16
Ismael Iamrai
1 Abram iruei mai otoe Kanaan ne musum hutusa nea. Ne sahai, Sarai mo, isusu tewasi. Tau rei ne ia pina makahaie isa iruei ikataso. Ia makahaie rei, ia pina Mesir. Nanai Hagar. Ia makahaie rei ia pina hehuke asi. Reiso Sarai iasau osi sahai, “Anahatana iruiku ususu tewa. Reiso nene iake mo, anana re makahaie reini tau sahamu. Na hitio isusu osiku.”
Oyo Abram iamanaku. Sani rei oyo, Sarai irui Hagar osi Abram tau sahai muie. 4 Reiso Abram inanai. Inanai oyo, sahai muie rei tinaini taua. Ne sahai muie rei ianei ata tinaini taua, reiso inana hatia tau Sarai. Iunai iake tewa.
5 Oyo Sarai iasau osi sahai, “Au urui Hagar, re makahaie rei, osia tau sahamu nea. Ne ianei ata tinaini taua oyo, iunaku iake tewa. Ano sahoro asana. Ne napa sahoro Anahatana inoo uata re isanae reini, na iasau ata ia seia sahoro ne manisate runa ia seia sahoro isana.”
6 Iahata, “Me makahaie rei, tea. Reiso ruamu auna sae mani tanui. Ano me kawasa tanui. Aunai pusu ruamu me maue mani nea, tea.”
Oyo Sarai ne hau tanui suiosa. Reiso rotu-tu Hagar irumai.
7 Irumai oyo sira tau Anahatana iatuhete ruai osiki nooi sani ia maisosie on roe noiyaha. Iatuhete ruai osiki haineke wae huhune poe arena nusue poe oto huie. Arena rei nanie ereeu poe nia Sur. 8 Iatuhete ruai iahata, “Hagar! Sarai ne makahaie! Ano on supa, nanie aeua supa?”
Iahata, “Upuku. Nanie urumaku arihoni upuku.”
9 Iahata, “Anunia pani tanui na apakariani osiki. 10 Au mka urui mea upu momou panesi. Mka rotu-tu sio orekeni kuaso tewa. 11 Potuina tewa oyo, mka asusu me ia ikine hanaie isa. Ahete nanai tau Ismael. Tea mo, ano arani Anahatana iatinu. 12 Ne anamu hanaie rei, mka iatinu tau maunauna tewa. Mka ituntana runa mansiau panesi. Sio mansiau iae, mka otuntana runai oi. Ia mka iruei ikata ne mansiau tewa.”
13 Hagar iasei pani anoi, “Kani unoo Anahatana nea reisi? Anahatana waini ino-noo au suiosa!” Reiso ihete Anahatana nanai tau, “Anahatana waini ino-noo.” 14 Reiso sio oaoi wae huhune rei tau Lahai-Roi. Nene manariti, “Ia waini iamahaiki waini ino-nooku ne wae huhune.” Wae huhune rei wapo nia Kadesy runa nia Bered tihue. Wapo rotu-tu reini.
15-16 Abram ne musum hutu wanu rahana nome oyo Hagar anai hanaie iamrai. Oyo amai Abram ihete nanai tau Ismael.