¹ Mataanoe tunne Anahatana ihaye tau tuniai reini pusiki. ² Tuniai rei eremono wae erewae-wae. Putie hae, putie hae nitae tuniai tewa. Anahatana ne Inaha ihasa-hasa pusu waene hahae.

³ Anahatana iaisosi tuniai wani erepumonoi. Iahata, “Manahane.” Oyo manahane. ⁴ Inoo tau rei iake. Reiso inea manahane rei rerihoni pumono. ⁵ Oyo ihete manahane rei tau “Manahane.” Ihete mono rei tau “Pumono.” Nene pumono rei ereniku oyo omnanoe. Areimo onone wani mataanoe.

^6-7 Ita iasau osi waene rei, “Asamaya tau ua, asuka suru roe, asuka suru poe.” Reiso rasuka rapusu Anahatana iasau rei. ⁸ Ihete waena uare tihue rei tau “Nante.” Nene onone rei ereniku oyo omnanoe. Areimo onona ua nea.

⁹ Ita iahata, “Waene wapo nante nohue amanoua tau osa na tuamane nooi.” Reiso ereuna sani Anahatana iasau rei. ¹⁰ Ihete tuamane rei nanae tau “Ria muni.” Ihete waene wani remanoui rei tau “Nuae.” Inoo tau rei iake.

^11-12 Ita iahata, “Ria muni mo, atuhu waroni nita-nitaya oruhu. Oruhu roe na omi panesi. Atuhu waroni nene huaya kania. Aiu waroni nene huaya kania.” Oyo raruhu sani Anahatana iaisosi rei. Inoo tau rei iake. ¹³ Nene onone rei ereniku oyo omnanoe. Areimo onona tonu nea.

¹⁴ Ita iahata, “Wani osita roe nante ohoka. Wani osita tau manahane, wani osita tau pumono. Osita na oautuu onona, hunana, umetena. Oautuu musum ihata, musum runna. ¹⁵ Osita tuniai.” Oyo rasita sani Anahatana iasau rei. ^16-18 Reiso ihaye tau ranie na eresita tau manahane, hunane na eresita tau pumono. Oneu iae rasita tau mono. Iautue ranie, hunane, runa oneu na rasita tuniai. Rasita oyo inoo tau rei iake. ¹⁹ Nene onone rei ereniku oyo omnanoe. Areimo onona ate nea.

²⁰ Ita iahata, “Poe waene nosite, poe nuae nosite, ikaya, nunu, runa pusire uture ohoka. Roe nante manua orihu.” ²¹ Ita iahata, “Poe waene nosite, poe nuae nosite, ikaya, nunu, runa pusire uture ohoka. Roe nante manua orihu.” ²² Irui iake osi ikaya, manua pusire iahata, “Osusu haha na ouna nuae, waene, runa nante nohue reini taua.” ²³ Nene onone rei ereniku oyo omnanoe. Areimo onona nima nea.

²⁴ Ita iahata, “Tuamane ahoka binatang ria muni waroni hikina mainaya pusire uture.” Oyo rahoka. ²⁵ Reiso Anahatana iuna pusire oyo inoo tau rei iake.

²⁶ Ita iahata, “Mai na ita ihaye tau mansiau pusu ita nitari. Mka sio no kawasa tau ikaya, manua, runa binatang ria muni pusire uture.” ²⁷ Reiso Anahatana ihaye tau mansia nitao sani ia ruai. Ihaye tau ia pina runa ia hanaie.

²⁸ Reiso irui iake osiso iahata, “Osusu haha panesi na orue tau tuniai reini pusiki. Omi mo kawasa tanui. Omi mo kawasa tau ikaya nau nuae, manua roe nante, runa binatang ria muni pusire uture.

²⁹ Urui atuhu pusire uture waroni nene kania, nene huaya tau me muaine. ³⁰ Ne osi binatang runa manua pusire uture urui monota runa aiu waroni nene totua tau nene muaina.” Oyo rapusu ia iasau rei.

³¹ Inoo pusire uture waroni ihaye tanure rei iake mainae. Nene onone rei ereniku oyo omnanoe. Areimo onona nome nea.