8
Nagaserbisyo si Hesus sa Banal nga Lugar sa Langit
1 Ang pinakapunto ng akon mga ginahambay: kita hay may imaw ini nga pinakapunò na ng mga parì nga nagapungkò sa tuo ng trono ng Makagagahom nga Dios sa kalangitan. 2 Nagaserbisyo mismo siya bilang pinakapunò ng mga parì didto sa Banal nga Lugar, imaw ini ang matuod nga Tolda nga Sambahan. Bukon tawo ang naghuman ng adto nga lugar kundì ang Dios mismo. 3 Kag tungod ang kada pinakapunò ng mga parì hay ginapilì nga maghalad sa Dios ng mga hayop kag mga halad nga regalo, nganì kahinangyan nga may ginghalad da ang aton pinakapunò ng mga parì. 4 Kung yari pa siya sa dutà, indì gid siya puydi nga maging parì, kay tunà pa nang una may mga parì na diri nga nagahalad sunò sa Kasuguan. 5 Ang inda ginahuman nga mga paghalad hay halimbawà kag anino lang ng mga butang nga ginahuman didto sa langit. Nasayuran ta ini kay nang matunà na nga patindugon ni Moises ang Tolda nga Sambahan, gingpaandaman siya ng Dios, “Siguraduha nga ipahuman mo gid ini tanan sunò sa orihinal nga gingpakità ko sa imo diri sa bukid.”a
Si Hesus ang Miyugpatungà ng Bag-o nga Kasugtanan
6 Pero sa matuod lang, mas maayo ang pagserbisyo nga gingbaton ni Hesus bilang pinakapunò ng mga parì kaysa sa pagserbisyo ng adto nga mga parì. Siya hay imaw ang miyugpatungà ng bag-o nga kasugtanan hay mas maayo kaysa sa una, tungod ang bag-o nga kasugtanan hay ginabasi sa mas maayo pa nga mga promisa ng Dios.
7 Kung wayà ning kakuyangan ang una nga kasugtanan, indì na kuntà kahinangyan ng pangaduha. 8 Pero nakità ng Dios ang kakuyangan nang una nga kasugtanan, nganì naghambay siya sa mga nagsunod diri,
“Tan-awa! Magaabot ang mga adlaw kung magahuman ako ning bag-o nga kasugtanan sa mga tawo ng Israel kag ng Juda,
9 kag ini hay bukon na pareho sa una nga kasugtanan nga akon ginghuman sa inda mga kalulo-lulohan, nang adto nga adlaw nga gingdaya ko sinda nga may kabayaka paluwas sa Ehipto.
Wayà ninda pagsunda ang una nga kasugtanan nga gingtao ko sa inda.
Nganì gingpabay-an ko na lang sinda. Ako, ang Dios, ang nagasiling ini.”
10 Naghambay pa ang Dios,
“Ang bag-o nga kasugtanan nga akon humanon sa mga tawo ng Israel sa paabuton nga mga inadlaw hay imaw ini: Ibutang ko ang akon mga sugò sa inda hunahunà, kag isulat ko ang mga ini sa inda tagipusuon.
Ako hay maging inda Dios, kag sinda hay maging akon mga tawo.
11 Wayà na ning may magahambay pa sa iya kasimanwa o sa iya utod nga dapat kilayahon niya ang GINOO,
kay sinda tanan hay magakilaya sa akon, tunà sa bukon bantog hasta sa pinakabantog.
12 Kay patawaron ko sinda sa inda mga malain nga nahuman, kag indì ko na pagdumdumon ang inda mga salà.”b
13 Kag tungod naghambay ang Dios nga may bag-o nga kasugtanan, klaro nga ang una nga kasugtanan hay lumà na, kag ang abir ano nga lumà na kag wayà na ginagamit, hay maduduyà na.