¹ Ano ang pagtuo? Ang pagtuo hay ang matuod nga mga butang nga aton ginalauman, ang pagsigurado sa mga butang nga wayà pa naton makità. ² Tungod sa ini nga pagtuo, gingdayaw ang aton mga kalulo-lulohan ng Dios.

³ Tungod sa pagtuo, nasayuran ta nga ang kalangitan kag kalibutan hay ginghuman paagi sa paghambay ng Dios. Nganì ang mga butang nga aton nakikità hay ginghuman bukon halin sa nakikità.

⁴ Tungod sa pagtuo, naghalad si Abel ning halad nga mas maayo kaysa kay Cain. Kag paagi sa iya pagtuo, gingkabig siya ng Dios nga matarong, kay gingbaton ng Dios ang iya halad. Nganì abir patay na si Abel, may ginatudlò gihapon siya sa aton paagi sa iya pagtuo.

⁵ Tungod sa pagtuo, wayà mamatay si Enoc kundì gingdaya siya ng Dios didto sa langit. “Wayà na siya makità diri sa dutà kay gingdaya siya ng Dios.”^a Kag nakasulat sa Kasulatan, “Bago gingdaya siya didto, nalipay gid ang Dios sa iya pagkabuhì.”^{b 6} Pero ang tawo nga wayà ning pagtuo hay indì gid makatao ning kalipay sa Dios. Kay ang abir sin-o nga nagapalapit sa Dios hay kahinangyan magpati nga may Dios kag magtuo nga siya ang nagatao ning bayos sa mga tawo nga nagapangità sa iya.

⁷ Tungod sa pagtuo, gingpatihan ni Noe ang paandam ng Dios parti sa mga magakatabò abir wayà pa niya ini makità. Nganì gingtahod niya nga may kahadlok ang Dios kag naghuman siya ning arka agud maluwas siya kag ang iya pamilya. Kag paagi sa iya pagtuo, ginghusgahan ang mga tawo sa kalibutan; tungod da sa iya patuo gingkabig siya ng Dios nga matarong.

⁸ Tungod sa pagtuo, gingtuman ni Abraham ang gingsiling ng Dios nga magkadto siya sa lugar nga iya mababaton bilang panublion. Gingbayaan niya ang iya lugar abir wayà siya makasayod kung diin gid siya magkadto. ⁹ Kag tungod da sa pagtuo, abir nag-istar si Abraham sa adto nga dutà nga gingpangakò sa iya, nag-istar lang siya sa mga tolda nga daw sa estranghiro. Nag-istar da sa mga tolda ang iya ongà nga si Isaac kag ang iya apo nga si Jacob, nga kaibahan nga miyugpanublì sa pangakò ng Dios. ¹⁰ Ginghuman ini ni Abraham kay ginahuyat niya ang siyudad nga may malig-on gid nga pundasyon, nga ang Dios mismo ang nagplano kag nagpatindog.

¹¹ Tungod da sa pagtuo, nakabaton ng abilidad nga makaongà pa si Abraham, abir maguyang na gid siya kag abir baog ang iya asawa nga si Sara, tungod kay nagpati siya nga masaligan ang Dios nga nagpangakò sa iya. ¹² Nganì tunà kay Abraham, nga wayà na gid ning paglaom nga makaongà, naghalin ang mga inapo nga pareho kadamò ng mga bituon sa langit kag pareho da ng baybay sa alihid ng dagat nga indì mabilang.

¹³ Ini tanan nga tawo hay nagkamatay nga nagatuo. Abir wayà ninda nabaton ang mga gingpromisa ng Dios mintras buhì pa sinda, sigurado gid kag kalipay sinda nga magaabot ang adlaw nga mababaton gid ninda ang inda ginapaabot. Ging-akò ninda nga sinda hay mga estranghiro lang gid kag bukon taga-diri sa ini nga kalibutan. ¹⁴ Ang mga tawo nga nagahambay nang tiyad inà hay nagapakilaya nga ginapangità pa ninda ang banwa nga para gid sa inda. ¹⁵ Wayà na ninda ginaisipa ang lugar nga inda ginghalinan, kay kung ginaisip ninda, may tsansa pa sinda nga makabalik didto. ¹⁶ Pero ang inda ginghuman, gingpalabi gid ninda ang mas maayo nga lugar, kag ini hay wayà ning iban kundì ang siyudad nga yadto mismo sa langit. Nganì wayà ginakahuyà ng Dios nga siya hay tawagon ninda nga inda Dios. Sa matuod lang, gingpreparahan niya sinda ning isa ka siyudad.

¹⁷ Tungod sa pagtuo, gingdaya ni Abraham para ihalad ang iya ongà nga si Isaac nang gingtilawan siya ng Dios. Nagsugot si Abraham nga ihalad ang iya bugtong nga ongà, abir nabaton niya ang mga pangakò ng Dios ¹⁸ parti sa iya ongà nga nakasulat, “Kay Isaac, magahalin ang imo mga inapo nga akon gingpangakò.”^{c 19} Kay nagapati siya nga kung mamatay gida si Isaac, mahuhuman ng Dios nga buhion siya. Nganì naibalik si Isaac kay Abraham, daw sa nabuhì siya halin sa pagkamatay.

²⁰ Tungod sa pagtuo, gingbendisyunan ni Isaac ang iya mga ongà nga sina Jacob kag Esau nga maging maayo ang inda kabuhì sa paabuton nga mga adlaw.

²¹ Tungod sa pagtuo, nang malapit na mamatay si Jacob, gingbendisyunan niya ang iya mga apo nga mga ongà ni Jose. Kag nagsamba siya sa Dios mintras nagapanukod sa iya sungkod.

²² Tungod sa pagtuo, naghambay si Jose nang malapit na siya mamatay, nga ang mga Israelita hay mahalin sa Ehipto, kag nagbilin siya nga day-on ninda ang iya mga tuy-an kung maghalin na sinda.

²³ Tungod sa pagtuo, ang mga ginikanan ni Moises hay wayà mahadlok nga magsuway sa sugò ng harì, kay pagkatapos nga ging-ongà siya, nang makità ninda nga guwapo ang inda lapsag, gingtagò ninda ini sa suyod ng tuyo ka bulan.

²⁴ Kag tungod sa pagtuo, wayà nagsugot si Moises nang may edad na siya nga tawagon pa siya nga ongà ng prinsesa nga ongà ng Faraon.^{d 25} Gingpalabi niya ang mag-antos kaibahan ang mga tawo ng Dios kaysa sa magpangalipay sa salà sa matag-od lang nga tiyempo. ²⁶ Gingkabig niya nga mas maayo pa gid ang pagpakamaayo nga iya mababaton kung mag-antos siya ng mga kahuy-anan para kay Kristo kaysa sa mga manggad nga mabaton niya sa Ehipto. Kay gingpalabi niya ang bayos nga paabuton. ²⁷ Kag tungod sa pagtuo, naghalin si Moises sa Ehipto nga wayà nahadlok nga mahangit ang harì sa iya. Kay nagpadayon siya nga daw nakikità niya ang Dios nga indì makità. ²⁸ Tungod sa iya pagtuo, gingtunaan niya ang pagsilibrar ng ginatawag “Pista ng Pagligad ng Anghel.” Gingsugò niya ang tanan nga Israelita nga pahiran ninda ning dugò ng karnero ang inda mga puwertahan, kay basì kung patyon sinda ng anghel nga magapamatay ng mga panganay mintras ligaran sinda.

²⁹ Tungod sa pagtuo, nakatabok ang mga Israelita sa Mapuya nga Dagat nga daw nagapanaw lang sinda sa uga nga dutà. Pero nang gingtilawan ng mga taga-Egipto nga magtabok, nagkalumos sinda.

³⁰ Tungod sa pagtuo, nagmartsa ang mga Israelita palibot ng siyudad ng Jerico sa suyod ng pito ka adlaw, pagkatapos natumpag ang pader diri.

³¹ Tungod sa pagtuo, si Rahab nga nagabaligyà ng iya lawas hay wayà mapatay kaibahan ng mga taga-Jerico nga wayà nagtuman sa Dios, kay gingbaton niya sa iya bayay kag gingprotiksyunan ang mga espiya nga gingsugò ni Josue.

³² Ano pa ang akon ibalità sa indo parti sa mga tawo nga nagtuo sa Dios? Kuyang ang tiyempo kung iistorya ko pa sa indo ang parti kana Gideon, Barak, Samson, Jefte, David, Samuel kag sa mga mensahiro ng Dios nang una. ³³ Paagi sa inda pagtuo, gingpangperdi ninda ang mga gingharian, nagdumaya sinda ning matarong, kag nabaton ninda ang mga gingpangakò ng Dios sa inda. Paagi sa inda pagtuo, wayà sinda pagkauna ng mga leon, ³⁴ wayà sinda nasunog sa nagadabadaba nga kalayo, kag nalikawan ninda ang kamatayon sa espada. Ang iban sa inda maluya-luya gid pero gingpakusog sinda ng Dios. Naging maisog sinda sa inaway kag naperdi ninda ang mga sundalo ng mga taga-iban nga lugar. ³⁵ May mga babayi da nga inda mga ongà nga namatay hay nabuhì liwat. Ang iban hay gingsakit hasta mapatay, kay indì gid sinda magsugot sa kundisyon nga kung magtalikod sinda sa inda pagtuo buhian sinda. Kay nasayuran ninda nga magaabot ang adlaw nga buhion sinda ng Dios kag mababaton ninda ang mas maayo gid nga kabuhì. ³⁶ Ang iban sa inda hay ging-nginitlan kag gingpalatigo, kag may iban da nga gingpanggapos kag gingpangpriso. ³⁷ Gingbugoy sinda hasta mapatay, ginglagarì sinda hasta mautod, kag gingpangpatay sinda sa espada. Nagasinaylo-saylo sinda sa iba-iba nga lugar nga nakabarò ning panit ng karnero kag kambing, kapubre-pubre gid sinda, gingpasakitan kag gingpintasan ng mga tawo. ³⁸ Napilitan sinda nga magpanagò sa malangkag nga lugar, sa kabukiran, sa mga kuyba, kag sa mga buhò ng dutà. Pero sa matuod lang, ang mga malain nga mga tawo diri sa kalibutan hay indì bagay nga mag-kaibahan sa inda.

³⁹ Sinda tanan hay ginadayaw paagi sa inda pagtuo, pero wayà ninda nabaton sa inda tiyempo ang gingpangakò ng Dios. ⁴⁰ Kay may mas maayo pa nga plano nga gingpreparar ang Dios para sa aton, kay gusto niya nga kita hay makaibahan ninda para magbaton ng pagpakamaayo pag tumanon na niya ang iya gingpangakò.