एऊना लिकूरान एडो पाटा ईसू आय मांजा एरी किली गेरोब पातरान जुग जुगूग ले मेन्डान मापोरबून पोद्द आरू ओड वेरी किली आम्म नाड़बूल किन्डीक कोम्बेर पिञ्ञेड (1:14) एनी टोटीकमो। ई कागेत ती लिकी मेन्डान आकाट, ई कागेतीन पोड़रानेर “ईसू ई मापोरबून चिन्ड मसीयाल आय एनी बिसवात चाजी किली ओन पिदीरीन ताकोत तीग जुग-जुग तो जियोमीन” (20:31) बेटेकेर एनी आय ई कागेतीन लिकूरानो मेन्डा। ई कागेतीन लिकूरानेड ईसून बारा जान चेलालेर कान तीग ओकूर, एऊना आय। ओड तान चूड़रानोन, ईसून तीग वेनदानोन आरू मेरीयूरानोन ई कागेत ती लिकेड नाड।

ईसू आय मांजा एरी गेरोब पातरान जुग जुगूग ले मेन्डान मापोरबून पोद्द एनी टोटीक किली ओड चाजूरान कुबे चिनेल आकाट तो पोरलेत कामूलीन लिकी किली, ईसू, जुमान चिड़ाक मेन्डान मापोरबून चिन्ड मसीयाल आय एनी एऊना टोटीकमेड। आदीन ले पिटतेल ईसू केडीकतान इसाबूल, चिनेल आकाट तो पोरलेत कामूल तीग नातो पाता चेलूमो एनी पारगाकमोव। ओदेर एटे ईसून बिसवात चाजी किली ओन पोटतेल चेन्डेर आरू ओदेर एके एटे ओनीन बाकनेर एन्डान पाटेन बेले इना आम पोड़ू नाम्बीकताम।

आदयायूल 13-17 ती ईसू आपला चेलालेरीन एदरा चोग चाजेड आरू नातोन-नातोन पोक्की किली ओरीन जियोम ताप्पेड एनी पोड़ू एर्रा। आदीन ले पिटतेल ईसून केयदाल एरीकतानो, कुरूस पारे ती कोटीक बेटाकतानो, ओड जियोम पाड्डी मारी चुलतानो आरू जियोम पाड्डी चुलतान पिटतेल आपला चेलालेरूग देका पाडरानो, ई जाम्मा पाटेलीन पोड़ू एर्रा।

दोस पाडरान आयालीन बीतेर तो इसाब (8:1-11), ओदोव मुन्नीत मुकीयाट एवूल ती चिल्ला। आदूगी ओदो बाईबल ती ई पोद्दूलीन बिरेकेट ती डालेर नार।

ई कागेत ती ईसू आय मापोरबूनेल उयरान पाव आरू चेत्त आरू जियोम एनी बिसवात चाजूरानेर जुग-जुग तो जियोमीन इनाम बेटूरार एनी लिकूरानेड चोमजाकमेड। आरू ईसू आय चेत्त जियोम चियरान रोटीन आकाटतेड, चेत्त पाव, चेत्त गाडीड, चेत्त आंगूर टुन्डेन मोदेलीन आकाटतेड एनी बेले टोटीकमेड।