³ Musum isa pusi isa Elkana ieu pani nia Silo nanie iainisi iainaa runa Anahatana waini ne kawasa mainae erenesi pusire. Nanie ikenu makapana osi Anahatana. Tau muie rei Eli ne hehuka hanaia Hofni runa Pinehas uaso wasoni sio mamkenu makapanau osi Anahatana. Sio oanori runa Anahatana. ⁴ Sui supani mani Elkana ikenu makapana osi Anahatana isama pahakiani tau makapana rei nene henate. Sahai Penina runa ne hehuka pinau, ne hehuka hanaia osupu no pahakiani. ⁵ Ne masike anoi runa Hana iae, isamai tau ne pahakiani osa mani. Tau sae? Anahatana iunai imutui. ⁶ Anahatana iunai imutui reiso Penina iaumaniki na anoi ererau. ⁷ Musum isa pusi isa iaumaniki sanrei. Sui supani mani Hana ieui roe Anahatana ne numa mainae, Penina iaumaniki rotu-tu irani. Ipenei iai. ⁸ Sahai Elkana iasei tanui, “Hana. Ano wani arani tau sae rei? Ano pene ai tau sae rei? Anomu ererau tau sae? Nene iake mo, akata au ruaku. Areimo iake erenesi me hehu hanaia hutusa tea.”

⁹ Elkana ieu ikata ne hehuka pusiso runa ne pinau uaso. Oeu pani nia Silo. Taue isa oaiso suka, oyo Hana ihitioi. Hitio roe samatoro ieu roe Anahatana ne numa mainisie. Eli, ia mamkenu makapanau osi Anahatana, wairo irue tau katera isa haineke mitanunue nene hini roe Anahatana ne numa mainisie rei. ¹⁰ Hana anoi repunoko ruai. Irani panesi iainisi tau Anahatana. ¹¹ Itotoe osi Anahatana iahata, “Upuku Anahatana wani me kawasa erenesi pusire. Au mo, me manorine. Uainisi na anoo sapani na anoku ererau. Uainisi na ano aakahaiku na ususu ia iki hanaie isa. Sani ususu ia iki hanaie isa, mka uruiki osia rotu-tu imatai. Mka sio okoma unui tewa.”

¹² Hana iainisi rotu-tu potuina, oyo Eli inoo hohai. ¹³ Iainisi pani anoi ne sihurui nisu-nisue. Nioi erehoka tewa. Reiso Eli iahata kani ininu panesi rotu-tu imukei. ¹⁴ Iasau osiki, “Ano ahokaya mai, ano amukea. Inasa samatoro me mukena rai raheuso? Apesi me anggur nene sanaute nea!”

¹⁵ Iahata, “Upu. Umukeku tewa. Uninu tihu minne tewa. Ne anoku repunoko ruaku reiso wani uainisi tau Anahatana. Wani usima runa we makanokona pusire osiki. ¹⁶ Pene aahata au mo, wani au pina nesi-nesie. Uainisi sanreini tau anoku ererau.”

¹⁷ Iahata, “Munata sanrei, aeu ia-ia. Uainisi na Anahatana waini ita Israel iainisi iainaa runai, irui osia sae wani ano aainisiki rei.”

¹⁸ Iahata, “Uainisi na anomu erenoa iake rerihoni au sui osa.”

Oyo Hana ieui. Ieu iaiki, anoi ererau tewa nea.

¹⁹ Nene hanroe oyo Elkana, ne hehuka pusiso runa ne pinau uaso ohanu omnano tunne, oyo oainisi oainaa runa Anahatana. Oainisi suka, oyo onuniso pani nia Rama honu. Elkana inekei ikata sahai Hana oyo Anahatana irui osi Hana sae wani iainisiki rei. ²⁰ Tinaini taua oyo, isusu ia iki hanaie. Ihete nanai tau Samuel. Iahata, “Uainisiki, Anahatana iruiki.” Samuel mo, atinui sani sou Ibrani wani nene manariti “Anahatana iatinu.”

²¹ Elkana sio onuniso on pani nia Silo musum osa nea, oyo nanie oeuso honu sani musum isa pusi isa. Nanie okenu makapana osi Anahatana honu. Naone Elkana itotoe osi Anahatana. Muie reini waini nanie iuna sani itotoe rei nea. ²² Ne Hana ipusu tewa. Iasau osi sahai sanrei, “Mka sahoro ueu. Napa rotu-tu Samuel iarihoni isusu ee. Iarihoni susu mka uautunui pani Anahatana ne numa mainisie. Mka iruei pani rei sui osa.

²³ Elkana on poe iasau, “Rerihoni ruamu. Pusu ruamu me maue, areimo iake. Napa mai rei rotu-tu iarihoni susu. Hete sae, Anahatana iuna sui ne anamanae.”

Reiso Hana iruei mai numa rotu-tu ia ikine rei iarihoni susu.

²⁴ Samuel iarihoni susu nea, reiso inai sio oeu oautunui pani Anahatana ne numa mainisie pani nia Silo. Ne ia ikine asi. Sio orori koropou hanaie isa wani nene musum tonu. Orori manei (manei, nooi sani ana). Manei kilo hutusa runa tasi unte wani taue tau anggur nene sanaute oi. ²⁵ Sio orehi koropou rei oyo oautunu ia ikine rei osi Eli. ²⁶ Hana iasau osi Eli, “Upu. Anomu erepeka runa au oi? Au mo, naone asupuku uooku mai nusumu rei. Uooku uainisiki tau Anahatana rei. ²⁷ Ia ikine reini sahoro uainisiki rerihoni Anahatana. Irui sae wani uainisiki rei nea. ²⁸ Reiso nanie urui ia ikine rei osi Anahatana na ianori runai rotu-tu imatai.”

Hana irui ia ikine rei suka oyo, pusiso oainisi oainaa runa Anahatana.