21
Ishak Iamrai
1 Abraham ne musum utuni. Ikore-korei iamtuai nea. Oyo Anahatana irui iake osi Sara sani Ia ruai itotoe rei nea. Sara anai hanaie iamrai tau hunane wani Anahatana ruai iaunutu umetene tanui. Oyo amai ihete nanai tau Ishak. Tau Ishak ne onona itu amai irehiki. Naone Anahatana iaisosiki irehi sio iki hanaia pusiso. Reiso irehi Ishak oi.
6 Ishak iamrai poe, oyo inai iahata, “Anahatana irui iake osiku reiso uaumani. Tea mo, ukaumini. Sio pusiso oatinu ata ususu nea mka oaumani, okaumini okataku. 7 Naone sio oasei tau sahaku, oahata, ‘Ia pina reino mka isusu?’ Masike amai ikore-korei iamtuai nea iae, ususu osiki sirinia.”
8 Ia ikine rei ipira iruhu. Iruhu ia mainae mkane nea, oyo inai iarihoni susu runai. Iarihoni susu reiso ouna karisaa mainae.
Abraham Inei Ismael runa Inai
9 Taue isa Ismael, Abraham anai hanaie rei, iaumani Ishak. Ishak inai tau Sara, ne Ismael inai tau Hagar, ia pina Mesir rei. 10 Sara inoo sanrei oyo, ipenei tau Ismael nea. Reiso iasau osi Abraham. Iahata, “Nei ia pina makahaie reino runa anai rei. Upeneku tau usama ano me numa hutae reini tau ua. Kahurae anaku hanaie Ishak isupu pusire oo! 11 Ne Abraham ipenei tau iatinu sou nanae rei asi. Tea mo, Ismael iae anai oi. 12 Ne Anahatana iasau osiki. Iahata, “Pene anomu reuponu runa me makahaie runa anamu hanaie rei. Apusu Sara ne maue rei. Tea mo, arihoni Ishak sahoro asupu mea upu momou wasoni utotoe osia nea rei. 13 Ne Hagar anai Ismael iae mka sanrei oi. Mka au una nea upu momou panesi oi. Tea mo, ia iae, anamu oi.”
14 Nene hanu omnano tunne sanrei oyo, Abraham irui no wekau. Iaiinu tihu tau tasi wani sio onanai arihoni makapana unte. Tasi rei Abraham iakatanai mai Hagar sanini ukune. Oyo iaisosiki ieui runa anai rei. Uaso oeu oneka pusi otoe huie wani nanae Bersyeba. 15 Oeu rotu-tu no tihu wani ororiki rei pusiki, oyo Hagar iautue anai poe ai hasa-hasan isa nohue. 16 Oyo iruei hainau mkane arihoni anai sani sio oana niune ereruma remnahu hainau arihoniso. Iasau pani anoi, “Upeneku tau unoo ia ikine rei imatai asi.” Reiso irani.
17 Ia ikine rei irani oi. Anahatana iatinui. Reiso ne maisosie on roe noiyaha ioi Hagar on roe nante. Iahata, “Hagar. Anomu reuponu runa sae rei? Pene akaitau. Anahatana iatinu anamu irani nea. 18 Eua haineke anamu reipani na apamanui. Au mka una nea upu momou panesi.”
19 Oyo Anahatana iuna Hagar inoo iake. Reiso inoo parike isa. Inooi oyo, ieu pani, iripa tihu, samatoro iaiinui tau ne tasi rei honu. Iaiinui pusi oyo, iuna anai ininu.
20-21 Anahatana ikata runa Ismael. Reiso ia ikine rei iruhu nanie ia mainae nea. Orueso ria oto huie wani nanae Paran. Ia ikine rei ianei irime henue, ianei iana iake nea. Inai iaisosi runa ia pina Mesir isa tau sahai.
Abraham runa Abimelekh Uaso Osopa
22 Tau rei ia ona aia Abimelekh runa ne kapitane, Pikhol, ohokaso mai Abraham. Oahata, “Anahatana iakahaia tau me pakariani pusire waroni ananare rei. 23 Reiso mai na asopa mai Anahatana uai anoe. Asopa ata ano mo, mka akarota au tewa runa we hehuka wea upu momou pani muie. Sani we iake runaya, reiso auna iake osi au sanrei oi. Auna iake osi au runa sio mai tihue otoe wani aruea reini.”
24 Iahata, “E-e. Iake. Mka usopa sanrei.”
25 Ne Abraham iamanaru Abimelekh ne makahaia osiki. Iahata, “Me makahaia owahu parike arihoniku nea.”
26 Iahata, “Au uanei tewa ata ia seia iwahui. Asima na reini osiku tewasi. Reiso mato uatinu reini tea!”
27 Oyo Abraham irui rompau runa koropou umau osi Abimelekh. Oyo uaso osopa. 28 Abraham ianena rompa anaya itu. 29 Ianenare oyo Abimelekh iasei, “Amuna na anena rompau rai rei?”
30 Iahata, “Ananare noi, na uanei ata ano amanaku ata au sahoro ukani parike reini tea.”
31 Reiso tihue rei nanae Bersyeba tau poe rei uaso osopa. Bersyeba nene manariti “Parike Mamsopae.”