Cetáma 37

Sòsɛ́fù dɔhɔ̀ti

¹ Sàkɔ́pù de kaàdi o báà dawoǹti pesá-dà, Kànàáà teǹka mɛhɛká. ² Ǹtɛ o bííhí wɛɛkú. Sòsɛ́fù de yòǹ dapàǹ-bíitá-dà, è káá beeká píta nà kàyehì, è cɛ̰nti hɔ̰̀ci nà bɔɔhí n'ɔ̀ɔ báàa pooyaàka Bìdáà nà Sììpáà bííhí. Mɛnń-dà de kṵǹ-ní è cakú pa báàa, o kúpùèpa de cakú-sa wɛǹni k'yè pú coó pa hḭ́ǹka. ³ O báàa Sàkɔ́pù de dɔ́sí-ko-dà hádí é ka̰há̰-nà o bííhí tɔɔhí, mìì tee-sá ò de ò pɛdà o kpɛ̰́ńtì-yèǹka-dà. K'óò kpádí àcí tókédi. ⁴ K'òo kúpùèpa bantá é n'hɔ̰́tà pa báàa ò dɔ́sí sàma é pà ha̰tá-nà pa wɛǹni. Kà p'óò n'sɛ̰ɛ̰́. Pa sɛ̰sɛ̰kú mɛhɛká, pà de koò pú hɔ̰́ nɛɛ́ ò wɛɛ́-nà yɔkàma kà kɔ̰ǹni pú yɛɛ̀ni.

⁵ Daadí yènì, K'ó dɔha dɔhɔ̀ti, k'yé weka k'ó tì caka o kúpùèpa, kà p'àá dɔ̀hà óò sɛ̰dá sàma. ⁶ Ò de pà cakáà è yɔ̀: N kúpùèpa-nà! Besí-nà é yekà dɔhɔ̀ti n wontà dɔháà-ti. ⁷ N wontà dɔháà kà ti péé yɛ̀ɛ̀ka mɛhɛká-dà, è boonì pɛ̰́ɛ̰̀ yɔ̀ka yoòboohí. Kà n há̰ cemá n'hɔ̰́tà n kpɛ́ɛtá yídà è nɛ̀hi, kà nɛ kpɛ́hí wɛǹni tɛ̀ni tà yéńtá è wɛ̰̀ḭ̀ ta yìhìka. ⁸ K'òo kúpùèpa yɔ̀: A maàhu badà a mɔ́ńǹ-ní? A maàhu fɔ̰́ń-dà kó n'yòǹ ti wódo é ti n'tee nkɛ́ɛ̀ badà? Ye wɔ̀ni, k'yè há̰ dɔ̀hà pà hḭn-nà sɛ̰sɛ̰kú sàku o hḭ́ǹka, n'ɔ̀ɔ dɔhɔ̀ti kpɛ́mú, n'ɔ̀ɔ̀ de wɛkúma kú bookú ti hḭ́ǹka.

⁹ K'yé m'péé, k'ó tṵ́má dɔha dɔhɔ̀ti tɔɔ̀ti, è té tɛ̀ni tì caka o kúpùèpa è yɔ̀: N té dɔháà-ní dɔhɔ̀ti-dà. N dɔháà, kà wèǹku, nà cḭ̀ma, nà hà̰à̰hi píta nà tàcɔ̰́ kɔ́dì-ní è hìù n yìhìka. ¹⁰ K'ó yídá o kúpùèpa pesá, é táá tì caka o báàa. K'òo báàa óò wɛ́di-nà, è yɔ̀: Dɔhɔ̀ti m̀mɔ́ńti kú bookú-dà a dɔháà-ma ye pesà-ní? A maàhaà è yɔ̀, mmí n'àa màa n'àa kúcààpa, daadí kó pɛdá kà tí tɛ̀ni wɛ̰̀ḭ háá nà teǹka a yìhìka nkɛ́ɛ̀? ¹¹ Ye kú dàhàka-dà, k'òo kúpùèpa óò m'púsí sɛ̰sɛ̰kú, k'òo báàa mɛnn taàa ye dɔhɔ̀ti o piidí mɛhɛká, è té m'maàhu ti hḭ́ǹka.

Sòsɛ́fù yɛdàma

¹² K'òo kúpùèpa taá pa báàa hɔ̰̀ci n'ɔ̀ɔ bɔɔhí cɛ̰ntàpu Sìsɛ́m̀ teǹka bɛ́ka. É kà m'péé-ho, ¹³ daadí yènì, kà Sàkɔ́pù yíí Sòsɛ́fù è yɔ̀: Sòsɛ́fù! K'ò yɔ̀: Ǹtɛ mmí. K'ò yɔ̀: A kúpùèpa cɛ̰nti hɔ̰̀ci Sìsɛ́m̀ teǹka bɛ́ka, ya̰ní kà m'áa tɔn pa pesá. ¹⁴ K'ó tɛ̀ni, kà Sàkɔ́pù yɔ̀: Taá dɛ́há k'àa kúpùèpa nawɔ̰̀ǹti kpenì nà nɔtí pà túdí-ti, é tóní é tɛ̀ni n caka. Òò tɔn-sá-dà, k'ó yídá Hèbùnɔ́ɔ̀ pɔ̰sàku, é taá háá nà Sìsɛ́m̀ teǹka mɛhɛká. ¹⁵ É tɛ̀i ò pú pà dɛ́hà. Kà nìdo òcɔ̰́ǹ óò pèta-nà k'ò cèǹtì cèǹtì foǹni mɛhɛká, k'yèe yaǹn óò béka è yɔ̀: A pɛnti ba? ¹⁶ K'ò yɔ̀: N pɛnti n kúpùèpa-dà. K'à yá̰á̰ pà yɛ̀ɛ̀-ka bɛ́ka nà pa nɔtí, m'aa sɛ́úkú-ma, k'á n caka. ¹⁷ K'yèe nìdo óò tɛ̰́ná è yɔ̀: Pà yɔ̀a yídápu miì-ní. N cetà you kà pà tonà, pà kɔ́dí Dòtá̰à̰ teǹka bɛ́ka. Ye wɔ̀ni, kà Sòsɛ́fù tṵṵ̀na o kúpùèpa dàhàka, é táá pà dɛ́há Dòtá̰à̰ teǹka mɛhɛká.

¹⁸ Kà p'óò dɛ́há-ní nà dɛùma, k'ò mum pú pà tɛ̀i-ho, kà pá cemá múná nùdi è yɔ̀ p'óò kɔ̀ù. ¹⁹ Ye wɔ̀ni, kà pá caka pa tɔɔ̀pa è yɔ̀: Toò-ò! Ǹtɛ-nà ye dɔhɔ̀ti wódo k'ò pení. ²⁰ Wɔ̀ni-dà mɛmà, nɛ́ héé kà t'óò kɔ̀ù óò wɛ́í bínhì mɛnhì hi tàcɔ̰́ kú mɛhɛká. Kà ti kṵn, kà tí caka è yɔ̀ nɔɔsḭ̀ǹta tàcɔ̰́tà òò dii, ye wɔ̀ni ti bá dɛ́há o dɔhɔ̀ti kó hḭmp'áa? ²¹ Kà Hùdùbɛ́nì, pa kúpùèyo kpɛ̰́ǹn é mà yèkà, é pa̰á̰ ò kó hḭmpú é dontá Sòsɛ́fù wɔ̰ǹni. K'ò yɔ̀: Ti dá yetá óò kɔ̀ù-nà. ²² K'ó tṵ́má tuɛ̀ha è yɔ̀: Dá teha é pa̰á̰-nà fɔ̀ùdi. Ò ká̰ńtá-nà taweekù bíńtadà mɛntà kú mɛhɛká, é héé n'aa ò kɔ̀ù-ma. Ò de pà cakú mɛma, è kpɛ̀i dontá Sòsɛ́fù wɔ̰ǹni-dà, óò tɛ̰́ná-ní o báàa.

²³ Sòsɛ́fù tɛ̀ni tḭ́ń wɔ̀ni pa pesá, kà pá dɔdi o hḭ́ǹka, óò cɛ̰dí, é bátá o àcí tókédi ò de báá-di, ²⁴ ye wɔ̀ni óò ká̰ńtá bḭ́ńtadá mɛhɛká, kà nɛ́a tà kɔ́ɔ́. ²⁵ Kà pá yɔ̀a miya̰ è há̰ kaàdi è kó dii, é diìda é n'hɔ̰́tà daa-tantam̀ma, Ìsìmàyèdítìpa fɔɔ̀di-ní naafá, è yɛ̀ni nà yɔtí pà toò-ti Kàdàhátì, kà pa bɔnamáti toó tùdàdépa nɔ́kpekú kpɛ́ɛpá boocí dɔ́ɔ́di, kà pà kɔ́dí-nà Èsípútì teǹka mɛhɛká. ²⁶ Ye wɔ̀ni, kà Sùdáà caka o kúcààpa è yɔ̀: Ti kó cɔ́ńtì badà n kpɛ́ɛpá-nà, kà ti kɔù ti ya̰ǹn è sɔ̀nà o hḭ̀ma? ²⁷ Yàà t'óò yɛɛ-nà Ìsìmàyèdítìpa é ta̰ǹta díící, é hédá t'aa bɛ́tá-ma o wɔ̰ǹni kpeèsa. Ò yòǹ ti ya̰ǹn-dà-ma, ti báà-fɔ̰̀di. K'òo kúcààpa teha ò hḭ́mpú. ²⁸ Kà Màǹdìyá̰à̰ taǹtam̀ma, ye Ìsìmàyèdítìpa é tɛ̀ni é n'kɛ̰hɛ̰di, kà p'óò dèna-ní ye bíńtadá mɛhɛká, óò pà yɛɛ-nà díi-máàka púdɛ́ɛ́. Kà p'óò dontá óò ka̰há̰-nà Èsípútì teǹka mɛhɛká, kà Hùdùbɛ́nì yè kɔ́ɔ́.

²⁹ Kà Hùdùbɛ́nì yɔ̀a tóní bíńtadá pesá, é tɛ̀ni dentá ta mɛhɛká ò koò p'óò dɛ́hà. K'ó cemá cɛ́tá o tóhòka, mìì bɛkú-sa è yɔ̀ o yàma cɔ̰há̰à̰ sàma. ³⁰ K'ó tón o kúcààpa bɛ́ka, é tɛ̀i è yɔ̀: N caapá-nà! Sòsɛ́fù koò pú yè kadí-ì? Ntɛ́ mmí há̰ hɔ̰mù sá̰mà-ní? ³¹ Kà pá cɛ̰ɛ̰́ bɔɔdadí é hɛ̰dá, é tódá ye Sòsɛ́fù tókédi é nì kɔha hḭ̀ma. ³² É yídá, é tɔn nànànkú pa báàa pesá n'ɛ̀ɛ tókédi, è yɔ̀ pá táá ò caka è yɔ̀: Pà dɛ́tà-ní niì miì-dà. Ó cɔ́ɔ́ sukú é dɛ́há k'yè dá yetá n'yòǹ o bíitá tókédi. ³³ Kà Sàkɔ́pù bantá tókédi, é pùu-ní è yɔ̀: N bíitá tókédi-dà. Nɔɔsḭ̀ǹta-dà ò cɛ̰tà cɛ̰tà óò dii mɛmà-ní? ³⁴ K'ó cemá cɛ́tá o tóhòka, é yèi píídi, é kaàdi o bíitá kṵ́mú daàka dɔ́ɔ́di. ³⁵ K'òo bííhí wɛǹni é tɛ̀ni óò sɛ̀ùda, k'ó yeda pa sɛùdamá wɛǹni, è yɔ̀: N kó n'kɔǹ n bíitá kṵ́mú-dà, é n'sànà n kó tà tṵ̀na tḭ́ń daadí kpííku mɛhɛká. K'ó sɔ̰kadá è baà hódì ta kpɛ́mú. ³⁶ Kà ye Màǹdìyá̰à̰ nììpa mɛmpa, é tanà Sòsɛ́fù Èsípútì teǹka mɛhɛká, é tɛ̀i óò yɛɛ-nà nìdo òcɔ̰́ǹ kà p'òò tonà Pòtìfáà, k'ò de yòǹ niìsào wódo^a nahà̰ku mɛhɛká. Ò de tṵ́mà yòǹ, mɛ̀m̀pà ceí-pa wódo nahà̰ku kpɛ̰́ǹn-dà.