पोरबू नीतीकतानेर
चाजूरान कामूल
परीचय
पोरबू नीतीकतानेर चाजूरान कामूल तो कागेत, लूका एन्डानेड लिकूरान दुसेर काटाव आय। ओड लूका लिकूरान एडो पाटा एन्डान पोईल कागेत ती, ईसू मापोरबू चाजूरान कामूल बीतेर ती लिकेड नाड। ई कागेत ती नाती केचूर चिला जियोमीन ताकोत तीग पतरस चाजूरान ओदो कामूल आरू पोलूस चाजूरान कुबे कामूल तो बीतेर ती लिकेड नाड।
इना पोईल वादेक पोरबू ईसून पातीयाकतानेर एटे ती नाती केचूर चिला जियोमीन बेटी किली, मापोरबून एडो पाटेन एरूसेलेम ती, एऊदी देचे ती, सामरी देचे ती आरू गुलाय देचे ती वेनपीकतेर एन्डान इसाबूलीन पोड़ू एर्रा। आरू एटे ईसू मसीयालीनa एऊदी लोग आरू एऊदीकूल चिला आवूर जातीत लोग बेले बिसवात चाजेर एन्डानो बेले पुनूंग एरमो।
पोरबू नीतीकतानेर चाजूरान कामूल तो कागेत ती मून्डू बागूल मेन्डाव। आव नातोव आय एनोड:
1. ईसू पोडी एतीक एर्रान पिटतेल लोग ईसू मापोरबून पाटेलीन पातीयाकतानो,
2. पलीसतीन पेरगेन ती लोग ईसू मापोरबून पाटेलीन पातीयाकतानो,
3. बूमादया सोमून्द टिटाक तो देचेल आरू रोमी देचेत लोग ईसू मापोरबून पाटेलीन पातीयाकतानो एन्डानो आय।
पोरबू नीतीकतानेर चाजूरान कामूल तो कागेत ती, जाम्मेग ले पोईल पिन्तेकूस दिने ती नाती केचूर चिला जियोम लावोडी इड़ी किली एटे-एटे ईसू मापोरबून बिसवात चाजूरान लोगीन जियोम ती, डेरा चाजी किली ओरीन पाव टोटीकतेड आरू ओरीन बेरकेच चिञ्ञेड एनी पोड़ू एर्रा। पतरस आरू पोलूस मेरचीकतान पाटेल तीग बिसवासी लोग नातोन-नातोन बिसवात चाजेर एनी बेले पुनूंग एर्रा। ई कागेत ती लिकी मेन्डान इसाबूल तीग बिसवासी लोग बिसवात चाजूरान इसाबूल ती एटे चेलेर आरू एटे मिलेन ती मेन्डीर एनी बेले पुनूंग एर्रा।
ई कागेत तो इसाबूल
ईसू सरग ती एतीक एर्रानो 1:1-26
चेलालेर एरूसेलेम ती गोवाईतेर एर्रानो 2:1–8:3
चेलालेर एऊदीया आरू सामरीये ती गोवाईतेर एर्रानो 8:4–12:25
पोलूस एडो पाटेन लोगूग वेनपीक किली मापोरबून सेवा चाजूरानो13:1–28:31
पोलूस एडो पाटेन वेनपीक पोईल गुबोड़ पाव ताकूरानो 13:1–14:28
एरूसेलेम ती सियानकूल ऊबा ऊबी एरू उलजूरानो 15:1-35
पोलूस एडो पाटेन वेनपीक दुसेर गुबोड़ पाव ताकूरानो 15:36–18:22
पोलूस एडो पाटेन वेनपीक तिसेर गुबोड़ पाव ताकूरानो 18:23–21:16
पोलूस एरूसेलेम ती केयदाल एरी केसरीया आरू रोमी गेड़ेल ती चेन्डानो 21:17–28:31