Situhu' to Sahani yolona, inde suha' natuli' mesa tau isanga Markus. Indo Markus si napasola Petrus illaam pa'laoanna umpa'pakahebaam Kaheba Katilallasam. Iai too natulasam Petrus, iam natuli' Markus tama inde suha'.

Illaam inde suha', natuli' Markus diona pa'palakoanna anna pepatuduanna Puang Yesus. Umpa'pakahebaam Kaheba Katilallasam buttu yabo mai Puang Allataala, naua: “Lambi'um wattunna la umpalako kapahentaanna Puang Allataala. Pengkatoba'koa' ammu katappa'i Kaheba Katilallasam” (1:14-15). Kuasa Puang Yesus la umpabono' to masaki anna uhhambai ingganna setam illaam mai kalena hupatau. Moi anna susi, sapo' untumpu pala' ia Puang Yesus to kasallena to Yahudi lambi' sipattuju-tuju la naaka susi anna malai dipatei Puang Yesus (3:6). Sapo' kaha-kaha ia too inna natula' loppo'um lako passikolanna naua: “La natelleä', la nasitikkudu-kuduiä', la nadahhaä', anna la napateiä',” (8:31, 9:31, 10:33-34). Moi anna naissam loppo'um indo pattujunna, sapo' le'ba' mandi längäm Yerusalem, aka inna la umbeho kalena dipatei anna mala ussolom hupatau dio mai dosana (10:45). Puhai mate Puang Yesus, tubom sule dio mai alla'na to mate (16:1-8).

Ia anna natuli'i inde suha' Markus anna mala makaleso diua Puang Yesus-um too indo To nalanti' Puang Allataala la mepasalama' anna Ia toi Änä'na Puang Allataala (1:1, 11, 24; 3:11: 5:7; 8:29; 9:7; 14:61-62; 15:39). Anna maelo' duka' Markus umpomatoto' kamatappasanna to umbatai anna mala tontä liu manontom untuhu'i Puang Yesus illaam muoloi ingganna-ingganna sia (8:34-38; 10:29-31).