¹ Imatai oyo Yusuf ipesi ruai iatipuni amai irani imuki amai uai anoe. ² Irani pusi oyo iaisosi sio wasoni oasamau sio matana tau upati wani ereuna sio okopu tewa. Reiso iaisosiso ouna osi amai. ³ Osaka ososa-sosa sio matana tau upati rei rotu-tu onona hutu ate reiso sio ososa-sosa Yakub ne patane rotu-tu onona hutu ate. Sio Mesir orani anoo rapunoko Yakub rotu-tu onona hutu itu.

⁴ Sio anoo rapunoko Yakub pusi oyo Yusuf iasau osi ia ona aia ne makahaia, iahata, “Oasau na we anamanae reini osi re ia ona aia, ⁵ oahata, ‘Tau amaku nanie haineke imatai rei, iaunutu hako osiku. Iahata, “Munata umataku mo, saka oaunutuku pani hatu nohue wani ukaniki matane nea. Hatu nohue rei wapani otoe Kanaan.” Reiso tapiku na uaunutu amaku ee. Uaunutu amaku pusi samatoro on pani ununiku mai.’”

⁶ Osima osi ia ona aia oyo iahata, “Iake. Eu na aunutu amamu sani ne hako osia rei.”

⁷ Reiso Yusuf ieu iaunutu amai. Ieu ikata sio panesi. Ikata ia ona aia ne makahaia, sio onata tau ne numa, runa sio onata tau otoe Mesir. ⁸ Sio wasoni orueso okata Yusuf, runa nea kakau na wanini, runa sio wasoni orueso mai amai ne numa oeu okatai oi. Hasae sio wasoni orueso mo, sio ikina runa no makapanau oarihonire mai otoe Gosyen. ⁹ Sio wasoni osaa kareta wani naitanane ereroriki iae oeu oi. Reiso sio panesi oeu.

¹⁰ Taa ohokaso pani otoe wani opapa manei. (Manei, nooi sani ana.) Otoe rei nanae Goren-Haatad, pani Wae Yordan on pani hae. Ohoka pani oyo anoo rapunoko ruao reiso orani nio mainaya. Reiso Yusuf ipusu monne iatamisi amai rotu-tu onona itu. ¹¹ Taa sio poe otoe Kanaan onoo ata anoo rapunoko ruao pani Goren-Haatad oyo oahata, “Kasiane! Sio Mesir rei opusu no monne oatamisi ia matane rei anoo runai mainae.” Reiso ohete otoe rei tau Abel-Mizraim. Nene manariti “Sio Mesir anoo rapunokoi”.

¹² Reiso Yakub ne hehuka ouna sae wani iasau osiso rei. ¹³ Orori ia matane rei poe otoe Kanaan na oaunutui pani hatu nohue pani nia Makhpela wani Abraham ihane arihoni Efron ia Het rei nanie iaunutu sio matana pani anoe. Hatu nohue rei wapani nia Mamre on pani hae. ¹⁴ Taa iaunutu amai pani hatu nohue pusi oyo inuniki na poe Mesir ikata nea kakau, wanini, runa sio wasoni okatai suru pani oaunutu amai rei.

¹⁵ Taa oaunutu amai pani hatu nohue oyo onuniso poe otoe Mesir oyo Yusuf nea kakau okaitaui pene rotu-tu ihunuso. Reiso oahata, “Munata Yusuf anoi erepeka runa wani naone iaheniki rei, mka ihunuta. Reiso sapani na ita?”

¹⁶ Anoo rapeka runa no masana rei oyo oaisosi ia isa poe iasau na no anamanae reini poe osi noa wani. “Tau amari imatai tewasi ¹⁷ iasau osima ata nanie ami asau osia sanrei, ‘Uainisi arihonia na pene apasana mea kakau tau no masana wani naone ounai tanua rei.’ Reiso ami ainisi arihonia na pene apasanama tau mani masana wani naone aunai tanua. Ami aanori runa Anahatana waini amari iainisi iainaa runai.”

Yusuf iatinu sanrei oyo anoi mtinte. Nea kakau oparisaa tanui tewasi reiso matai waena.

¹⁸ Oyo nea kakau ruao ohokaso mai tanui. Ohokaso mai ohahue mai tanui. Oahata, “Ami auna maniane tanua.”

¹⁹ Ne Yusuf iahata, “Pene okaitauku. Tau au mo, ukati Anahatana? ²⁰ Ruamo oapamata sou nanie ouna kahatene tanuku ne Anahatana ikati kahatene rei tau iake na wani naone rei nooi sani kahatene ereuna iake nea. Anahatana iapuheu sio panesi wasoni naone omata muaine. Reiso oamahaiso. ²¹ Pene anomo rauponu. Mka urui muaina osimo runa mo hehuka.”

Reiso ianamana iake sanrei osi nea kakau na pene okaitaui.

²² Reiso Yusuf iruei poe Mesir runa nea kakau, wanini, runa nea enau pusiso. Iamahaiki rotu-tu ne musum utun hutusa. ²³ Inoo nea momou, nea upu arihoni Efraim. Inahi Makhir ne hehuka. Sio reimo, sio Manasye nea momou. Inahiso, areimo sio no monne nanie inooso sani ruai ne hehuka.

²⁴ Yusuf iasau osi nea kakau runa wanini sanrei, “Au nanie haineke umataku nea. Ne Anahatana mka isakamo na ihokamo arihoni otoe reini na onunimo pani otoe wani itotoe nanie iruiki osi Abraham, Ishak, runa Yakub noa upu noa momou.

²⁵ Oyo Yusuf ioi nea enau pusiso na ohokaso mai tanui na nanie iaunutu hako osiso. Iahata, “Mka Anahatana ihokamo arihoni otoe reini mo saka orori we patane arihoni reini.”

²⁶ Taa ianamana pusi sanrei oyo imatai poe otoe Mesir. Ne musum utun hutusa. Oaunutu upati ososa-sosai mai ne patane na oaunutui poe peti anoe.