31
Saul Runa Ne Hehuka Hanaia Tonuso Omataso
1 Reiso sio Filistin oahita runa sio Israel roe Tinetae Gilboa. Sio Israel panesi omataso roe rei. Noo sani ai ehuka. Sio panesi omataso ne sio umau orumaso. 2 Saul runa ne hehuka orumaso oi. Ne sio Filistin osuiso. Osuiso rotu-tu ohunu Saul ne hehuka hanaia tonuso omataso. Sio reimo, Yonatan, Abinadab, runa Malkisua. 3 Manahitane mainae mai Saul nusui rotu-tu niuna ramosai. Ramosai rotu-tu ne apata mainaya. 4 Ia iasau osi ia waini iro-rori ne tunue, henue, runa ne niuna. Iahata, “Saru me tunue na asipaku. Asipaku na pene sio wasoni oationa Anahatana tewa ounaku sani maisene. Upeneku tau sio ohunuku asi.”
Iahata, “Upu. Upeneku. Upeneku uhunua asi.”
Ipenei ihunui tau iamuirai. Reiso Saul ruai inana ne tunue oyo iaunutui poe tuamane samatoro iroru ruai tanui oyo imatai. 5 Taa ia hehuke rei inoo ata Saul imatai nea oyo ia iae iroru ruai poe ne tunue. Imatai haineke Saul. 6 Reiso Saul runa ne hehuka hanaia tonu runa ne soratatua pusiso na ia hehuke rei omataso tau ranie hatae rei sirinia.
7 Taa sio Israel wasoni orueso sui ekote rei runa sio wasoni orueso pani Wae Yordan on ria hae oatinu ata sio soratatua Israel orumaso ne Saul runa ne hehuka hanaia tonu omataso. Reiso orumaso arihoni no niana. Oyo sio Filistin orueso sui niana rei.
8 Nene hanu roe sanrei sio Filistin ohokaso poe owahu sio wasoni omataso no apia. Sio osupu Saul runa ne hehuka hanaia tonu rei oi wasoni omataso roe Tinetae Gilboa. 9 Osupu Saul sio oyo oroto roha Saul unui runa onana ne papi manahitane. Oyo sio oaisosi sio umau oeu osima-sima sui otoe Filistin pusiki. Osima runa sou iake rei osi sio Filistin pusiso runa no anahatanau waroni titue tewa. 10 Oyo oaunutu Saul ne papi manahitane rei nau no anahatana wani titue tewa ne numa. No anahatana wani titue tewa rei nanae Asytoret. Ne ne patane runa ne hehuka hanaia tonuso no patana orerere pani pakelo nau nia Bet-Sean.
11 Ne sio arihoni nia Yabesh ria otoe Gilead oatinu ata sae wani sio Filistin ounai tau Saul ne tihane hatae. 12 Oyo sio wasoni no parane mainae oeuso arihoni otoe rei oeu tau pumono nau nia Bet-Sean. Hoka nau oyo oaputunu Saul sio no tihana hahaya arihoni niane rei nene pakelo. Oaputunure oyo ororire na ria Yabesh. Hoka ria oyo oakanupu no tihana hataya rai. 13 Oamanou no unia pusire oyo okanire poe ai tamariska nohue ria niane rei. Okanire oyo oamaoni rotu-tu onona itu.