23
Sara Imatai
1 Sara iamahaiki rotu-tu ne musum 127 2 oyo imatai. Imatai mai nia Hebron mai otoe Kanaan. Abraham anoi repunokoi runa sahai reiso iatamisiki.
3-11 Ta sanrei oyo ihitio ieui iarihoni sahai waipo inutu rei. Ieu poe iasei tau sio Het. Sio Het rei wasoni orueso oasau osi umau mai kota nene mitanunue. Iahata, “Wea amau. Au reini mo, au rakane wani urueku mai mo niane reini oi. Reiso uainisi arihonimo, na oaheni mo tihu otoe isa osiki. Tihu otoe wani nene hatu nohue na uaunutu sahaku tanui.”
Oahata, “Upu. Ami anoo ata Anahatana inoo ano mo, ano mainae. Reiso aunutu sahamu mai ami mani hatu nohue wani iake mainae. Ia isa arihoni ami reini pusima mo, asahunuti ma hatu nohue arihonia tewa na aunutu sahamu.”
Oyo Abraham ihitio irike tune iakapuni sio Het rei aio. Iahata, “Wea amau. Uainisi arihonimo. Sani mo maue na uaunutu sahaku mai rei, reiso oasau osi Efron, Zohor anai hanaie rei. Oasau osiki na iaheni ne tihu otoe wani nene hatu nohue osiki. Ne hatu nohue rei nanae Makhpela wani haineke ne nisi nusue. Oasau osiki na iaheniki osiku na usenui osiki. Usenui samatoro uaunutu we sio matana mai mo otoe reini oi.”
Abraham waimo iainisi arihoniso rei, ne Efron, ia Het rei waini ne tihu otoe rei tutui oi. Irue ikata sio Het rei pusiso oi. Reiso iahata, “Tewa upu. Hatu nohue runa nisi rei mka uruiki osia sanrei mani. Uruire osia mai we mansiau uao anoa. Uruire na aunutu me sio matana tanui.”
12 Abraham iatinu sanrei irike tune isopa kokuro pusiso. 13 Irike tune samatoro iasau osi Efron. Iahata, “Efron. Atinu tanuku ee. Au, mka usenu me nisi runa me hatu nohue rei. Uainisi arihonia na anana kepeni raini tau nene hunonia. Na uaunutu sahaku tanui.”
Uaso oanamana rei, sio Het pusiso wasoni oru-rueso oatinu no anamanae rei.
14 Abraham nanie isenure ne Efron iahata, 15 “Upu. Uainisi arihonia. Tuamane wani poe hatu nohue runa nisi rei hunonie hasae perak inata utuni ate. Uata ioi umau tau neta, reiso uhete hunonie mainae tewa. Aunutu sahamu poe hatu nohue reipo.”
16 Iahata, “Iake. Mka usenure.”
Reiso masike ihete hunonie mainae sanrei iae, iheu perak waroni Efron iasau runare, areimo perak inata utuni ate. Iheure pusu sio manahenia. Isenure osi Efron, sio Het pusiso wasoni ono-noo.
17 Isenure nea oyo, Efron ne tuamane wani poe Makhpela poe Mamre on ria hae rei osi Abraham. Nisi runa hatu nohue runa aiu poe nisi rei pusire osiki. 18 Sio Het pusiso wasoni oru-rueso poe kota nene mitanunue rei oanei ata tuamane reimo osi Abraham nea.