¹ Daud anoi repunoko Saul runa Yonatan pusi oyo iasei tau Anahatana. Iahata, “Upuku Anahatana. Ano anina nanie au ununiku ria niane isa ria otoe Yehuda?”

Anahatana iahata, “E-e.”

Ita iasei honu, “Niane sae?”

Iahata, “Hebron.”

² Oyo Daud ieu ria Hebron ikata ne pinau uaso. Sahai isa waini nanai Ahinoam, ia arihoni sio Yizreel. Sahai isa honu nanai Abigail. Ia pina arihoni Karme. Sahai manaonete imatai. Sahai rei nanai Nabal. ³ Ieu ria Hebron ikata ne sio soratatua runa no pina hehuka. Hoka ria oyo orueso ria Hebron runa nene niana pusire. ⁴ Oyo sio Yehuda oatinu ata Daud waira Hebron nea oyo oeuso ria ohitiki iuna aia tau otoe Yehuda.

Taa Daud iatinu ata sio nia Yabesh pani otoe Gilead okani Saul ne tihane hatae nea oyo ⁵ iaunau pani tanuso. Iahata, “Uainisi na Anahatana irui iake osimo tau omi okani moa upu, ia onate aia Saul, tau omi anomo runai. ⁶ Reiso au uainisi na Anahatana iakahaimo na omi oanei ata anoi runamo. Iakahaimo na omi oanei ata ikata runamo suiosa. Au iae mka unamo iake tau okani Saul. ⁷ Moa upu Saul imatai nea. Ne sio Yehuda ohiti au tau aia nea. Reiso oamkona. Pene okaitau.”

⁸ Ia waini iuna mainae tau Saul ne sio soratatua pusiso waini nanai Abner. Abner amai tau Ner. Abner irumai ikata Saul anai waini nanai Isyboset na ria Mahanaim ria Wae Yordan ria hae. ⁹ Hoka ria oyo Abner ihiti Isyboset iuna aia tau otoe Gilead, otoe Asuri, otoe Yizreel, otoe Efraim, otoe Benyamin, runa otoe Israel pusiki. ¹⁰ Ihiti Isyboset tau aia tau sio Israel, ne musum hutu ate. Isaka iuna aia rotu-tu musum ua. Iuna aia tau otoe Israel ne Yehuda mo, opusu Daud. ¹¹ Daud iuna aia poe nia Hebron poe otoe Yehuda rotu-tu musum itu hunana nome.

¹² Taue isa Abner ieui iarihoni Mahanaim ieui poe nia Gibeon ikata Isyboset ne sio soratatua. ¹³ Yoab iae ieui ikata Daud ne soratatua poe niane rei oi. (Yoab inai tau Zeruya.) Saul ne soratatua runa Daud ne soratatua uaso osaka nanie oahita mai kunenane Gibeon. Abner sio osaka on mai hae. Yoab sio on pani hae. ¹⁴ Abner iasau osi Yoab iahata, “Mai na uata iaisosi re soratatua oapataruna.”

Iahata, “E-e. Iake.”

¹⁵ Oyo sio hutusa rahana ua arihoni otoe Benyamin okati Isyboset runa sio hutusa rahana ua arihoni Daud ne soratatua okati Daud. ¹⁶ Oyo oapataruna. Sana osa-osa runa ne neta oakahuu no huau oyo osipa umau tau tunue rotu-tu pusiso omataso. Pusiso osipa tunue tau ne neta nusui anae. Reiso sio ohete tihue rei pani Gibeon nanae tau “Nisi Tunue.”

¹⁷ Taa sanrei oahita runa umau. Reiso manahitane mainae. Daud ne sio soratatua onesi Abner runa sio soratatua Israel. ¹⁸ Zeruya ne hehuka hanaia tonuso wasomo manahitane rei. Sio wasoni Yoab, Abisai, runa Asael. Asael iruma rapu sani maianane. ¹⁹ Reiso isui Abner suiosa. ²⁰ Ne Abner iuni inoo hae muie oyo iasei, “Asael, ano reino si?”

Iahata, “E-e.”

²¹ Oyo iasau. “Pene asui au. Aeu anota ia honue isa. Ahita hunui. Anana ne tunue na ne henue ne niuna.” Ne Asael ipenei iatinu tanui reiso isuiki sirinia.

²² Ita Abner iasau honu. Iahata, “Pene asui au. Asuiku suiosa mka uhunua. Uhunua oyo ukaitau reiso mka sapani na unoo kakamu Yoab? Mka uruma uauhuniku.”

²³ Ne Asael ipenei iaraoo sirinia. Oyo Abner iraui tau atiene erenusui rotu-tu resonnau totui unie. Asael on roe iamnohoi. Iamnohoi oyo imatai kua naniai rei sirinia. Sio wasoni ohokaso pani naniai rei oaraoo. Onoo Asael imatai nea reiso oaraoo.

²⁴ Ne Yoab runa Abisai osui Abner sirinia rotu-tu ranie eremanu, ohokaso roe pupue wani nanae Ama. Pupue rei wapo nia Giah on ria hae na poe otoe huie poe Gibeon. Hoka poe ranie nanie eresohui nea. ²⁵ Kua rei oyo sio arihoni ipane Benyamin osupu Abner oyo okata Abner. Okata umau oyo oamanouso osaka opusu pupue rei. ²⁶ On roe rei Abner iakapona osi Yoab iahata, “Ita nanie iahita rotu-tu ria supani? Ano anei tewa ata iahita suiosa mka ipeneta tau umau? Ita reini kaka wani. Inasa ano asopo me soratatua reino na pene osui ami kuru?”

²⁷ Iahata, “Tau Anahatana waini iamahaiki sinana ano asau on sinasi mo, mka we soratatua osuia tewa nea. Ne asau tewa so sina we soratatua osuia sirinia rotu-tu hanu omnanoe.”

²⁸ Iasau pusi sanrei oyo Yoab iauhona rompa nene sepi-sepie na ne soratatua oanei na pene osui sio soratatua Israel nea. Reiso sio oahita tewa nea.

²⁹ Abner runa ne soratatua oeu pusu Ekote Yordan oyo osipu toha Wae Yordan oeu suiosa tau pumono rei rotu-tu manahane. Oeu rotu-tu ohokaso ria Mahanaim.

³⁰ Yoab isui Abner tewa nea oyo iamanou ne soratatua pusiso. Hasae Asael runa sio hutusa rahana sia omataso. ³¹ Ne Daud ne soratatua ohunu Abner ne soratatua arihoni ipane Benyamin, sio 360. ³² Taa sanrei oyo Yoab runa ne soratatua onana Asael ne tihane hatae na okaniki runa ne nea upu nea momou poe nia Betlehem. Okaniki pusi oyo oeuso tau pumono rei rotu-tu ohokaso poe nia Hebron tau kinoke.