Ala i suruga unga pea buke rambu au mesupa hangko i peawana Pue Ala hai hangko i kuasaNa. Bara ara hadua au peisa mesua i lalu, ane bara mani hopo pitu pakana pepopeahi-ahi au raanti malaeka au pitu.