¹ Anahatana iasau osi Nuh, iahata, “Hasae ano sahoro atinu tanuku. Hasae ano sahoro anomu manisate. Ne sio pusiso mai tuniai reini oatinu tanuku tewa. Reiso anusua pani arupae anoe. Anusua akata sahamu, me hehuka tonuso runa no pinau. ² Rerihoni binatang nitaya pusire uture waroni oaire iake oakanupure osiku iake, arori pina runa hanaie unua itu. Ne rerihoni waroni oamaonire mo, arori unue osa mani. ³ Rerihoni manua nitaya pusire uture waroni oaire iake, oakanupure osiku iake arori unua itu oi. Ne rerihoni waroni oamaonire mo, arori unue osa mani. Arorire pani arupae anoe na ramahaiso. ⁴ Nesie iturei, una uane mainae rotu-tu onona hutu ate. Au mka uhunu pusi mansiau runa binatang waroni uhaye tau pusire rei.” ⁵ Reiso Nuh iuna sae waroni Anahatana iasau osiki rei.

⁶ Waene eresaa mai tuniai reini mo, Nuh ne musum utuni nome. ⁷ Nuh runa sahai, ne hehuka tonuso, runa no pinau onususo pani arupae anoe rei. Onususo na pene omokoso tau waene eresaa rei. ^8-9 Manua runa binatang nitaya pusire uture ranusu pusire rakata Nuh sio. Ranusu unue erepusu unue. Waroni oaire iake, oakanupure osi Anahatana iake runa waroni oamaonire. Ranusu pusu Anahatana iasau rei. ¹⁰ Ereruma onona itu nau oyo, waene eresaa. Eresou tuniai reini pusiki.

¹¹ Nuh ne musum utuni nome pannuhu hunana ua umetene wani onona hutusa rahana itu. Oyo wae huhuna rasaa pusire mai tuniai reini. Sira tau waene erenia eresaa suru ria suru nau noo sani waene sanane. On roe nante mo, sira tau waene erenia sanrei oi. Noo sani sio ohuka mitanunue wani erenete waene roe nante. ¹² Uane rotu-tu onona hutu ate.

¹³ Tau ranie hatae rei Nuh sio pusiso onususo pani arupae rei anoe. ^14-15 Binatang runa manua pusire uture ranusu oi ¹⁶ sani Anahatana iasau rei. Onusu pusiso sanrei oyo, Anahatana iraru arupae rei nene mitanunue.

^17-18 Waene eresaa rei rotu-tu onona hutu ate. Waene eresaa mainae reiso arupae rei remamanui. ¹⁹ Waene eresaa rotu-tu noo mosa tinetaya tewa nea. Masike tinetaya waroni mainaya naiosa iae, noo mosa nene hahaya tewa nea. ²⁰ Waene eresaa suiosa reiso ereniku tinetaya waroni mainaya rotu-tu meter itu. ^21-23 Anahatana ihunu pusire waroni rakarihuru ramahai mai tuniai reini. Ihunu mansia, manua, binatang pusire uture. Wasoni ihunuso tewa mo, hasae Nuh runa pusire waroni ikatare pani arupae anoe rei. ²⁴ Waene rei erekaisunu tewa rotu-tu onona utuni hutu nima.